07/06/10

Trés anhos i 1.696 'post' apuis



Faç hoije trés anhos que ampecemos este blogue. Trés anhos chenos de scrita, de eideias, de dibersidade, de eimaiges, de sfuorço de muita giente. Un riu que nun para de correr i que nunca deixou de traier cada beç mais giente pa la quadrilha. L 1º testo eiqui screbido acababa assi: ... ye este mais un ampeço, ua pequeinha arble ne l brosque de la lhéngua mirandesa. Que muita frol eiqui naça, froles guapas capazes de benir a dar buonos fruitos. I de berdade la pequeinha arble creciu i stá cun gana de crecer muito mais i guapas froles sien cuonta.


Bamos a cuntinar. Solo quiero pedir a cada eilemiento de la quadrilha que tenemos de alhargar l númaro de ls que acá scríben. De modo que teneis mano para poder cumbidar quien quejirdes. Esse ye l modo de l frolesmirandeses mos cuntinar a dar ls buonos dies todas las manhanas i a lhebar l mirandés i ls mirandeses a todo mundo i a todo l mundo.
Parabienes a toda la quadrilha i bien háiades.

2 comentários:

Scalhabrés disse...

Ye un gusto fazer parte desta quadrilha, inda que ambergunhado. Cul tiempo i cun bagar hei-de partecipar inda mais, a ber se esta caminada anfenita de l mirandés nun mingua, antes pul cuntrairo a ber se crece siempre un cachico.

faustino.antao disse...

-Buona fui l'eideia, buona fui la hora, buono ten sido todo l que eiqui se screbuiu i liu.

-You por mi falo, nun sei l que tenie sido estes trés anhos sien este sítio, mas sei que nun éran la mesma cousa.

-Fui eiqui que ancuontrei muitos amigos, muita lhigaçon a la scrita i cultura mirandesa.

-Ganhou to l mundo, ls que screbírun i lírun, ganhou la lhéngua porque eiqui se spreguiçou i zangaranhiu.

-Fúrun muitos ls ansinamientos trasmitidos atrabeç deste Blog, fúrun muitas las amboras que passemos als outros, fui un bun baraço que mos atou a esta causa quemun a todos nós, la cultura.

-Tamien eiqui deixo ls parabienes a to la quadrilha de cronistas, poetas i comentadores.

-Fuorça que palantre ye l camino.

Un abraço arrochado a todos.

Faustino Antão