19/06/09

"Un paraíso", datrás : las aldés de l Nordeste trasmuntano ?



Quije tamien dar la mie oupenion a Foustino Anton depuis de haber lido i tornado a ler cun muito antresse l sou redadeiro testo que aqui publicou, i afinal saliu-me esto :


Hai dies, oubi miu pai cun 70 anhos i yá reformado dezir aqui an França adonde até agora preferiu siempre quedar: « Debo todo a la França anque tamien aqui me tenga fartado de trabalhar. Mas suidades de Pertual, porquei ? Inda m’alhembro quando sali dalhá cun mais outros : cheno de fame, uns até sien saber ler, oubrigados quaije todos de ir a saber an tierras strangeiras aqueilho que nun ancuntrábamos ne l nuosso própio paíç ! ».


Quanto a mie mai que tenie uns 24 anhos quando acabemos tamien por eimigrar cun eilha , l die an que pula purmeira beç biu correr auga (i tamien auga caliente), nua torneira, sien tener que ir a saber deilha fuora de casa i carregar cántaros ou feixes de leinha a las cuostas cumo habie sido siempre l caso an Pertual zde pequeinha, quedou cula sensaçon que talbeç tubisse chegado por acaso al Paraíso…


Mas subre este tema, de certeza que inda haberá muito que dezir.




9 comentários:

Almendra disse...

Si era bien triste la bida d'atrás i mesmo an Francia onde por acaso you bibi ne l anho de 1963 i nun tenie tamien auga frie an casa, quantos mais caliente. Dromiemos nua cama cinco pessonas, dous cun la cabeça para un lado i trés para l'outro. Ls pies nun cheirában mui mal porque nun mos amportabamos de ls labar an auga frie. I esto an Saint Denis ne ls alredores de la capital de las luzes.
An 1965 tamien teniemos que poner l'auga al Sol, ne ls dies frius, para podermos labar la cara.
Cumo demudou la bida.

Ana disse...

You tamien sei (porque li i m’anformei i tamien porque bi culs mius própios uolhos) que mais dun pertués chegou a bibir até miserablemiente i talbeç mais inda do que noutros sítios, ne ls « bairros de lata » (an francés: bidonvilles) que houbo ne ls alredores de Paris, ne ls anhos 60: St Denis mas tamien Nanterre i Champigny-sur-Marne para citar solo estes trés. Mas se muitos cumpatriotas, miles deilhes, chegórun al punto de se sujeitar noutro país a cundiçones que tamien eran defíceles (nun ye l cuntrairo assi i todo que dou a atender neste testo que redigi cumo repuosta a Foustino), qual anton la rezon ?
Oubrigatoriamente melhores cundiçones de bida assi i todo ou anton la sprança de cunseguir aqueilho que an Pertual, zde hai muitos anhos, parecie ampossible atingir.
Nun sou you que ambento todo esto ; de la mesma maneira que tamien nun ambentei l que dixo por eisemplo miu pai, hai dies, al punto de até me surprender a mi.
Talbeç tubisse bastado que l país adonde inda nacimos todos le tubisse dado a eilhes que tamien andórun na scuola la possibilidade de cunseguir mais que ounicamente la quarta classe…
Chega un punto an que debe de ser ampossible pedir l ampossible a quien nun merecie i por isso mesmo cuntino a pensar que anfeliçmente nun era l « paraíso », nó, datrás, nas nuossas aldés trasmuntanas ; i para que hoije esso seia possible hai que ser capaç tamien de ber todo (i nó ounicamente uns aspetos i solo uns) se nun queremos que nuobos erros se repítan.

Almendra disse...

Tenes rezon Ana, mas nun bás a culpar a tous pais nin al tou paiç. Culpa l sistema capitalista que fizo de la Ouropa un mundo sien coraçon. Son ls paizes ricos que ténen ls anteletuales i ls ricos a bibir ua bida de fartura anquanto ls probes trabalhadores pássan fame. Splorórun ls pertueses i argelinos, apuis ls magrebinos i negros i agora ls de ls paízes de leste.
Todo ampeça a acabar i anton toca de cumbencir giente einocente para mantener ls pobos periféricos cumo criados de serbir. Hai que mirar si, mas para quien trabalha i nada ten. Para quien nun ten modos de se fazer oubir a nun ser por las manifestaçones de rue prontamente reprimidas. Hai que mirar, mas sien deixar que mos tápen ls uolhos.
Hai que querer un mundo sien amos i anternacional.
Biba!

Tiégui disse...

