Cuntinaçon LS MIUS AFAZERES

Tengo que apanhar las gametas
Que yá stan na capadeira
I assi desta maneira
Tengo que porparar las setas
Las fouces stan nas gabetas
Bamos yá de camino
Ye assi l miu çtino
Sin nunca çcansar nada
Yá stá ende la segada
Bou a cumbinar cun Albino


Tenie you que ir a segar
Mas fai yá tanta calor
Lhiebo l chapéu que ye melhor
Pa la cabeça tapar
L pan tengo que apanhar
Nun adelantra you queixar-me
You querie era deitar-me
Mas la segada nun se faç sola
De ls tiempos de la scuola
Agora stou a lhembrar-me

Para quei tantos queixumes
La segada tenes que acabar
I l pan tenes que trilhar
Son assi ls questumes
Por mais cigarros que fumes
L serbício hai que fazer
Nun te puodes squecer
Que astanho ye de farturas
Se las ubas yá stan maduras
Tenes tu que ir a ber

L berano passa-se a correr
Mas nun s'acabou la canseira
Ben ende la sementeira
I tenes que la fazer
Tenes que sembrar pra colher
Ye assi siempre a andar
Nun te steias a queixar
Yá stan maduras las ubas
Toca a porparar las cubas
Que hai que las bandimar

I quando arranjo bagar
Hai que matar ls cochinos
Son estes ls mius çtinos
Siempre, siempre a trabalhar
Agora yá tengo mais bagar
Yá tengo todo arrecolhido
Mas nun puodo quedar squecido
Que yá bénen ende ls frius
Ai! la lheinha miu Dius
Que l eimbirno ye mui fodido.

José António Esteves