07/06/09

Beilarinas




Naciu d´ua piedra;
Abriu-l ua brecha,
Dadonde saliu tierra.

Preinha de bida
Nasciu ua flor,
Mie armana, quelorida,
Cun mui fuorte oulor.

Burmeilha de sangre,
Relhamposa de streilha
Punírun-me-la na mano,
I nasciu un ramo deilha.

Puse ua ne l pelo
I tan anfeitada
Assi cun la flor,
Alegre a cantar,
Ancomecei a beilar.

Las outras flores
Que tamien eran papoulas,
Quejírun, fermosas,
Ne l baile entrar.

Cun las pétalas para baixo,
Fize-l saias de beilarinas,
Cun cascas de freixo,
Fize-l sabrinas.

L chasco cantou
Cun la coquelhada
I staba, deilhi a cachico
L ourquestra formada,
Ne l Rinconico.

Las flores beilarinas,
An bicos de pies,
Beilórun que nien
Berdadeiras ties.

I las checharras
Ampeçórun a cantar,
I quando se ajuntórun,
Batírun-l palmas
I tamien beilórun.

I, quando beio papoulas,
You agora, nina-tie,
Siempre se me lembra,
De l que cun eilhas fazie.

I, Çculpa-me papoulica,
You yá nun tengo eidade,
Mas quiero fazer ua monica,
Para matar la suidade

7 comentários:

faustino.antao disse...

Oulá amiga Adelaide.

Gustei muito, bien guapo

Bien haias

Beisicos

Adelaide Monteiro disse...

Las papoulas siempre fúrun i cuntinuan a ser, flores cun muito encanto i belheza. Las monicas són mágicas...
Oubrigada i beisicos para ti, Faustino.
Adelaide

Isilda disse...

Oulá amiga Adelaide.

Guapo poema, tan guapo i quelorido cumo las papoulas. I que dezir dessa guapas monicas de la nuossa anfáncia!
Beisicos.
Isilda

Adelaide Monteiro disse...

Eisilda,
Essas monicas eran más guapas que qualquiera Barbi!
Para te dezir you sólo coinci essa i las de trapos.
Bs

franciscobelharino disse...

Buonas tardes Delaide,
Guapos bersos estes subre las monicas custruídas de papoulas. Cumo éran felizes las ninas desse tiempo que fazien las sues monicas uas bezes de papoulas outras de trapos. I ls garotos que fazien ls piones de raízes de ls freznos/ freixos i carricos apuis de las mais acabar las lhinhas cun que remendában ls rasgones que nós faziemos na roupa.

Un abraço,

Francisco

Adelaide Monteiro disse...

Ye berdade, Francisco! Tenien muita magie ls nuossos pobres brinquedos i la proba ye que produzírún gente cun eimaginaçón.

Bs

Adelaide Monteiro disse...
Este comentário foi removido pelo autor.