14/10/11

SUONHOS



LS MIUS SUONHOS

Perdi la sienha de ls suonhos
Sien you ls puoder sunhar
Querie antrar nesses suonhos
Pa la buolber ancuntrar

You tenie un mundo só miu
Adonde bastaba un sunriso
Talbeç para mie surpresa
L suonho se fui sien abiso

Mas hai tanto tiempo fui isso?
Qu´esse suonho quedou porende
Tresmalhado, perdido na bida
Cousas que naide l antende

Miu pai dezie: nun baias
Atrás de suonhos? Queilhes son isso,
Por mais suonhos que tubires
Eilhes nunca passaran d´isso

Mas mie mai dezie: bai sigue
Que siempre ls suonhos puderan
Talbeç nunca passen d´isso,
Mas ajudar-te a bibier ban

I you quedei antre ls suonhos
I un mundo que nunca fui miu
Inda fui, mas nun l´agarrei
I l suonho nunca eisistiu

Hoije inda procuro la seinha
Daquel suonhos que an rapaç bi
I hoije querie antrar nesse sunho
Mas até hoije nunca cunsegui.

José António Esteves







3 comentários:

"Scacição" disse...

I cuntinue suonhando tiu Antonho,cuomo diç Gedeão "L suonho comanda la bida..."
Gustei destes bersos de suonho.

Bien haia i beijicos mius:)

José Esteves disse...

À Scacição, estes son para ti.

L CANTO DE LA ROSA

Estes bersos t´oufreço
Para ti mie guapa rosa
Que te cunserbes assi
Siempre fresca i fermosa

Assi fresca i fermosa
Ye ua alegria sien fin
Tener ua rosa tan guapa
Eiqui ne l miu jardin

Eiqui neste jardin de frols
Para la puoder apreciar
Siempre assi bien çpuosta
Pa l sou perfume me dar

Ajuda you pido a Dius
Para que la ajude a eilha
Puis stou ourgulhoso por ber
Eiqui ua rosa tan bela

Bela, ye, l que, eilha ye
Mirai para esta cousica
Naide me puode dezier
Que esta rosa nun ye guapica

Dezier guapica ye pouco
Digo you nesta hora
Ua eimage tan pura
Parece Nuossa Senhora

Parece Nuossa Senhora
Anriba de l sou altar
Ua rosa tan pura
Que siempre la bou adorar

Que siempre la bou adorar
Cun muita, muita felicidade
Yá amarei esta guapa rosa
Por toda la eiternidade

Muitos, muitos beisicos
Para ti rosa querida
Para que me puoda perfumar
Al lhargo de la mie bida

beisicos

José António Esteve

pus you si sigo suonhando
mas yá nada dá an nada
que depuis quando despierto
nun l´ancuntro l filo a la miada

"Scacição" disse...

À tiu Antonho,mas que surpresa you ancuntrei eiqui,uns bersos tan guapos todos para mi:)Oubrigada pul la sue delicadeza i simpatie.
Tome alhá un abraço miu bien sendinés!