12/10/11

La Bisita


Este bídeo yá ten algun tiempo, mas hoije boltei a cruzar-me cun el na anternete i resolbi colocá-lo tamien eiqui. Trata-se de ua bisita de l Ministro de la Eiducaçon, Nuno Crato, a ua scuola da Anadia. 





Ls cumentairos ne l youtube dibiden-se, porque ye defícele saber se ye mais anteligente la criança que diç que Socras ye un mintiroso ó aqueilha que, apesar de todo, sabe que cun Nuno Crato na eiducaçon, l paiç nun bai a lhado nanhun. 

Las oupeniones debiden-se i inda bien que assí ye. Mas deixemos esso. Nun ye sobre essa bisita que you quiero falar. Ye sobre outra, que hai quien diga que acunteciu na Anadia, mas hai quien diga que acunteciu noutros lhados. Ua beç que nun hai bídeos, bamos a ber se sou capaç de bos cuontar l que se passou.

Nuno Crato foi a ua scuola i mal antrou na sala, ua criança curriu para el, mui feliç i dixe-le: 

- Senhor ministro, la mie gata tube cinco gaticos i son todos apoiantes de l gobierno. 

L menistro quedou tan cuntento que telfonou lhougo a Passos Coelho a cuontar l sucedido. Radiante, Passos Coelho, dixe que querie coincer essa criança i Nuno Crato tratou lhougo de agendar outra bisita. 

Quinze dies apuis, alhá stában dambos ls dous, na mesma scuola, na mesma sala, i la mesma criança birou-se pa Passos Coelho i dixe: 

- Senhor purmeiro ministro, la mie gata tube cinco gaticos i ningun gusta de l gobierno. 

Siléncio sepulcral na sala. Finalmente, Nuno Crato, inda medio sien jeito, tomou la palabra: 

- Mas hai quinze dies, tu dexiste que ls gatinhos apoiabam o governo. 

La criança respundiu lhougo: 

- I apoiaban, senhor ministro, apoiaban. Mas agora yá ténen ls oulhos abiertos.

5 comentários:

leonardo antao disse...

Buonas nuites Firmino:

Gustei deste tou cunto qu'agora, ne l siléncio de la nuite, me fizo refletir na eiducaçon de ls ninos.

Ne ls tiempos an que bibemos acho que muitos pais nun stan a eiducar cumbenientemente ls sous ninos, porque sastifazen todos ls sous zeios, dando-les todo l qu'eilhes quieren, simplesmente pa ls cuntentar i deixar de ls oubir gritar.

Se ls ninos nun daprendíren a renunciar als sous caprichos, a fazer alguns sacrifícios i a dominar-se, tornan-se ourgulhosos, eigoístas i mais tarde desumanos i tiranos. Nun será eiqui qu'ampeça la decadéncia de la sociadade?

Queremos bibir tiempos melhores? Ampecemos pula eiducaçon de ls ninos.

Un abraço,
Leonardo

Almendra disse...

Buonas manhanas Firmino,

Esta cunta yá ten barbas i cúntan-la de todos ls gobernos.

Tenes rezon Leonardo, ls ouropeus i amaricanos ténen ua ciblizaçon ampossible. L peor ye que nun se dan cunta.

Firmino nun passa de un fruito dessa ciblizaçon.

Abraço
Almendra

Adelaide Monteiro disse...

Inda bien que esta cibelizaçon ampossible bai dando fruitos cumo ye Furmino, un rapaç culto, anformado, cun sentido crítico, defensor de la justiça social i de muitas outras cousas que solo quien l conhece l sabe abaluar.
Furmino ye un joben de la apelidada "geraçon rasca" que de rasca l mais deilhes nada ten, geraçon a que ls mius filhos tamien pertence. Son percisos muitos Furminos ne ls tiempos que ban correndo an que l cunformismo, l carneirismo, l egocentrismo i la apatie se stan a generalizar.

Cuntina Furmino!, a meter l dedo nas feridas para nun l deixares ganhar cotras.

Un beisico,

Delaide

Ana disse...

Tengo la certeza que Firmino ten muitas culidades. Nien siempre partilhei las mesmas oupeniones mas tamien me dei de cunta que sabe analizar muitas cousas cumo nien todos sáben fazer; inda nun hai muito por eisemplo a perpósito de la China. Un abraço para el !

Fir disse...

Buonas nuites a todos.

Leonardo: la eiducaçon ye de las cousas mais amportantes de un paiç, nun solo pa las crianças, mas para todos; ye perciso que las pessonas apréndan a lidar cun las frustraçones i que nun se tornen egocéntricas, egoistas ó tiranas; mas tamien nun se debe eiducar las crianças (nin ls adultos) a ancararen cun naturalidade las anjustícias de que son bítimas; sobre este assunto, inda tengo outras cousas que dezir, mas nó nun spaço público.

- Almendra: teneis rezon quando dezis que la cunta yá ten barbas i que se cunta sobre to ls gobernos. Se me permitis, you acrecento que son ls gobernos que, cu l que ténen feito, premiten que eilha se bá siempre adaptando. Solo nun antiendo porque stais anraibado, ye ua cunta einofensiba. Tengo pena de nun haber cunseguido dibertir-bos cun eilha, até porque, an cuntrapartida, bós dibertistes-me muito cu l buosso comentairo.

Adelaide: oubrigado pu ls buossos eilogios. Bou tentando fazer por merecé-los.

Ana: oubrigado pulas buossas palabras. Ye buono tornar a "ber-bos" outra beç eiqui pu l Froles.