10/10/11

RUE LHÉNGUA MIRANDESA




Einaugurada cun muita prou,
L nome de la lhéngua, que ye mie i tue
Que alhá pals meios de Palmela
La lhéngua Mirandesa ten ua rue.

Ua rue que mos angrandece
I amostra toda la nuossa grandeza
I l dá a cunhecer a quien passa
Que eisiste ua lhéngua Mirandesa.

Deziemos-le oubrigado cun firmeza
A quien tube ua eideia tan brilhante
Puis agora la lhéngua Mirandesa
Debe seguir muito mais cunfiante.

Ls uobos ban sendo chucados
I ls paixaricos ban nacendo
Puis cun eideias tan brilhantes
La lhéngua Mirandesa bai crecendo.

Bai crecendo, i anriquecendo
I nun bai a parar de caminar
Que als poucos eilha bai indo
Para adonde eilha ten que star.

I alhá chegará de certeza
A todas las ounebercidades
Será un ourgulho pals Mirandeses
Por séran recunhecidas riadades.

Muitas i muitas felicidades
Tamien a quien ten stado calhado
Cumo l gobierno de Pertual
Que neilha pouco ten falado.

Queda-le eiqui este recado
I que nun me lhieben a mal
Que esta lhéngua Mirandesa
Ye la segunda de l nuosso Pertual.

José António Esteves
Lar de San Jesé Bumioso

5 comentários:

ACangueiro disse...

Ye buono ber l bersesar assi l nuosso poeta popular!

"Scacição" disse...

Que bersos tan bien anbersados Tiu Antonho!Gustei de ler.
Bien haia.

José Esteves disse...

À Scacição.

Ambersar nun custa nada
Ye só formar un squeleto
scuolher alguas palabras
i l berso quedará cumpleto

tamien ua pouca de mágie
naquel mumento certeiro
bereis que nun custa nada
à tiu Antonho Cangueiro

Abraços para todos

José António Esteves

"Scacição" disse...

Para bós tiu Antonho nun custará,mas ambersar cumo bós ambersais num ye para qualquira um!A esso chama-se arte i talento!
Anton cuntinuai cun essa magie:)
Beijicos mius.

ACangueiro disse...

Bersos de magie
you nun los sei fazer
mas bós, tiu Jesé
fazeis bersos a baler!

La berdade ye que sodes l nuosso maior poeta popular mirandés.

Bien haia por screbirdes i pula quadra.

Abraço arrochado,

Antonho Cangueiro