Cabras

L pobo diç: quando l ouro antra pula puorta la fé i la bergonha sálen pula jinela

I tamien l pobo nun nega que quando la calentura, rojura benida de las brasas de l lhume ou braseiro antra por ambaixo de las saias de las ties fai cabras nas piernas.

Porque naide registe ne ls eimbiernos a tanto friu sien se calcer durante ls seranos i mesmo durante ls dies quando eilhes son frius i l airico corta cumo se fusse ua nabalha. 

Bota gelo i carambelo que demuda la bida de las pessonas.

Tal cumo mos dízen las amboras d’hoije (ne l die que está este testo a ser publicado) que, las carreiras na capital de l Çtrito nun puoden andar porque la gelada fui tamanha que ye mui peligroso.

An mirandés, l pobo chama “Cabras” a las manchas burmeilhas de las piernas.

A las spigas deixadas puls segadores ne l restroilho.

Mas cabras (Zoo. capra hircus) tamien son aqueilhes animales que ándan pul termo robendo scobas, chougarços i yerbas, dan lheite para buber i fazer queisos.

Chichos

“Bun Anho Nuobo de dous mil i binte, i que nun mos fálten ls chichos” 

Fui assi mesmo, que un bielho amigo i cunterráneo quando hai uns dies me dou ls saludos, me dixo. 

Cunterráneo que por fuorça de l çtino fui botado alhá pa l’América de l Norte, tal qual you fui botado pa la capital de l Paiç, mas que tubimos la mesma criaçon, ne l mesmo lhugar, culs mesmos questumes i bibéncias.

Dixo-me tamien que staba por alhá muito friu, cumo era quando éramos garotos, mos criemos. Na temporada de matar ls cochinos, que habien sido cebados durante l anho.

Que habien acupado l lhugar na corteilha de ls que s’habien matado.

Assi cumo habie que mercar outros lharegos para cebar cun bianda, lhabaduras para que tubíssen bun lhombo ne l tiempo de las matáncias, buns chichos, que quando assados nas brasas era quemido que s’armanaba a la puosta de bitela.

Era desses cochinos, cebados, que benie la fartura, benie l unto pa l caldo i pa las batatas, la chicha pa las chouriças, salpicones, botielhos, tabafeias, costielhas, oureilhas, patas, touçinos, persuntos.

L fumeiro.

Que buono fui l miu cunterráneo me lhembrar, puis siempre oubi dezir: “que chichos i buonas lhembráncias nunca fazírun mal a naide”.

Mensaige i Bídeo

Deseamos que l anho tenga ampeçado bien para todo mundo, mormente als sócios de la ALCM.

Porqui i cun la buossa ajuda, astanho cunseguimos chegar a muitas más personas, a muitos más mirandeses, deiqui i de las quatro squinas de l mundo i pal mundo, adonde quiera que steian. Fazer cun que se saba que la Lhéngua Mirandesa inda ye falada por muita alma.

Assi, l bídeo de Buonas Fiestas, graças a bós, ten hoije: 1328 partilhas i 56 886 bizualizaçones ne l Facebook; 566 bizualizaçones ne l Youtube https://www.youtube.com/watch?v=Ui_WiCDJ8tE ; todo afuoras ls miles de mensaiges que passórun pul Whatsapp cula berson cúrtia de l mesmo bídeo. Un camino a seguir i a aprainar.

(ye só calcar ne l Link ou n'eimaige para ber l bídeo)