28/08/07

Picadeira(s)

*
Picadeira(s)


La maiorie de las pessonas, cuido you, conhécen esta pieça. Sáben para que serbie i la sue amportáncia. Quedou fura d’uso, hoije solo se bei ne ls museus, squecida nalgun cural, ou an casa cunserbada i çpindurada nua parede, que ye l miu causo. Pertence, cumo muitas outras, a outro tiempo, l tiempo an que las pessonas nua lhida liada a la criaçon de bitelas(os) para assi tener la sue própia criaçon cumo fuorça de trabalho ou bui de nomeada.
Esta pieça que se chama picadeira(s), mais balie que le chamássen zmamadeira. Era berdade que eilha picaba, mas solo s’ousaba para zmamar. Quando se querie zmamar ua bitela(o) ataba-se als cotos de la tiesta i al çofino por forma a ls picos de la(s) picadeira(s) quedáren nas narizes i na boca de la bitela(o). Quando este s’íba a mamar la mai era picada i nun deixaba, anté l scornaba. Al fin duns dies la mai secaba (perdie la funçon de dar lheite) i l zmamado squecie-se i tenie que quemer outras cousas que nun lheite de la mai.
Hoije, cuido you, era ua traiçon. Anton l buono de l bicho que mamaba nun nua teta mas si an quatro i dun die pa l outro, nun l puode fazer. Si debie quedar bien çcunselado l bichico, cun la paparoca eili siempre a mano i caliente, sien trabalho, nien delores de cabeça, era solo dar pinotes i apuis nun poder mamar mais.
Porque mamar siempre fui buono, nunca na mie bida bi naide resmungar anquanto mama. Malditas picadeira(s), la anteligéncia de ls homes l mais de las bezes stá birada para estas maldades.
Las picadeiras quedórun sien uso, mas que inda se mama muito i a la çcarada esso mama.

1 comentário:

AF disse...

Oubrigado, Faustino, por mos lhembrares estas cousas. Tamien le chamában "picos de zmama", i l nome "picadeiras" tamien se ousaba para nomear un fierro cun pequeinhos picos que se usa nas cabeçadas de las mulas i assi melhor oubedecéren a quien las lhebaba.
Trai-mos mais cousas dessas.