05/03/09

L bui i l mosco



Screbir mirandés, para mi, ye cumo quemer cereijas, quanto mais como, mais quiero quemer.
Ampecei cun ua cunta i bou a cuntinar, nó por mi, mas pula lhéngua.
Cun doze anhos yá tenie lido quaije todas las cuntas de Eisopo i La Fontaine i inda guardo muito librico dessas cuntas, que cumpraba cul denheiro que poupaba, al ir a pie para l liceu Camões, an Lisboua (1956-1957 -1958), an beç de ir de carreira, zde la Fuonte Luminosa.




Bui mirandés (Prado-Gaton)



Ne l cuorno dun bui pousou un mosco.
Apuis de star alhi lhargo rato, al ir-se ambora preguntou-le al bui se quedaba cuntento por l deixar.
L bui respundiu-le:
- Nin dei de cuonta que habies benido. Tampouco darei quando te baias.

Passar pula bida, sin le dar nada a la bida, ye ser ansegneficante.



4 comentários:

Adelaide Monteiro disse...

L mosquito habie de l tener dado ua mordiscada!...
Ie cumo tenermos ua pulga na cama i nun quedarmos cun ua bularda.
Acho-bos grácia, a ti i a Ana.
Bien Haias por spicaçardes las nuossas mentes.
Beisicos a ls dous. A ti Ana mando-te eiqui tamien un beisico, porque Almendra nun se ancomoda, a la cierta.
Adelaide

Unknown disse...

Oulá Dlaide,
Sabes que la mie mulher stubo a ber ls retratos que poniste ne l blog de la Speciosa?
Manda-te bejitas.
You daprendi muito culs tius bielhos, quando iba cun eilhes pal termo.
Habie un que nun querie cuntas culs curas nin cun l'Eigreija.
Un die bieno ua truniada mi grande i ampeçou a rezar "Santa Bárbara bendita..."
You siempre l dixe, mas anton acradita an Santos?!
Respundiu-me que pul si pul nó, que era melhor rezar, porque se nun habie santos, nun fazie mal, mas se por ende ls hai anton siempre adelantra algo.
Pul si pul nó, cumo nun tengo tençones de ir pal anfierno, nun me anraibo cun naide i perdono todo, mas gusto de me rir.
L pai de Ana ye miu primo carnal i mi mai era la madrina del. La ultima beç que stube acá,fui a casa del i la mai de Ana inda me oufereciu de buber i quemer. L home de Ana fui miu aluno zde la purmeira a la quarta classe.

Beisicos
Almendra

Tiégui disse...

hahahaha you beio-lo bien que ye'l bui :-))))))))) picada sta a apanhar hahaha

Adelaide Monteiro disse...

Ls dous sodes mi balientes.
Percura a la tue tie se nun gustou de la nina de l lhaço grande cumo a eilha.
Era iou.
Dá-le un beisico.
Bj
Adelaide