14/06/09

Ls pouliteiros de Fuonte Aldé... an representaçon an França











































"Pouliteiros de Fuonte Aldé",
Festibal de Folclore, Toulouse (França),
3 de Maio de 2009.

Calhou star persente quando ls Pouliteiros de Fuonte Aldé partecipórun nun festibal de folclore, hai dies an Toulouse, acerca donde moro, ne l Sul de la França.

L público quedou ancantado i tamien surprendido cun todas las acrobacies que fúrun capazes de fazer i houbo até un de ls pouliteiros que apersentou l grupo cumo tamien la nuossa Lhéngua c'un guapo çcurso… an Mirandés, mius Amigos !
De certeza que la Bice-Cónsul de Pertual que tamien alhá staba a assistir (i que ye d'ourige algarbie, diga-se de passaige) les habie dito : « Caros Moços, tendes aqui na sala, pessonas que bos quieren tamien oubir falar Mirandés ! Yá me dezírun que ye la segunda lhéngua oufecial de Pertual ! »
Depuis, na fin de l spetáclo, ua amiga mie (eilha a 100% francesa !) diç-me assi : « Carai! Que guapos i biriles son esses pouliteiros ! I dezir qu’an França, yá nun hai la mesma bitalidade a nible de l folclore cumo inda hai hoije an Pertual !» (an francés: "Dis donc! Qu'est-ce qu'ils sont beaux et virils ces pouliteiros! Et dire qu'en France il n'y a plus la même vitalité au niveau du folklore comme il y a encore au Portugal")

Mirai !

Só ye pena you nun bos poder apersentar mais un retrato ne l qual you tenerie gostado quedar tamien retratada cun eilhes. Mas na fin de l spetáculo tenien priessa de se ir ambora; era Demingo i yá quaije las uito quando acabórun i inda querien biajar toda la nuite para chegar a horas ne l die seguinte al trabalho an Miranda ou a las aulas… I depuis tamien staba alhá un de ls deputados de l'Assemblé de la República eileitos puls « círculos » de la Eimigraçon assi cumo representantes associatibos cun quien tamien gostei de cumbersar …

Parece que stamos nun anho de eileiçones, nun ye berdade… ?

12 comentários:

Félç disse...

Ana: inda bien que bistes i gostestes, palabra que quedo feliç, nun solo porque ls pouliteiros son de la mie tierra mas tamien porque hai alhá mius familiares, 1 filho e 2 sobrinos.
Cumprimentos,
Félç

Unknown disse...

Ana,

Yá le dixe als pouliteiros para béren la tue reportaige i quedórun cuntentos, cumo you quedei.

Almendra

Ana disse...

Bien haia, Felç (Manuel Fernandes... se nun m'anganho),

Stou cumbencida que l público adorou.
Spero noutra oucasion tener la possiblidade de bos cunhecer melhor, que téngan chegado esses balientes pouliteiros a horas na Segunda feira cumo prebisto i que téngan tamien gustado de benir até esta region de l Sul de la França : Toulouse cumo tamien Pau afinal, cumo un deilhes inda me chegou a splicar.
Hai que ancuntrar maneira de criar mais antercámbios cumo esses.

Ua buona cuntinaçon para todos !

Ana disse...

Bien haia tamien, Primo Zé,

Ye ua buona eideia de les haber dado la ambora tamien. Bien l merécen.
Soubírun representar la Lhéngua mirandesa cumo you nun spraba : nun heisitando a falá-la i a fazer un çcurso mui antressante, sensato i bien custruído.
Fui ua grande surpresa para mi cumo para Antonho porque fui la purmeira beç que oubiemos falar Mirandés an público, aqui an França, delantre de muita giente i tamien Pertueses de bárias regiones de Pertual, por un de ls moços de l grupo (Só que nun cheguei a saber l nome) que mostrou que tenie jeito i tamien proua de falar de la sue tierra.
You ye que yá podie haber dado l’ambora i eiditado estes retratos hai mais tiempo.

Aporbeito para dezir que quando un grupo mirandés ben até esta region de l Sudoeste de la França, bonda starmos abisados. Bien mos custará nun tenermos desponibilidade para dar ua saltada tamien i fazer un relato na Anternete . Será até cun muito gusto i you até stou cumbencida que einiciatibas culturales cumo essas ten que haber mais.

Cumprimentos i bien haia mais ua beç.

Unknown disse...

Ana,

L que fizo la apresentaçon fui André Martins, filho de Norberto. Ne l Sabado stubimos ne l cuncurso de binos an Fuonte Aldé i un de ls ourganizadores ye pouliteiro i si dixe que habie stado ua sendinesa a ber. Bés cumo ye amportante screbir i falar de todo! Yá ban a ber l frolesmirandesas i yá nun se squécen de ti. Yá bou a cumbencir a André i ls outros, a screbir tamien.

Tou primo Zé

Tiégui disse...

Hahahahaha isso si ten graça ! Los de Samartino staban an Paris ! Tod'al Praino an França... pul que you beio :)

Ana disse...

Tube un ancontro onte a la tarde cula bice-cónsul, ne l Consulado de Pertual an Toulouse, i hoije tornamos-mos a ancuntrar nun jantar para quememorar l 10 de Junho.
Segundo eilha, l moço que dizo l çcurso nun fui André mas Artur…
De qualquiera maneira, manhana bou a aperponer tamien, cumo me sugeriu fazé-lo Amadeu, un artigo para l jornal Nordeste an que bou falar de la partecipaçon desses pouliteiros nesse festibal an Toulouse cumo tamien de l deseio claramiente demonstrado pul menos pul Consulado de Pertual an Toulouse de fazer cun que haba ua dinámica de antercámbios culturales inda mais amportante antre ls dous países que aqueilha que ten habido até agora.
L que quier dezir que achei esta nuossa Bice-Cónsul fui faborable a todas las einiciatibas capazes de criar laços de amizade, culturales i tamien eiquenómicos, an special cula region Midi-Pyrénées i la ária consular de Toulouse de que fázen parte 8 departamientos franceses… Ye mais, se nun m’anganho, que un país cumo la Dinamarca.

Ana disse...

... que fizo l çcurso...

Ana disse...

... mui faborable...

Unknown disse...

Quien falou fui André.

Félç disse...

...André e Artur son armanos.

Félç disse...

Artur desta beç nun fui, quedou porque tenie que trabalhar.