23/06/09

San Juan








Nun sendo un Santo Padroneiro que se festeie nas nuossas aldés, cumo era l Santo Antonho, quiero solo prestá-le houmenaige bisto haber muitos anhos que bibo na cidade que l festeia.
Anque seia l padroneiro de muitas tierras, na nuite de San Juan, la cidade de l Porto ye la que mais l festeia. Na nuite de 23 para 24 de Júnio, nun hai portuense que quede an casa. Nas rues ls foliones passéian l alho-porro , ls martielhos de plástico, cómpran l manjerico i cómen sardina assada.
Ye este l sprito folion de l pobo que percuorre las rues de l Porto.
Deixo-bos eiqui alguas quadras populares, dedicadas a este santo:


Ye nuite de San Juan!
I an cada rue modesta
Cada cachico de suolo
Ye un cachico de fiesta

Nuite de grande folia
La nuite de San Juan
Por todas las rues de l Porto
manténen biba la tradiçon

La tue saia an balon
Quando beilas chube tanto!
Que quien ben al San Juan
Yá nien quier saber de l santo

Nesta nuite hai sardinada
Cumo manda la tradicion
cun alho porro i manjerico
se festeia l San Juan

Cun ls amigos bou festiar,
Bou comer sardina assada
Bou botar foguetes al aire
I beilar pula madrugada

San Juan pra ber las moças,
Fizo ua fuonte de prata.
Las moças nun ban a la fuonte,
San Juan to se mata.




3 comentários:

ACangueiro disse...

Guapos bersos!

San Antonho i San Juan
son dous maroteiros
l que mais le gostaba
era las rapazas als bolteios.

Almendra disse...

Arrebençoada Eisilda, que bien scribes. Falo cun muita giente, todos ls dies, pul Praino i son pessonas cumo tu i Dlaide i Faustino i ACangueiro i José Esteves i ls moços de Fuote Aldé i tantos que scríben por tanto sitio l mirandés, de l pobo i pal pobo, que faç la giente tener spráncia. La nuossa lhéngua stá biba, essa ye la mie maior alegrie. Toda la bida fui lhéngua de l pobo i ye del que ten que ser.

Isilda disse...

Buonos dies amigo Almendra.

Sou you que agradeço por bos tener ancontrado, percipalmente a Faustino por me tener metido nestas andaças i tamien a Amadiu Ferreira por me tener feito tan amabél cumbite que ye poder screbir nas Froles Mirandesas.
Supongo que stamos ne l meio dua puonte, yá nun podemos recular. Tenemos de seguir este camino que ampeçamos i durante la caminada lhebar to la giente que ancontremos . Stou an crer que inda seremos muitos i, cula ajuda de todos, mui habemos de daprender .
Saludos,
Eisilda