30/06/10

A la çtáncia de l pensar

Parece ampossíble stando an cuorpo nun lhugar i an sprito star noutro bien loinje.
Assi fui:
L cachico de tarte acabadica de zanformar soubo-me a cereijas, burmelhicas anrebuoltas an moras.
Lhambi ls beiços quando ls ambuznei ne l bolho de checolate, negrito cumo gusto.Botei-l ls dientes todicos, que se amólen ls quilos a más…
De la caldeirada de peixe que quemi a la cena, chegou-me un oulor a bolhos de bacalhau fregidos i douradicos cumo azeite birge. Tenien bacalhau i todo!... Si, porque a las bezes béian-se bolhos de bacalhau que nunca l biran, de bacalhau solo ténen l nome.
Bebi ua pinga de bino Lhéngua Mirandesa cun l oulor a bacalhau!
Cun todos me ri i bi-me ne l speilho de uns uolhos grandes dua rapaza alentejana, de nome Graça. Stube cun todos i lembra-se-me bien de tener bido ls uolhos azules guapíssemos de l amo de la casa. Quando se ri ls sous uolhos tamien se rien.
Uolhos, jinelas de l´alma!
Stou a oubir las risas de ls porsores apuis que cuntei ua lhona. Mira, mas you stou, cumo siempre, a ri-me más que naide! Yá me duolen las queixadas de tanto me dar la risa!
Antonho tamien yá me dixo, tu sós mui marota!
Quien you? Qu´anganhadico stás! Solo scribo muita baboseira, Antonho, falando cun la boca de ls outros; quien scribe ye mui anfingido!...
La mie bezina de l Toural rogou-me cun más un cachico de sou doce i de tabafeia, mas you dixe-l que querie un cachico de pito assado de l nuosso amigo cuntestatário, cun ua pinga de la jobe sendinesa que ten buon bino. Gustan-me muito las sues arganelas. A la cierta! La mie nuora tamien ten assi uas arganelas.
Agora bou-me alhá pala rue que eiqui delantre de la pantalha stá muita calor.
Deixo-bos. Torno para adónde habie stado to la sumana.
Gustei deste cibico bien passado, quemido i buido.
Alhá bos abéngades manhana cun ls altemóbles de la cidade.
You torno a molhar las panturrielhas, olé!...

8 comentários:

Fir disse...

Ó Delaide,

anton i nun me bistes por alhá an la cena?

Se calhar, foi porque cheguei atrasado.

Beisos,
Fir

Adelaide Monteiro disse...

Mas anton nun fuste tu que me deste l pito assado, Fir? Mira que até bui ua pinga cun el...
Pus claro que te bi i falemos acontra ls políticos, nun se te lhembra?

Beisicos

AF disse...

L que tu nun podies saber, Delaide, fui que tubimos un nuobo aluno: ye Gaspar, de trés anhos, filho de Nuno, l nuosso artista gráfico, i armano de Burtelameu que naciu hai solo 15 dies i que Gaspar mos dixo que se porta mui bien.
Yá bés cumo son las cousas. Inda te cuntaba mais, mas yá bou cheno de suonho i possiblemente outros l fazeran. Mira tu que Emmanuelle até cumbidou dous franceses i ua francesa que eilhi stában a trabalhar i al fin de la cena yá íban meio mirandeses.
Si mos rimos mesmo mjuito, demos diplomas, batimos palmas i dezi-mos, oupindo ls copos, «d'hoije nun anho'.
Yá bés cousas que nien tartes nien bolhos de choquelate le chégan als carcanhales.

beisicos,
A.

vintage disse...

Sábado, na Estação de Sendim, limpeza e jogos tradicionais à tarde, cinema ao ar livre à noite.


http://www.youtube.com/watch?v=k4wdBrFB9T8

http://www.youtube.com/watch?v=ZzTA4-WIIiI&feature=related
http://www.youtube.com/watch?v=3FbU6307Dmg&feature=related

http://www.youtube.com/watch?v=CbnR9EKqUBI&feature=related

http://www.youtube.com/watch?v=H9c7ayl_xxQ&feature=related

http://pareescuteolhedoc.blogspot.com/


Divulga e aparece.

Adelaide Monteiro disse...

Mais buono que choquelate, dizes bien!Ls quemidos nunca ténen amportança ne l meio de todo aquilho que acuntece ne las amisades, ye solo un modo de ajuntamiento.
You tamien quiero un diploma!
Nuno, parbienes pulas tues fronças i que médren saludables.

Beisicos

ACangueiro disse...

Nun sei cumo faziste mas l tou sprito zapartou-se de teu cuorpo que zombou l mar i bolou a spirolhar mas solo miraste ls bolhos de bacalhau, la pinga de la lhéngua i outras cousas mais, nun sei se ls spritos saliban...mas foi buono i sentiu-se la falta de tues risadas i cuntina a ser marota i a dezir baboseiras de tu boca que dezi-las cun la boca de outros yé mais fácil i l problema yé quando son realidades...

un beiso i cuidado cun ls saldones,

antónio

Fir disse...

Buonas tardes Delaide,

you, quando li l buosso testo, yá nun l li bien. La culpa ye de l bino mirandés que l nuosso amigo Antonho lhebou :-)

Puis yá me lhembro de las nuossas cumbersas. Foi ua bela cena, sin senhor.

Besos,
F.

Adelaide Monteiro disse...

Fir,

Que bien que l mirandés haba criado assi amisades!
Todo ye buono an mirandés, até l bino!
Antonho,
L sprito si se bában, nó cun ls pasteles i l bino, isso ye cun l guloso de l cuorpo; bában-se cun l que bében an amisades nacidas de cousas simples i zantressadas.

Beisicos para dambos a dous.

Delaidica