Eimoçones - L Amor

L amor ye ua eimoçon «serbida caliente» al alrobés de la bingança que se sirbe «frie». Yá l pobo diç “quien l feio ama guapo le parece”. I nun ye que ye berdade!? Solo quando l deixamos (l amor ) ir ambora ye que bemos ls defeiticos todos de la pessona que yá nun amamos tanto. Si, porque l amor ye ua cousa mui delicada, ye cumo se fura de bidro de “MURANO”. L amor nun gusta de ser squecido, amaldicionado nien çpreziado.
L amor ye la «eimoçon mãi», puis cun eilha bíben: la aceitaçon, la amisade, la cunfiança, la bundade, la afenidade, la deboçon, la adoraçon, la facinaçon i l ágape. Ye por esto que tenemos bários tipos de Amor:
- l amor eirótico ye defrente de l romántico i de l apaixonado;
- l amor lúdico ye como se fura um jogo – solo para passar un berano, ou un ambierno;
- l amor amplícito que ten por lastro la amisade;
- l amor oubessessibo i maníaco, que amplica la dependéncia i la puosse;
- l amor pragmático, cun modos mui práticos;
- L amor ágape que ye quaije una deboçon i antrega ancundicional.
Poderiemos anton dezir que todo ye Amor, berdade. Mas, anton, qual ye la defrença antre «AMO-TE» i «Gusto de ti»?
Amo-te ye mais antenso, eisige paixon i tendéncia para passar muito tempo a mirar un ls olhos de l outro i fai quelubrinas na spinha. Mas cumo las outras eimoçones hai que l gerir, anque pareça ua cousa sein jeito, autocuntrolar ua cousa tan buona. Ye este autocuntrole que torna l Amor ua de las eimoçones mais amportantes de la nuossa bida. Sien Amor nun se bibe , subrebibe-se.
L amor ne l die em que mos casamos ten ua medida. You comparo-la a un copo de quartilho, chenico de auga lhimpa i sabor a mosto. Quaije naide mira bien para l copo, que ten un defeitico por baixo, un buraco pequeinho por adonde todos ls dies deixa arramar ua pinga. Ye obrigaçon de quien se casou ”por amor” acrecentá-lo todos los dies, mas quaije siempre mos squecemos.
I quando mos ben a la lhembrança?
Ne l die an que la amor ampeça a tembrar de las piernas, hai que anchir l copo, mas cun receita, se arrama ua pinga ponemos trés. Se furmos capazes de l bulber a anchir todo bien, l amor benciu. Se por causo nun tubirmos coraige i fourça para esso, anton l concho de l copo ampeça a tener cousas malas: rábia, sufrimiento, çprézio.
L amor puro ye l que sentimos puls filhos. Ye dua antrega total i ancundicional. Ua MAI, un PAI puoden pensar que stan cun raiba dun filho, mas bonda un chi coração, um beisico i lhougo l carambelo de la raiba se derretiu.
L amor puls Pais deberie ser tambien assi, mas muitas son las bezes que aqueilhes que mos amórun tan zantressadamente i que nos dórun todo l que tenien, son na fin de la bidsa un strobilho pa ls filhos. Na berdade, l que eilhes son ye ua fuonte de saber benida cun la spriéncia de bida, lhibros screbidos solo an sues cabeças (achegai-bos, filhos i nietos, hoije, scuitai que manhana yá puode ser tarde).
Nun ye preciso andar a to la hora a dezir “Amo-te” ou “Gusto muito de ti” mas se calhar dezir-lo todas las semanas yá era buono. Cumo an todo, las falas nun berbales son fundamentales, la fala “gestual” ye de todo l mundo,”ounibersal”. Quereis ber? Se stás na praia, apanha ua charrasca, abre la mano de l tou amor i debagarico pousa-la alhá. Se stás ne l Praino apanha ua flor de mango ou de patalhobos ou ua de xara, partilha l cheiro de la flor que apanheste cun quien amas. Si, i apuis? Quedemos tranquilos, l demais benirá sien demoras.

“L amor ye grande i cabe nesta jinela subre l mar.
L mar ye grande i cabe na cama i ne l xaragon de amar.
L amor ye grande i cabe ne l cúrtio spácio de beisar”.
(Traduzido de Carlos Drummond de Andrade)

12 de Setembro de 2009.
Francisca Carvalhal

Eimoçones - la alegrie

L lhado dreito de l nuosso cérebro ye repunsable pulas eimoçones, pula criatebidade, pula capacidade de aceitarmos pessonas i formas de bida deferentes de la nuossa. Bibir las eimoçones de forma temprada ye hoje considrado un modo cierto de bibirmos ua bida chena.
Las pessonas que meio cun çprézio dízen “sós mui eimotibo” ou “esso nun ye racional”, amóstran bien de la atitude i de l pensamiento oucidental que todo adominou zde hai muitos seclos até al ampeço de l seclo binte, al jeito de ls cunceitos científicos ousados naquel tiempo, segundo ls quales la lógica bundaba para antender todo l Ouniberso. Las eimoçones fúrun siempre bistas cumo un strobilho, cousas de mulhieres ou de pessonas un cachico boubas.
Hoije yá sabemos que nun ye nada assi. Stamos ne l berano, tiempo de sol, férias i de partilha. Neste cuntesto, la eimoçon mais bibida ye la alegrie. Inda bien que assi ye, puis eilha ye eissencial para bibir. Por bias deilha ponemos las eimoçones a bulhir, que mos lhieban a sermos pessonas mais buonas, a quedarmos bien cun la bida.
La autostima ye l autoconhecimento quédan a un bun nible se la alegrie stubir an nós i trair cun eilha la sue família mais cercana: la felcidade, l alíbio, l cuntentamiento, la sastifaçon, l adbertimiento, l agrado, la ouforie, l bun houmor, l antusiasmo, l prazer sensual - somos ampurrados a fazer cousas nuobas ou las bielhas cousas bibidas dun mudo mais ameroso, ancuntramos belheza adonde antes nunca la habiemos bido, inda que eilha ya stubisse alhá.
L ser houmano ten dous modos de sentir i bibir la alegrie:
- la alegrie passiba, un sentimiento de tranquilidade, de cuntantameinto, cun las circunstanças de la bida, que ye founte de agrado i que deseia quedar para siempre;
- la alegrie atiba, que se çtingue de la outra por tener neilha un deseio mui fuorte de partilha de l sentimiento cun las pessonas i cun l meio ambiente que mos ambuolbe.
La alegrie puode lhebar-mos a la dança, al mobimento, a la renobaçon pul cantar, a la meditaçon, a ser capaç de resolber cunflitos i tensiones, a tenermos capacidade de oubir l silenço i cun el daprandermos que la bida sien alegrie nun ye bida, mas solo un modo de deixar l tiempo passar por nós, cumo se fúramos canhonas amadornadas ne l stio, a la spera que la calor se baia ambora.

“Quien perde denheiro perde muito,
Quien perde un amigo perde mais,
Mas quien perde la alegrie perde todo.”