11/06/09

Ouropeias 2009

Botar an eileiçones ouropeias nun ye nada fácele. Botar debe ser un ato de cuncéncia an que debemos oulhar al miesmo tiempo pa l passado, pa l persente i pa l feturo. Ó seia, abaluamos la prestaçon que cada partido tubo i a partir dende decedimos a quien cunfiar (ó an quien çcunfiar menos) ne ls próssimos anhos. Claro que, a las bezes hai partidos sin passado na corrida. Mas tamien eiqui, tenemos que acumparar las sues perpuostas cul passado de ls outros partidos i tomar ua decison.
An eleiçones ouropeias ye defícele fazer esta abaluaçon, porque nun tenemos todos ls dados. Ye muito ralo bermos debates de l Parlamiento Ouropeu na telbison (a nun ser que haba scándalos, cumo daqueilha beç an que un eidiota que dá pul nome de Sílvio Berlusconi chamou nazi a un ourodeputado alman), ye muito ralo çcutir-se la Ouropa ne ls jornales, ó adonde quier que seia. Claro que se fala subre temas cumo l Tratado de Lisboua, ls referendos, algues diretibas ouropeias, la prestaçon de Barroso, mas la berdade ye que nun fazemos eideia daqueilho que ls ourodeputados que eilegemos ándan alhá a fazer.
La única seluçon que mos resta ye botar pa l Parlamento Ouropeu, abaluando aqueilho que ls partidos fázen por acá (no goberno, na Assemblé de la República ó até an uorganos munecipales).
Claro que la campanha eleitoral tamien nun ajudou. Falou-se pouco na Ouropa i praticamente nun se falou nada subre aqueilho que ls ourodeputados pertueses andubírun a fazer ne ls últimos cinco anhos. Al alrobés, todos ousórun las Ouropeias cumo las primárias de las lhegilatibas. Pior que todo esso fui la forma cumo mos tratórun. Talbeç porque las eileiçones fúrun tan acerca de l Die de ls Ninos, ls políticos falórun cumo se todos fússemos uas crianças que nun anténden nada i l Partido Socialista até scolhiu un cabeça de lista aparecido cul abó Cantigas (çculpai la piada batida, mas nun le cunsegui resistir). L Partido Socialista fui quien lhebou las eileiçones menos a sério, até puso nas listas ua pessona que apuis se candidatará a la Cámara de l Porto.
Subre ls resultados, eilhes fálan por si. La grande bitória fui, tal cumo se prebie, de la abstençon. Inda que you ache que la abstençon nunca ye buona, nun la podemos splicar solo cun la eirrepunsablidade de ls eileitores. Algues pessonas nun botárun porque stában loinge de las fraguesies adonde bótan. I esto ye stúpido. Se habie cumputadores para dezir adonde cada un de nós debe botar, yá debie ser possible ua pessona botar an qualquiera sede de fraguesie, rejistando-se anton que essa pessona yá botou, para que eilha nun botasse bárias bezes. Houbo quien nun botasse, porque staba a trabalhar. Houbo tamien la abstençon de protesto. I claro, la abstençon eirrepunsable. Só nun antendo porque ye que Paulo Rangel quedou tan oufendido por naide de l PS le telfonar a felcitá-lo pul resultado. Nun fui el que ganhou. Se houbisse ua sede de la abstençon, tengo la certeza que Sócrates i Vital Moreira tenerien lhigado.
L triste destas eileiçones ye que, al alrobés de l que questuma acuntecer, la campanha eileitoral nun acabou. Lhougo ne ls discursos, PSD i BE yá prometien nuobos cartazes (i yá ls colocaran). António Costa, persidente de la Cámara de Lisboua i feturo candidato a la mesma, nun tubo ningun pudor an aceitar l cumbite para comentar ls resultados de las Ouropeias. Ls çcursos de ls políticos, mais ua beç, nun falaran de la Ouropa, mas fúrun purparatibos pa las legislatibas. Anfeliçmente, l mesmo acunteciu cun la maiorie de ls quementários telbisibos, an que cada un falou de maneira a beneficiar l sou partido. Ye pena.
Que tengo you a dezir sobre ls resultados, sin ser parcial? Speraba ua abstençon grande, mas nun stou cuntento cun eilha. Speraba ua aprossimaçon de ls resultados antre PS e PSD, inda que nun sperasse que l PSD arrepassasse l PS (nun fui ua bitória de l PSD, mas ua derrota de l PS, que scolhiu mui mal l cabeça de lista, até parecie que querie perder). Quedei cuntento por l BE i la CDU tenéren, juntos, quaije tantos botos cumo l PS el solo. Tengo pena que, na maiorie de ls países ouropeus, la dreita tenga ganho. Lhamento l feito de cuntinarmos a tener l lacaio de W. Bush cumo presidente de la Comisson Ouropeia (Cavaco Silva diç que nun eimagina nada melhor para Pertual, mas yá todos sabemos que l home nun ten grande eimaginaçon). Subretodo, fiquei preocupado cun la subida de la Strema Direita nalguns países, cunsequéncia direta de la abstençon. Hai eiqui ua lhiçon a retener: quando las pessonas nun bótan, stan-le a dar poder a quien nun gusta nada de Democracie.

Sem comentários: