09/06/09

LAS NUOSSAS FROLES

Mas que froles tan pimponas
Que por to de l mundo stan
You las beio de nuite i de die
I an qualquier oucasion.

Son las froles Mirandesas
Ante na anternete stan
A cada hora i minuto
Mius uolhos a mira-las ban.

Ante na anternete eilhas stan
Bien frescas i fermosas
Misturadas cun crabos
Hai tamien tantas rosas.

Crabos i rosas juntas
Fázen todas estas belhesas
Adonde nós puodemos dezier
Las cousas mais marabelhosas.

Screbidas an Mirandés
Na segunda lhéngua oufecial
Ye la lhéngua Mirandesa
De l nuosso querido Pertual.

Cada un a la sue moda
Colga l que ten que colgar
Siempre cul oubjetibo
De la nuossa lhéngua dibulgar.

Nun l´adelantra al tal screbidor
Dezier todass asqueilhas barbadas
Que you digo-le eiqui
Que nun son cousas acabadas.

Nós sabemos qu´eilha ye lhéngua
Cun muito, muito balor
I bamos a seguir adelantre cun eilha
Diga l que diga l screbidor.

You sou quaije analfabeto
Ó analfabeto anton
Mas sei dezir-le al screbidor
Que ne l que dixo, nun ten rezon.

Bou a seguir falando
I l Miramdés a screber
Miesmo que l tal screbidor
Nun me cunsiga antender.

Tengo ourgulho de ser Mirandés
De l screbier i de l falar
Por esso senhor screbidor
Nun me ides a fázer calhar.

Cun todo l respeito
Porque screbeis an Pertués
I anton para saber-des
You respondo-bos an Mirandés

Hoije yá me quedo porqui
Çculpai senhor screbidor
I sigo cul miu Mirandés
Que ten muito, muito balor.

Inda bien que hai estas cousas
Adonde nós puodemos antrar
I destas i doutras cousas
Nós puodermos zabafar.

Ante dá para ansinhar cousas
A quien las quejier daprander
Benie eiqui senhor screbidor
Se las quejierdes saber

Son estas las froles Mirandesas
Que fázen cousas marabelhosas
Cun tan guapos crabos
I tan fermosas rosas.

Bamos alhá todos juntos
Torna-las mais marabelhosas
Para que estas nuossas froles
Quedan inda mais ermosas.

Hoije yá nun bos cunsumo mais
Çculpai alhá l brutico
Para perfumar estas froles
Queda eiqui este cheirico.

José António Esteves

5 comentários:

Ana disse...

Hai ua frescura straourdinaira ne ls sous bersos, Sr Jesé Esteves.
Que Dius le pague i le dê muita salude.

faustino.antao disse...

Oulá amigo José Esteves

Que guapos bersos estes, ye cousa bien pimpona.

Stou rendido.

Parabienes mais ua beç i que nunca bos fáten las fuorças para regar estas froles.

Un abraço
Faustino

Tiégui disse...

Nunca naide eiqui pensou an partecipar nun cuncurso Lhionés de bersos ?

Adelaide Monteiro disse...

Amigo Zé Estebes,
Ls buossos bersos enchen-mos l alma.
Que tengades muita saúde para fazer muitos.
Bien haiades,
Un beisico a bós que sodes un crabo.
Adelaide

franciscobelharino disse...

Buonas tardes José Esteves,

Cumo siempre ponistes eiqui mais uns guapos bersos. Cuntinai siempre i que essa bena pa la poesie nun se canse.
Parabienes i un abraço,

Francisco Domingues