Molhou las formigas
La chuba ne l Berano
Salírun las d´ala
A passear ne l chano
Nun se dórun cunta
Que la rapaza apareciu
Cun rateiras i pimiento
Adonde las metiu
I eilhas ne l scuro
Alhá ancerradas
Nun sabien l que fazer
Quedórun assustadas
Cun l pimiento I rateiras
Fui-se toda animada
A guardar las bacas
I arranjar frejulada
Abriu l pimiento
I las formigas gustórun
Bamos a quedar lhibres
Lhougo eilhas pensórun
Nun sabien, cuitadas
Que nua rateira
A relhuzir l sol
Acabarien spetadas
A bater las alas
L sol, assustada
Cada formiga quedaba
A spera de paixarada
La fonecra chegaba
Cun la cuquelhada
Quemie la formiga
I quedaba caçada
I la rapazica
Siempre a la spreita
Dezie: yá caiu outro,
Toda sastifeita
Iba para casa cuntenta
Cun l pimiento i la caçada
Pruista, a mostrá-la
A quien ancontraba
Se ne l Berano nun chobisse
Botaba baldos de auga
Ne l formigueiro
I speraba
Que las formigas salissen
4 comentários:
buonas tardes
Guapa cuonta ... cume acaçar tralhos i patoxas. Onde las hai para irmos a eilhas?
Abraços
Ei Boeiro,
Yá sólo hai perdales i tordos i you nun gusto nada de l sou cantar.Quando sperto cun ua bandada de perdales quedo anrezinada.
Bien mos saberie ua frejolada de fonecras gordicas cun las moras.
Bs
Buonas nuites Delaide,
Que guapos bersos subre las formigas d' ala. You apanhei muitas pa las rateiras i tenie ua cabacica cun un tapon de cortiça pa las lhebar. La cabacica tenie siempre uas barbas de milho que eilhas gustában de quemer.
Parabienes i un abraço,
Francisco Domingues
Enviar um comentário