17/06/09

Tierra abençonada






Hai quien diga que quando un mirandés se muorrie i iba pa l paraiso nun stranhaba nada.

Porque na sue tierra habie todo de buono, fartura i lhibardade, la sue giente ye la mais spitaleira, capaç de botar ua mano quando i a quien mais precisar. L termo ye rico, daba-le l pan i las colheitas pa tener un bun cebado, respiraba l aire lhimpo i puro de l praino.

Por esso quando un mirandés s’íba desta para melhor, i só aqueilhes que íban adreito al cielo ye que nun ponien ls pies ne l paraíso, sentien-se cumo an sue casa.
Naide me l dixo, mas tamien alhá ne l paraíso la chabe debe quedar na puorta, tamien quando ua pessona besita outra siempre se le ouferece un muordo i ua pinga, ls mais nuobos recíben de bun agrado i cun respeito ls reparos benidos de la spriéncia de ls mais bielhos, séian parientes ou nó, quando a ua familia l pan s’acaba hai ua bezina que dá ua fogaça até la próssima fornada, l pariente ampresta l banho pa l die de la bindima i la mesma alquitarra fai l’augardiente de todos.
A ser assi porquei un mirandés habie de stranhar la demuda?

Mas you digo-bos-lo quando stranha.
Quando un mirandés yá nun bibe alhá hai muitos anhos i todos essas seinhas i reglas de buossa bezinança i cunfiança nun ancuntra, son assi a modos de cousas que yá fúrun, cousas doutros tiempos, cousas que até quédan mal agora, pochas cumo maçanas caídas ne l chano, cumo nabina que perdiu la balidade. Quando bibe nua tierra sien marcos adonde quienquiera fai lei cumo cardos i spineiros nun scadal, quando la zoumanizaçon tomou cunta de todo, la regla maior ye ser purmeiro mesmo que seia ancarrapitado ne l sou melhor camarada, quando l trabalho, dedicaçon i eiducaçon nun son lhebados an cunta i l que cunta ye l’asparecéncia nien que esso seia tan malo i tan feio cumo un arremedo.

Cumo nanhua suorte dá bun pan se nun fur bien relbada, bimada, stercada i arricada, tamien nanhua tierra ye paraíso sien giente sana. A eilhas se ten de botar las culpas ou dar agabones se l merecíren.

1 comentário:

Isilda disse...

Oulá amigo Faustino,

Gusto de la horta que ne ls mostras, ls freijones de staca stan frodosos, las cebolhas ténen yá uas purretas bien grandes anfin, tenho suidades dessa paisaige!
Agora, esse guapo paraíso de que fala deixou de eisistir hai mui tiempo nas nuossas tierras, anfelizmente.
La purmeira beç que cheguei al Porto, tube suidades de l paraiso que dexei. Hoije, quando regresso a la mie pequeinha aldé, tengo suidades de l paraiso que ya nun eisiste.
Mudórun-se ls tiempos i mudórun las pessonas!

Um abraço
Isilda