Quien ye que nun sonhou an ir un die até al Eigito ?
Para ber monumientos i tamien arte…
Nesta scultura, stá representado l dius eigício Min.
Depuis de haber ousado poner aqui l quadro de Courbet - para la defesa de la lhibardade de spresson depuis de l que acunteciu na cidade tan católica de Braga - inda teneremos que ir mais loinge: ye ou nó la sociadade (pertuesa ?*) ua sociadade falocrática ?
Ye stranho – i para mi rebelador ! –que ne l único quadro, puls bistos spuosto na capielha sistina (tamien mui católica!), que fui scolhido (esse i solo esse!) para eilustrar ua anterbençon que aqui tamien fui feita, l que podemos berificar ye que ye perciso ser ciego para nun ber que l lhugar, ou melhor la posiçon que acúpan l home i la mulhier (Adan i Eba nesse quadro) nun ye perpositadamente la mesma…
El arriba (mais acerca de Dius …)… I eilha ?
Tubo que quedar mais abaixo la cuitadica !
Ye ua bison falocrática de l mundo nas relaçones antre ls homes i las mulhieres que transparece nesse quadro spuosto ne l Baticano. Depuis, nun quedeis admirados se l papa siempre fui un home; i até Dius las mais de las bezes nas representaçones que fázen del an quaije todas las religiones an special monoteístas que conhecemos.
Mas que las cousas quéden bien claras an relaçon a mi que tamien sou ua mulhier. Puodo you parecer que sou alguien que nun bal nada i dua anteligéncia mais que anferior, mas talbeç you (cun mais outros i outras) ancontre siempre fuorças para relhembrar a mais dun (i dua ) i tamien denunciar l que acabou an muitas eras i ceblizaçones por apodrecer las nuossas sociadades houmanas… cula bençon de ua i mais outras relegiones tamien, nun tengo miedo de l dezir: l sentimiento de superioridade de l home an relaçon a la mulhier para nun falar tamien an houmilhaçon!
* I para quien nun antende porque ye que you que nien sequiera bibo de maneira permaniente an Pertual chego al punto de le dar la ampresson que stou siempre a fazer acusaçones ousando un ton que alguns anterprétan eirradamente cumo ua forma de çprézio ou de subrancerie, solo le digo esto : qual ye l problema? Teneis assi tanto miedo que bos oubrígan a pensar? Porquei?
5 comentários:
Buonos dies Ana,
Anton, la sociadade pertuesa ye esso. I la francesa, l que ye?
Amadeu
Leia bien, Amadeu !
Ye ou nó la sociadade (pertuesa ?*) ua sociedade falocrática ?
I la palabra (pertuesa) cumo puode berificar stá antre parénteses.
Puode antender esto tamien, nó ?
Buonos dies
Á Ana: sentimiento de superioridade de l home ou sentimiento de anferioridade de la mulhier?!
Nun digo que seia l causo, mas muitas bezes las ties bien gustan de se poner no papel de bítima: cai bien i stá na moda.
Cundanamos descreminaçones de "casa" i toleramos la bigamie na Ouropa cume sendo ua questión cultural!
Abraço
Cuido, Ana, que la sociadade pertuesa nun será mais ou menos que las outras qual al tema. Nesse sentido cuido que puode amalinar la çcuçon, fazer essa refréncia a la sociadade pertuesa.
Cuido que l causo de Braga se debiu a ua stupideç i por esso nun puode serbir de aliçace para ua çcuçon séria: solo de pretesto i nada mais. Bamos, antoce, a agarrar l pertesto.
Cumo sabes, hai sociadades que son falocráticas an sentido lhiteral, quier dezir, adóran l falo: por eisemplo ne l Japan fázen perciones cun el anriba dun andor, i outros causos haberá.
Tamien na tierra de Miranda i Aliste ancuntramos falos bários, de l tiempo pré-stórico que éran tenidos cumo ajuda na fertelidade, pus las pessonas atírában para alhá cun ua pedrica al passar, l mesmo se passando cun algues cruzes, que fázen las bezes. Ye ua cultura que ten miles de anhos.
L que cuido que quieres falar ye de çcriminaçon home-mulhier, mas talbeç essa nun seia la melhor maneira de agarrar las cousas, yá que l culto de l falo ou de la diusa mai, etc. stan mais lhigados al culto de la fertelidade, a la perserbaçon de la bida delantre de la muorte do que a la relaçon (de superioridade) home-mulhier.
Mas, bamos falando, cun serenidade.
Amadeu
Mantengo todo l que dixe i nun preciso nien de quemungar nien de cunsidrar que la houmilhaçon stá agora na moda. Para mi nunca stubo i nunca stará.
Solo le pregunto ua cousa a Amadeu : Braga queda an Pertual ou nó ?
I nien m'astribo a dezir cumo alguns chegórun a fazer an ciertos testos de outros blogues que tamien cheguei a ler l que la palabra « braga » quier dezir an spanhol i an eitaliano. Por ua rezon : ye que até agora ne l que me diç respeito la çcuçon nunca chegou a star amalinada cumo parece que tamien stá a « recear », Amadeu. Ye dun problema de sociadade de que quije falar an que antra tamien oubrigatoriamente l dreito i la política i nó apenas la queston de saber qual debe de ser l papel de las religiones nas nuossas sociadades de hoije.
I se nun falei you an descriminaçon mas si an houmilhaçon ye porque tamien tengo las mies rezones.
Aprefundai anton, bós tamien, la çcuçon !
Enviar um comentário