23/06/09

San Juan an Paris



Yá alhá stamos pula nuite de San Juan. Dou-me la gana de salir a dar ua bultica. Sali solo que l rapaç cun quien moro nun gusta muito de salir. Ye pena, bibe más cula terbizon de cun la berdadeira bida i hoije al canal seis daba "las ties zasperadas", por isso...
Daba-me la gana de falar cun dalgun, d'ir por ende, i chalrar dalgo. Gusterie de star cun al miu amiyo Raul, de falar d'antenas i de rádios, de la lhiengua Basca i de la sue bida an Donostia. Gusterie de star cun Oscar pula sierra, n'alto la Lhuç i ber tode'los pobos dal Praino, dal nuosso recanto anté Bregáncia. De birar la cabeça i de ber la Sierra la Queluobra qu'agora parece un pinho de Natal culas lhuzes, Mobeiros, Bobineira, Arzelheira, Alcanhiças. D'ancarrapitar na chaça i d'ir a pinchar pula tierra de las eigreijas...



San Juan por ende



Gusterie de star cun Tiago, Felipe, Patrícia, Ana Rita, Dabide, Sandra i mas outros pulas rugas de la Ribeira, martielho a la mano. D'andar naquel mobimiento a berar las ganas que un ten de bibir. I d'andar a las chancadas antre copos i chalras cun uns i outros anté l fin de la nuite.
Mas nun fui assi i sbarrei-me an frente un bar Pertués. Stában alhá uns poucos. Uns cinco a quemer dalgo que parecie ser de Mc Donald, dous a jogar las cartas i un tiu a ralhar un rapazico que falaba muito. Sentei-me afuora c'un café i un Porto dal "velhote", nunca ll habie porbado esse, i ye bien buono.
Fui assi qu'ampecei a falar cul rapazico qu'eilhi staba. Andaba a brincar c'uns papeles a dezir que multaba los carros, el tamien buscaba jóldia, algo cume you tamien. Assi falemos i dixo-me qu'eirie pra Bregancia i Mogadouro nessas bacanças de Brano. Ye de la frunteira de la nuossa tierra pensei you.
Faltaba-me checolate pra quemer cul Porto. El tenie assi un gustico a morango, i acho qu'un cachico de checolate preto nun serie nada mal. Dende pensei an mui abó de Cicuiro que nun gustaba de checolate Spanhol, dezie que sabie a teilha. I un die merquei ua pasta dessas an Mobeiros i percebie mui bien lo qu'el crie dezir; yera teilha mesmo!
Scribo, scribo, mas tengo d'ir pa la tarimba. Manhana ye die de çacho cume diç Dalfin, i pra más tengo de tratar duas chuchices pr'ancuntrar un piso. Ala, bun San Juan cumpanheiros!



6 comentários:

Tiégui disse...

Nun sei quien fui. Mas gracias pur haber amanhado al testo. You nun sei purquei mas siempre aparece mal antrejeitado :( Hiii ! I los labels aqueilhes siempre los squeço haha

Ana disse...

Ye guapo esse retrato, Tiegui. L moço sós tu, nun sós ? Adonde fui que saqueste l retrato ? (Sabes que bibi seis anhos an Paris)
Tamien te quiero dar ua anformaçon mas queda mais para la fin de l die.
Tengo ua filha que sabe que ampeçorun hoije ls saldos i de momento até se morrie se nun fússemos a ber i a spurmentar farrapos ! Que bida !

Tiégui disse...

:))) Si sou you. Saquei-lo onte a la nuite pur tras la "grande arche de la Défense", an frente d'un de los predius de la Total. Traio ende ua camisola de "Cicouro" que fai reclame de la Super Bock.

Seis anhos ! Hui ! Spero nun bibir eiqui tanto tiempo !

Farrapos ! Si si bida de ties :))) Anton hoije son los çcuontos ? Ya se splica anton purquei habie tantas moças an Jussieu. You bengo agora d'alha que fui a mercar al lhibro "Portugal Bilingue", ya falarei del purque merece. I acunteciu-me ua que ten graça quando paguei que so a mie acuntece, mas queda tamien pra lhougo.

