Rindo-bos mie houmenaije
Senhoras mulhieres tan fermosas
Por me dardes a conhecer
Las cousas mais marabelhosas
Neste die anternacional
You bos quiero felcitar
Parabienes bos quiero dar
Nun me l lhebeis a mal
Digo-bos assi tal qual
Nun scondo la mie pelaige
Por toda la buossa coraige
I tamien pul buosso saber
Por todo l que me stais a fazer
Rindo-bos mie houmenaije
Sodes las froles de la Quadrilha
Neste jardin de belheza
Ye la mulhier Mirandesa
Que an to l lhado brilha
Nun ye perciso riscar cerilha
Para bos ber marabelhosas
Siempre frescas i cheirosas
Cun tanta buntade i coraige
Rindo-bos mie houmenaige
Senhoras mulhieres tan fermosas
Stou you feliç i cuntento
Culas froles deste jardin
Ye ua alegrie para mi(n)
A todo you stou atento
A toda hora i momento
Passo porqui pra bos ber
Nun sei cumo bos agradecer
L que bós fazeis por mi(n)
Ye ua alegrie sin fin
Por me dar-des a conhecer
Las cousas que stou a ber
Assi me ajúdan a passar
L tiempo neste miu lar
Sin nada para fazer
Nun me puodo you scunder
Destas senhoras tan fermosas
Siempre tan carinhosas
Miesmo sin me conhecer
Me dan eilhas para you ber
Las cousas mais marabelhosas
José António Esteves
Lar de S. Jesé
Bumioso
Subscrever:
Enviar feedback (Atom)
3 comentários:
Caro amigo José Antonho,
Ye un gusto mui grande tener-bos a fazer parte desta quadrilha, por tan guapo bersos que ambersais. Ye ua riqueza mui grande pa la nuossa lhéngua i ua ajuda ne l nuosso die a die. Para alhá de todo esso, nas questiones de la lhéngua sodes un eisemplo para todos ls mirandeses i ye ua proua la nuossa lhéngua tener giente assi cumo bós. Tamien ye buono, cumo dezis, que la nuossa lhéngua bos ajuda a passar l tiempo, i por esso, tamien ajuda un cachico a la falcidade, seia alhá eilha l que fur.
Bien háiades por todo i nunca páredes de mos dar ls buossos bersos.
Un abraço arrochado,
Amadeu Ferreira
Tio Jantonho,
Bien háiades por estes guapos bersos, para nós, mulhieres de la quadrilha.
Beisicos
Adelaide
Buonas tardes José Antonho,
Parabienes puls guapos bersos a las ties de la quadrilha. Cumo diç Amadeu ye ua riqueza i ua suote grande tener giente cumo bós na nuossa quadrilha. Que buono ye que l mirandés bos çtraia ende ne l buosso lhar i bos ajude a passar l tiempo de ua maneira mais feliç.
Parabienes i cuntinai siempre.
Un abraço,
Francisco Domingues
Enviar um comentário