24/10/07

Chupista

Roque/roco Cagado de Bruxa


Dei l nome de chupista a esta cousa que amostro ne l retratos, porque siempre you oubi chamar chupista a quien come ou bibe a cunta de ls outros. Asparece-me que ye l causo deste fadista, tamien pouco sei del, mas nun ye berde, frol i fruitos nun le beio. Cuido que ye de la família de l mofo.
Destes ten sido ralo bé-los adonde bibo, mas na mie aldé, ne ls matorrales, nun ye çfícele ancuontrá-los ne l tiempo deilhes. Porque eilhes le gusta la matéria muorta, i húmada i tamien algue de caliente. Las arbles chimpadas apochando, cepos que yá se rendírun al tiempo, nas camadas de folhaige ne l suolo.
Agora bou a falar duns sítios que tamien cuido que nacien, mas nun sei se stou cierto, se nun fur assi pacéncia.
Dantes, alhá pulas tierras de l praino, era muito amportante tener stierco. L stierco fazie la çfrença de tener ou nun tener ua buona colheita. Quando se sembrában las lhatas, las huortas i até las suortes, gustában que se le botasse stierco, porque éran muito ousadas i la tierra andaba cansada. Era l que hoije se podie chamar ua cultura eicológica. Quaije to l mundo tenie un sterqueiro. Nun habie adubos nien nitratos i pouco denheiro, habie si muita arte i coincimiento daprendido. Que ousában de muitos modos. Un deilhes era tener un sítio fuora de la pobaçon própio cun permisso para fazer ua foia, i ende s’iba botando la cama de la cria, de ls cochinos, de las béstias, de l ganado, quando se mundában las loijas, las corteilhas ou las corriças. Apuis quedaba ende apochando, fazendo la streformaçon de to las matérias.
Quando esso se fazie, acuntecie que deilhas salie calor, i até botaba un fumo cumo se fusse bafo, anriba de ls sterqueiros nun habie gelada que criasse carambelo, nien nebon que fazisse la cama, mas arrimado a eilhas até ls perros gustában de drumir.
Ende you bie cousas asparcidas a estas, que cuido que l pobo le chamaba cagado de bruxa.

1 comentário:

AF disse...

Oulá, amigo Faustino,

Esse chupista de que le publiqueste l retrato, nun fazie eideia que l pobo le chamaba «cagado de las bruxas». Oubrigado por mos l haberes dezido.
Nun ye mofo, cumo dizes, ye un «roque» ou «roco» ['cogumelo' an pertués], de que nun le sei l nome científico i que al secar queda a modo suola. Nun ye comestible.
A perpósiuto de la sterqueira, de l sítio adonde se fazie ou ajuntaba l stierco, tamien le chamában «muradal».