Ana disse...

Biba outra beç, Thierry,

La Grande Arche de la Défense ye un monumiento que fui einougurado an 1989 i na altura yá fazie dous anhos que yá nun moraba na capital. Fúrun seis anhos mui amportantes i positibos a todos ls puntos de bista. Eimagina que un die até almorcei an casa de la família de Carla Bruni (atualmiente tamien Sarkosy) que na altura tenie pouco mais de binte anhos !
I stá a trabalhar zde hai mais de binte anhos agora an casa deilhes ua cunhada mie que ye bezina an Sendin de Amadeu. Yá biste cumo l mundo ye pequeinho !

Mas faziste bien de falar desse lhibro « Portugal bilingue » porque yá nun me lhembraba que nun hai muito me mandórun la notícia de l salimiento desse lhibro que tenemos que ler, nun hai dúbeda.

L’anformaçon que te querie dar diç respeito a un conjunto de dous DBDs an eidiçon bilingue (pertués i francés) cul títalo de « Gente do Salto » (Nun sei se yá cunheces esses decumientos) que salírun an 2005 i que fúrun feitos pul rializador tamien lusodecendiente José Vieira que por acaso tamien cheguei a cunhecer quandei andei an Paris. Cunta esse rializador l que bibiu quando bino pa la França, na region parisiana, an 1965, quando tenie uns 7 anhos.
Para rializar esses dous DBDs serbiu-se de çtemunhos mas fizo tamien un trabalho de ambestigaçon de grande culidade, indo a saber de artigos de jornales eiditados nessa eipoca cumo tamien de eimages de bárias ouriges : retratos, filmes i reportaiges que passórun na telebison ou fúrun rializados nessa eipoca.

Acunselho-te tamien, Thierry, esse conjunto de DBDs eiditado por La Huit Production (Cunsegues las refréncias eisatas pula anternete), sabendo que l 2do DBD baseia-se subretodo mas de maneira tamien magistral ne l çtemunho dua pessona que preferiu desertar para nun fazer la guerra quelonial i eimigrou cun mais outros dous cumpanheiros clandestinamiente pa la França (i splícan porquei la França precisamiente).

Buonas nuites, Thierry, i buona cuntinaçon por essas tierras de la capital.

franciscobelharino disse...

Buonas nuites Tiégui,

Guapo testo este Tiégui. Beio que tamien dizes ruga i nun rue, ye assi que dízen an Cucuiro?
Parabienes i un grande abraço,

Francisco

Tiégui disse...

Buones dies !

I oubrigado tie Ana pulas referenças. Nal que you sei an Burdeos nun fui assi tan miserable, pul menos pra mius pais que chegorun eiqui an 71-72.
Eilhes ya tenien cuntatos de Cicuiranos i ou Samartineiros eiqui persentes, al que ajudou muito. You acho qu'eilhes tubirun muita suorte, siempre stubieren an casa de giente mui buona. I quando mie mai chegou la purmeira cousa fui qu'essa giente l'ansinou a falar frances ya screbir tamien. Ye ancrible mais eilhes nun tenen niun sutaque purtués quando falan an francés, proba que tubirun buns pursores !

Heeeiiii, ua sandinesa a trabalhar pr'al persidiente ! Caracho ! Esses sandineses nun andan c'un qualquiera :)))

Tengo de screbir dalgo suobre al lhibro de Michel Cahen porque ten muita cousa, historica i politico-social que merece dibulgar. I pra mas, esse lhibro ye pur anquanto l'unico que you saba qu'arrapanha tanta referença suobre la nuossa storia; d'antanho anté hoije.


Pra tiu Francisco :

An Cicuiro nun se diç ruga, mas you sou traçado samartineiro i eilhi si se diç.

An Cicuiro i Custantin dezimos "rua", mas se la rua fur pequeinha anton dezimos "ruguita" (i no "ruica", "ruyita" ou "ruyica" cum se puoderie pensar).