08/10/07

Berça


Berça cun alguns dies na tierra



Berça an crecimiento




Berça yá trunchuda



Frol de berça






Berça granada, yá cula nabina buona para lhimpar


L’eideia de deixar eiqui las berças, mesmo nun tenendo ua frol mui guapa i bistosa, nun quier dezir que nun tenga dantendido l sprito de la perpuosta. L repunsable de l blogue quando fizo l cumbite a la quadrilha deste blogue para eiqui poner las bárias froles de l campo, i nun solo, que ampimpónen l termo de Miranda, bieno cumo ua houmanaige al títalo de l blogue, i este ye tamien un bun filon nua de las muitas cousas que inda hai muito que fazer i amostrar.
You las bezes que a este tema cheguei percuro que seia an cousas mais ralas, que nun se béien to ls dies i pássan al lhado, nien stan sembradas na anternete, mas agarradas stubírun i cuntínan a star hoije a las pessonas que por alhá fázen sue bida. Ye l causo de las berças. Ye ralo ancuntrar ua pessona que nun faga por eilhas, todo bira para poner uas nua lhata, ne l huorto, arrimado a las lheiras de ls pumientos, de ls tematos, de ls frajones, de las rabas, de las patatas, antre las paredes i ls poços, stan siempre uas berças. Quien nun sabe que bundaba uas berças, uas patatas i un cachico de touçino, metido ne l pote i la cena staba a camino? Quien nun gusta duns tronchos de berças cozidos i regados cul azeite deili de ls lhados de Bumioso? I dun arroç de repolho?
Alguas froles cumo esta nun mos arregálan ls uolhos tan bien cumo aqueilhas que acobílhan ls lhameiros i cabeços, mas nun son menos amportantes.
Béngan dende mais froles pa la cemba.


2 comentários:

AF disse...

Gustei, amigo Faustino, de ber eiqui cuntada la stória de la berça de repolho zde pequeinha. Mira, you gusto de la frol de berça i s'a mano ben hai giente que nien sabe que la berça dá froles.
Faziste bien an traié-las eiqui, que cálahan mesmo al son deste blogue. Pensei que mos ibas a dezir que culidades de berças teniedes por alhá, mas talbeç inda nun seia tarde.
Un abraço,
Amadeu

AF disse...

Acá torno you, amigo Faustino, por bias de ls dous buraquitos que hai na berça de l segundo retrato.
Cumo ye que le chamais al bichico que faç esse buraquitos nas berças?
Amadeu