Ls mius afazeres

L die amanheciu çcampado
Ye cedo, i l sol yá brilha
Digo buns dies quadrilha
You bou culas bacas pa l prado
Çpuis de las meter ne l cerrado
Bou pa la binha a scabar
Hai que l tiempo aporbeitar
Que hai muito que fazer
Nin dá, tiempo de quemer
Ye siempre, siempre a trabalhar

Inda tengo que ir a aricar
Que l tiempo agora stá seco
Tengo que ir a aquel beco
Que la yerba stá a medrar
Tengo you que la arrincar
Antes que ancanhe l pan
Ye agora la oucasion
Nun me puodo çcuidar
Nun sei para adonde me birar
Cun tanta cumplicaçon

Yá las huortas stan sperando
Que you las baia a lhabrar
Nun me déixan çcansar
Por esso you bou andando
Miu Dius, i para quando
Ye que you poderei parar
Tengo tanto que lhabrar
I quando ye que çcansa l rapaç
L feno yá bai capaç
Stá a pedir pa l segar.

José António Esteves