You nun sei Ana. A mie la França dou-me eiducaçon, mas tamien fui purque la purcurei. Tamien me dou un mal que m'iba fudendo i inda bien qu'apareciu un jurnalista an 92 a denunciar la merda que sabie tramado, se no supongo que ya nun starie hoije eiqui a screbir !

Ya ua prima mie zaparciu fai ya anhos pur causa d'ua storia meio asparecida.

Pur isso que me da siempre ganas d'ir pra Cicuiro, ya de pequeinho yera assi. Gustaba de quemer las batatas cuzidas de la caldeira de los cuchinos. Anté un die antrei an casa todo cheno de merda purque a bie andado culs cuchinos nu stierco !

An Burdeus you acho que nun fui assi, de bidon villes, habie outras cundiçones acho you, talbeç algo melhores. Los que benien pra burdeos ya sabien adonde d'ir, nun tengo la certeza que fusse assi eiqui an Paris.

You bibo al pie de Nanterre, na Defense. Se bedes isso hoije, naide dirie al que fui.

Ana disse...

Primo,

You nun bou por acaso a culpar nien a mius pais nien al miu paíç porque yá deixei de ser adoleciente hai muito tiempo.
Mas pregunte un die tamien a miu pai a quien ye que el acha que se debe de poner las culpas. Talbeç el nun tenga la sabedorie que ten, Primo, ou que tenemos nós todos que lemos este site mas l mais cierto ye que an dous segundos i sien heisitaçones ninguas el apunte l nome dun tiu…

Quien era esse tiu ? L general de Gaulle ?
Nun ye a esse tiu que miu pai bai a culpar.
L home que dirigie la França ne ls anhos 60 anque tubisse sido seriamente puosto an causa an 68 (por studantes, anteletuales !, mas rebuoltados tamien de ber an que cundiçones bibie i era tamien splorada la mano-de-obra strangeira an França) cuntinaba assi i todo cumo inda cuntina a ser respeitado porque era cunsidrado tamien cumo l lhibertador de la França contra l' oucupaçon nazi.

L tiu a quien miu pai pon sien heisitaçon las culpas i que nun cuntribuiu, nó !, para que las nuossas aldés fússen un « paraíso », penso que yá todos adebinórun quien era…

Custa assi tanto a dezir l nome ? Nun sei porquei !

Ana disse...

Thierry,

L que fazies quando eras garoto (culs cochinos), sabes que naide te acunselha tornar a fazé-lo hoije an die ? Inda nun oubiste falar dua tal gripe porcina... ?

Mira i para falar mais seriamente, subre l’eimigraçon an França i ls bairros de lata que houbo ne ls alredores de Paris ne ls quales chegórun a bibir miles de Pertueses ne ls anhos 60, acunselho-te la leitura de :

Marie-Christine Volovitch-Tavares, Portugais à Champigny : le temps des barraques, 1995, Editions Autrement.

Ye ua mina de anformaçones esse libro-decumentairo subre la eimigraçon pertuesa an França zde la 1a guerra mundial (Fui a partir dende que ampeçou a haber ua eimigraçon pertuesa que scolhie la França cumo paíç de acolhimento).

Se nun l tubisse lido, pessonalmente, esse lhibro, nun sei até se starie hoije a screbir aqui.

Ana disse...

... gripe suína...

Almendra disse...

Ana,

Sabes bien que you te antendo bien i nunca te quererei mal, mas tenemos que dezir todo sien miedo i sien pensar agradar a naide, tenemos, tu i you i todos ls demais que ber l todo i nó parte de ls porblemas para antendermos l mundo.
Qualquiera un antende que l tiu esse a que te refires ye SALAZAR. Si ye un de ls culpados, mas na purmeira grande guerra naide l coincie. El fui fruito de un polbo que mos mina hai muitos anhos.
Dizes i mui bien:
-"...i para que hoije esso seia possible hai que ser capaç tamien de ber todo (i nó ounicamente uns aspetos i solo uns) se nun queremos que nuobos erros se repítan".

franciscobelharino disse...

Buonas tardes Ana,

You acho que Faustino quando diç tierra abençonada stá a dezir que aqueilha tierra dá todo. L que acontecie nesse tiempo ye que habie pessonas a mais i tierra a menos i la fame aparciu. Assi, muitas tubírun que salir a percura de ua bida melhor. Claro que se Salazar tubisse zambolbido l ansino i criado andúsrias nun serie perciso tenermos salido dalhá i decierto haberie eibitado muito sofrimiento i la zounion de muitas familhas.