30/01/12

Salimiento de ls “Quatro Eibangeilhos”(Alto do Moinho-Corroios)



Onte a meidie ne l Clube Recreatibo do Alto do Moinho, an Corroios, fui apersentado l lhibro “Ls Quatro Eibangeilhos”.

Mais ua traduçon, mais ua obra de l’outorie de l porsor Dr. Amadeu Ferreira, que nun para de mos cuntemplar cun tantos i eicelentes trabalhos. L lhibro yá habie sido apersentado an bários lhocales, un deilhes na Sé de Miranda de l Douro, coraçon de la fala i lhéngua, an que esta obra agora tamien stá çponible als lheitores de mirandés.

Agora tamien la quemunidade mirandesa a bibir nesta área, i que ye muita i nien siempre ten la possiblidade de star na tierra de la sue ourige tubo l'ouportunidade de star an cuntato cula obra i l sou outor, assi cumo la populaçon an giral que nunca se negou i siempre acarinou todas las einiciatibas i eibentos que la quemunidade ten pormobido.

Na apersentaçon, l outor çtacou quanto ye amportante fazer este trabalho, puis yá éran milhares i milhares de lhénguas an que s’ancuntraba traduzido, queda cun este salimiento tapada esta frincha que era an mirandés, nun hai d’agora alantre çculpas para naide, que nun chegue a Dius i se l quejir fazer an mirandés. Que fui un trabalho feito al lhargo de muitos anhos, l sou salimiento tamien ye un serbício público, a la cultura nada se puode negar.

L outor, l’eidutora, l persidente i la repunsable de la área cultural de l Clube do Alto do Moinho stan mais ua beç de parabienes, uns pul sfuorço de traier i çponiblizar estes eibentos culturales i ls outros por abrir las puortas i recebir de braços abietos estes eibentos.



2 comentários:

ACangueiro disse...

amigo Faustino, guapo l testo i las fotografies. Assi se bai fazendo i mostrando la grande caminadade la Lhéngua Mirandesa.

Parabines,

antonho

Amadeu disse...

Un abraço arrochado, amigo Faustino, por haberes feito la crónica desta nuossa jornada de demingo.

Amadeu