05/03/09
Que guapas balancies
Que guapas balancies
Ten aqueilha rica dama
De tanto bien que le quier
Deita-las cun eilha na cama
Ye ua classe de semiente
Que hardou de la abó deilha
Quiere-las solo para eilha
Nun quier dar deilhas a la giente
Son meio roixas na frente
Era assi que las queries
Cubre-las todos ls dies
Pa l sol nun las crestar
Diç assi quien las mirar
Que guapas balancies
Quando le passo a la puorta
Digo l que a la mente me ben
Que balancies ten
La rapaza na sue huorta
Esta fruita nun se corta
Diç cierta boç me clama
La mie fruita ten fama
Hei-de stimá-la por esso
Balancies que you cobiço
Ten aqueilha rica dama
Nun son de las mas tampranas
Mas seródias tamien non
Miu Dius cumo eilhas son
Tan guapas i tan sanas
Son ambas a dues armanas
Eisamine-las quien podir
Steia eilha adonde stubir
De cumpanha ó solica
Acarina-las cuitadica
De tanto bien que las quier
Para baixo stan de pinduradas
Ne l tronco an que nacírun
Pul muito que crecírun
Cul peso stan çcaídas
Son dues mas debedidas
Cubrindo l tronco i la rama
Ye uma fruita que se chama
L manjar de ls lambareiros
Por causa de ls ratoneiros
Deita-las cun eilha na cama
José António Esteves
Subscrever:
Enviar feedback (Atom)
4 comentários:
Buonas tardes José Antonho,
Que guapo poema este subre las balancies.
Dessa qualidade i pa l regalo de la nuossa bista bai habendo cada beç mais que se dan durante todo l anho. Parabienes i cuntinai siempre.
Un abraço,
Francisco Domingues
Buonas tardes tiu Fracisco
Passei un die destes pula huorta deilha, cumo las bi tan sanas, pus-me a majicar i fiç este poema.Inda bien que gustes-tes
Un abraço
José António Esteves
Son mesmo balancies a baler !
Mas nun deixe, tiu Zé Antonho, de mos falar tamien an nuozes ou até an cascabois.
Son fruitos mais pequerrixos que las balancies de que mos fala mas que –tal cumo las azeitunas ou las semientes de giraçol por eisemplo– se puoden smagar – cun máquinas apropiadas, claro !- até zaparcer la forma que tenien quando inda stában ne l tronco… mas cun ua buona antençon : para que sírban – mesmo que para esso seian neçairas sacadas anteiras !- para fazer ólio ou tamien azeite… para fritar patatas por eisemplo ou outras cousas.
S'inda nun comiu, tiu Zé Antonho, deseio-le bun probeito !
Buonas tardes. Desta beç fúran las balancies, doutra seran esses outros fruitos que dezies, las nuozes i ls cascabois tenen outras funçones.Quemer, quemer cumo quien diç inda nun quemie, mas yá l dei ua lhambidlica. Buona suorte para ti Ana. Beisicos
José António Esteves
Enviar um comentário