Cápia de O Silêncio das Pedras, de Abílio Pires [1995]
Hoije a la tarde stube a falar cun Abílio Pires, mirandés custantineiro, que an 1995 publicou l remanse O Silêncio das Pedras, un de ls poucos remanses screbidos por mirandeses até agora. Hai que lo dezir eiqui, ua parte amportante de l lhibro stá screbida an mirandés, nua altura an que inda nun habie Cumbençon Ourtográfica de la Lhéngua Mirandesa. Qualquiera die bai a salir ua lharga anterbista cun Abílio Pires na FUOLHA MIRANDESA, de l Jornal Nordeste, adonde se falará desso i de muitas outras cousas. Anquanto i nó, deixo eiqui la seguinte lhona, que Abílio Pires me mandou, screbida por sou punho.
Un mocico de Cércio staba na tropa nun quartel de Lisboua. Screbiu-le ua carta a sue mai i dixo-le:
- Maizica, tengo muitas ganas de bos ber, mas nun sei se nun me morrerei de friu neste eimbierno. La mie roupa anda sfarrapada i las botas yá nun ténen suola por baixo.
La mai, mui chenica de pena, cuntestou-le:
- Ai miu rico filho, roupa nun tengo you para te mandar porque eiqui nun bénden fardas, mas yá te cumprei uas botas na feira de Dues Eigreijas i bou-te-las a mandar pul telfone que passa eiqui an Cércio a camino de Miranda. Quiero que andes cun los pies bien calenticos.
Agarrou nun martielho i nun crabo i saltou las paredes de la cortina de l tiu Manuel de las Berças i achegou-se a un puosto de l telfone i spetou l prego i colgou las botas.
Passado un cachico, passou por alhá un probezico cun fame i friu, cuntentido de la bida. Antes de salir dalhi, colgou las botas bielhas no mesmo crabo i seguiu l sou camino.
Un cachico más tarde, la mai de l soldado tornou alhá. Quando biu las botas bielhas colgadas, pansou lhougo que l sou rapaç yá habie recebido las botas nuobas i que tenie mandado las botas bielhas pa la mai mandar cuncertar. Mui admirada cun estas cousas modernas, zabafou:
- Ai, balga-me Dius! Bien spierto ye l miu filho i bien rápidos son los telfones!...
Abílio Pires
(12.03.2008)
3 comentários:
Buonas nuites Amadeu,
Que guapa cuonta esta. Aposto que las botas inda fúrun mais debrebe pul talfone que agora ye l' anternet.
Parabienes, al Cunstantineiro Abílio Pires pul sou Remanse.
Un abraço,
Francisco Domingues
buonas tarde tiu Amadeu
Por ler esta cuonta que ye deberas angraçada, lhembrei-me you de outra parecida que passo a cuntar.
Faç yá alguns anhos, inda las pitas andabam pur las rues, ua tie de Dues Eigreijas a quien le chamaban tie Bicha, agarrou boleia nun caminhon de un amigo i conhecido, de Miranda para la sue tierra. Ua beç eiqui chegados, l choufer parou a la borda de la casa deilha para la tie se abeixa-se.
Ora andaban uas pitas por alhi a scarbar i quando l'home trabou, como ls trabones de ls caminhones son assistidos a aire i fazen aquel bruido "vvvvvchhhhhhhhhh" a l çcomprimir, las pitas, stais a ber,zapareciran scacareando e sbolaciando por la rue afuora, e diç la tie mui admirada: Mirai como stá abançada la cência, agora anté ls carros tenen arrucha pitas.
Un abraço
Félç
Yá me ri culas dues stórias.
Un chi
A.
Enviar um comentário