17/10/11

Son grandes amigos…



Perguntei-me un die destes a la purmanhana, cumo era possible que todas aqueilhas mulhieres i homes que ende stában, biaijando a camino de trabalho i demais afazeres stubissen de tan mala cara.

Giente i mais giente, serena, sien ua sola palabra, cumo se fussen xordos i mudos, de feiçon selombroso, un ou outro alhá crúzan un oulhar cul bezino mais acerca que tamien çfarçadamente percura alguen que nun perdiu, na spráncia de que al mais debrebe possible l camboio chegue a la staçon, para assi dar ua fugida i agarrar al outocarro que las lhebe até l çtino.

I you para alhá de m’anterrogar ende quedo a ber todo este formieiro de giente, todo este alboroto para agarrar nun sei l quei, chegar nun sei adonde. Neste strapulhar feito to ls dies, nun ye atamado cula alegrie nien l prazer de biaijar para se chegar debrebe porque todo s’afigura ir yá de mala gana. Sina la de tantos que dies i dies afilo siempre de la mesma, siempre remolendo ls mesmos pensares, sien que reçuma un cachico de spráncia, sien que ua frisga de luç antre por aqueilhas jinelas i fulmine estas malas caras i nun demonie aqueilho que de mais sagrado eisiste, que ye lhaborar.

Cuntrapon i inda bien cun estas caras d’antierro i estas posturas de cundanados las lheituras de ls jornales diários ou de lhibros, puode ser un modo de çfarçar la mala gana de fazer camino, mas las cuontas séian eilhas amboras tempranas, séian eilhas anredos ou remanses, ajuda-mos a squecer canseiras i a lhebartar la moral quantas bezes bien neçaira ne ls dies que cuorren.

Ler, ler muito fai bien, seia quando fur, an biaije, an casa ou ne l jardin, poucas son las cousas nesta bida que mos lhibértan tanto, mos traspórtan para lhugares i tiempos que doutro modo nunca alhá chegariemos, que nunca eimaginamos.

Un cachico de leitura puode fazer la çfrença de un die malo ou dun die perdido, ler puode ser l milagro que mais percisamos, quando las cousas nun ándan de feiçon, quando las cousas quédan negras i sien seluçon, un cachico de leitura pudo spantar la maior de las cunsumiçones, un lhibro puode ser l cumpanheiro que mos fai falta al fin de l die, a la nuite quando l suonho nun ben. I quando ye bien scolhido, i ye buono anton nun hai remédio melhor.

Las mies scolhas, i ls redadeiros que li apuis de las bacances de l berano, até porque l tiempo para ler nun ten sido muito, fúrun “La Bouba de Tenerie”de Fracisco Niebro, “Livro” de José Luís Peixoto i “Vento Suão” de Rosa Lobato Faria, este inda por acabar.

Quien de nós se puode agabar que siempre stubo lhibre de tristezas i cunsumiçones? Cuido que naide. You tamien nó, i ten sido nas lheituras que l mais de las bezes ancuontro un sentido pa las cousas, tengo ancuntrado partilhas, spriéncias de bidas, prazeres, nas lheituras ancuntrado paç.

Ls lhibros son grandes amigos.

Ler fai bien a l’alma, assossega l sprito i puode birar ua mala biaije.

3 comentários:

leonardo antao disse...

Buonas nuites Faustino,

Gustei deste testo, de l que çtaco estes cachicos culs quales me eidantifico “lher muito fai bien, … poucas son las cousas nesta bida que mos lhibértan tanto, mos traspórtan para lhugares…, que nunca eimaginamos”; “un cachico de lheitura pudo spantar la maior de las cunsumiçones, un lhibro puode ser l cumpanheiro que mos fai falta al fin de l die, a la nuite quando l suonho nun ben”; “ls lhibros son grandes amigos”.

Cun este testo faziste-me relembrar alguas eideias i pensamientos que registo de las lheituras que bou fazendo, cumo estes:
- L lhibro ye un mudo que fala, un xordo que respunde, un ciego que guia, un muorto que bibe.
- L lhibro trai la bantaige de la giente poder star solo i al mesmo tiempo acumpanhado.
- Un lhibro debe ser l machado que partirá ls mares cungelados drento de nuossa alma.

Parabienes Faustino por este tou testo i pul tou lhibro “Nuobas Fábulas Mirandesas” i cuntinua a screbir mais lhibros, para que ls mirandeses nunca quedan squecidos.

Un abraço,
Leonardo

faustino.antao disse...

Buonos dies caro Leonardo

Puis las tues palabras neste comentairo nun se quédan atrás. S'algua dúbeda eisistesse, que l poder de la lheitura ten tanta fuorça, las tues frases atamában-las.

L que deziste bai fundo neste tema que ye la lheitura i l poder que ten an cada un de nós i de las gientes an giral. Un pobo que leia muito bai mais loinge, l que serie de nós sien esta trasga, cumo sparguien ls sábios l sou conhecimiento i las sues eideias, la lheitura siempre fui i há de cuntinar a ser la pila adonde se fai la melhor quemunhon.

Un bun die para ti i ls tous

Un abraço
Faustino

leonardo antao disse...

Dius mos deia buonas nuites Faustino!

Ye berdade que “la lheitura siempre fui i háde cuntinar a ser la pila adonde se fai la melhor quemunhon” i cumbinando esta eideia cun outra de l tou testo “poucas son las cousas nesta bida que mos lhibértan tanto”, acreciento inda outra eideia fuorte, que la lheitura puode eisercer un berdadeiro papel de Médico, ne l berdadeiro sentido de la palabra, ó seia, la lheitura ajuda-mos a curar quaije todos ls tipos de mal.

Neste tiempo an que la nuossa “moça” lhéngua mirandesa se tornou l centro de las atençones de l praino mirandés, mais amportante que la lheitura parece-me screber la lhéngua, porque al escrebé-la, bós ls buonos scritores, para alhá de stardes a oumentar balor a la lhiteratura, stais a registar i eternizar aspetos de l'alma dun pobo, ó, pul menos, a eternizar anstantes de la bida i de la stória desse pobo (mirandês) que deixan de cuntinar squecidos .

Ua buona nuite para ti i ls tous.
Un abraço
Leonardo