07/05/21

Cuonta de l lhibro "Cuontas Bielhas Sien Mofo" publicado an 2019


APARBONAR, NUN HABIE OUTRO REMÉDIO

Píca-las cul’aguelhada nun t’ampates, que la cousa stá a quedar feia! 

Manuel Einácio, agarrado al canhamano i scarranchado ne l trilho antendie bien l que cunsumie sue tie, que de bardeiro na mano iba ajuntando las spigas i pencas que se spargíen nas bordas de la parba.

Las baquitas puxando pul cambiço andában pasmantes cumo almas sien reponsos, se nun fússen picadas ende quedarien paradas i alhenas a todo aquel remolino de buoltas i rebolhiço de las pessonas.

Aquel mesmo cielo que siempre les trazie spráncia, remuniaba agora la sue zgrácia más delgeiro que las buoltas de la junta. L die quando naciu nada tenie de çfrente de todos ls outros, l sol spertou campante i sien sfregar ls uolhos botou-se a chubir la lhadeira de la manhana, nun lhebou muito tiempo i scarranchou-se anriba de las prainas eiras de las Medianas. De l oupor de la nuite naide dou por el, staba agora todo storricado i seco. Pul rechino de l die, ampeçórun a formar-se nubres negras cumo manta de farrapos, uas apuis outras cumo castielhos tomórun aquel scampado, amouchórun l sol.

Esta natureza de tiempo, traçaba l çtino de todo l mundo. Eilhes querien acabar de trilhar i habien-se perpuosto, s’acauso benisse un airico inda hoije lhimpar.

Mas l melhor série aparbonar, l rugido de ls truonos inda nun s’oubie mas ls riscos marcados puls relhampos subre l negro de las nubres yá deixában bien claro quien iba a mandar l restro de la trilha. La calor atafanhaba ls pulmones, la munha alhebantada pulas biendas i l barrer de ls bardeiros anubraba ls uolhos de ls homes i mulhieres que cun ganas de lhebar delantreira medien l pouco tiempo que los apartaba de la chegada de la truniada. Sien tiempo sequiera para lhimpar l sudor i amolecer la scura de las gorjas, batalhában para bencir, cua determinaçon de lhebar la melhor contra aquel mostro malino. Habiesse mantenido seco i agora botaba las purmeiras pingas d’auga seinhas de benir a ser un de ls mais molhados.

Maldita suorte la nuossa, praguejaba Marie Ducéu, ne ls antre[1]tiempos de ls pedidos que fazie a Santa Barbela q’atamasse ou lhebasse aqueilha termienta para bien loinge deiqui. Aparbonar i calcar bien ls parbones, era agora la sola spráncia deilhes para que la fuorça de la mundiada nun lhebasse l fruito dun anho de canseira.

To la giente sabie que quando bénen puxadas a aire i carregadas d’auga, çpéijan cun rábia. La pouca suorte podie benir nessa tarde. Nun hai nada q’atáme sue fuorça quando tocadas a pulborinos. Rogos, rezas, nobenas, pedidos, pormessas i repenicar de campanas son buonos mas la certeza de tener fuorça de las zbiar un nunca ten.

Cula chegada de la nuite, la termienta çpeijou l’auga que quijo, por ende se quedou sien dar muostra de outras eiras querer besitar, mas tamien Manuel Einácio i Marie Ducéu nun le fazírun la buntade i dende nun arredórun pie. Eilhi quedórun d’atalaia la nuite anteira, bien acerca als parbones, biendas, çachos i bardeiros prontos pa guiar l’auga pa las augueiras.

Soutordie l sol, bieno, claro, caliente i reinante, cumo quien quier fazer las pazes i çculpar-se daqueilho que nun tenie culpa i de todos.

Assi dando más ua beç l melhor que tenie para secar las eiras, i eilhes zaparbonar, acabar la trilhar i lhimpar.

Quien sabe se l’auga que nas eiras fizo tanto mal, pa la sembra de la nabina iba a fazer bien!


 

09/04/21

Anformaçon

 

 Bai a star a público de 10 d'Abril anté 10 de Maio na Casa de la Cultura Mirandesa (Miranda de l Douro) ua sposiçon de máscaras de l "Mestre" Amável Antão.

 

 


 - Çpuis de muitas sposiçones an scuolas, museus, spácios culturales por bários lhados i durante muitos anhos, quédan agora de 10 d'Abril anté l 10 de Maio las obras spuostas na cidade de Miranda de l Douro, eili bien acerquita de la tierra, Zenízio, que biu nacer este "Mestre i Sábio".

- Las máscaras de Amável Antão, berdadeiras obras d'arte, traspórtan quienquiera pa l mundo eimaginario i mágico, pieças salidas de l más singelo i puro que la naturaleza dá, que sues manos i grácias al sou saber, angeinho, arte bíran património dua cultura sien pareilho.

- Más ua beç, cumo siempre l fiç, quiero dar ls mius parabienes a Amável por lhebar por alantre esta sposiçon, assi cumo als repunsables de la Casa de la Cultura Mirandesa  por acolher i acarinar la cultura de ls sous cunterráneos.

-Ye ua sposiçon a nun perder, l sou outor yá de hai muito dou probas de muita culidade.

Oubrigado Amável, l camino ye siempre palantre.

Un arrochado abraço.

 

01/04/21

Ditos Dezideiros

Alguns "Ditos Dezideiros" (Provérbios Mirandeses) de l més d'Abril
 

 


 

28/03/21

Deseios / Desejos

 


 


- Deseio a to l mundo que besita este site que tenga ua buona Sumana Santa, ua Páscua an harmonie, paç i salude na cumpanhie de ls buossos, son ls mius deseios i de mie família.

Saludos
...................................................................................................
- Desejo a toda a gente que visita este site que tenha uma boa Semana Santa, uma Páscoa em harmonia, paz e saúde na companhia dos seus, são os meus desejos e da minha família.

Saudações

 

25/03/21

La mela de cisco

 


I quando la mela ye na tiesta inda pior, porque ye denunciante, quienquiera la bei.

Gustar de bino, buber bino de beç an quando cun reglas, nun s’afigura a nadie que seia ua cousa de l outro mundo.

- Caramba, nun era por ende que la burra iba a spenhicar nas berças.  

Tamien, nun iba a ser por bias de menos uns buchicos que las cubas n’adega de tiu Falcon tenien que ser puostas a lhabar pul San Pedro, quedarien bazies.

Nien el s’iba a meter an demanda cul dius Baco.

Mas cumo era un tiu que le gustaba saber todo, tamien gusta saber cumo las cousas íban n’adega, cun dius portetor de l bino ou sien el.

Cierto die botou-se a percurar más ua beç a las rapazas, porque yá l habie feito bárias bezes.

-Mas bós si nun bueis bino?

L queilhas ateimában que nien santicas eimaculadas.

-Nun l buemos, nunca l buimos!

Tiu Falcon botou ua sclamaçon:

- Conho, porqui me quedo, fui l palabron que le saliu, mesmo sendo reserbado an malas falas an pie de las filhas q’éran rapazas prendadas, mas cuntinaba cula del frisgada.

Magicando:

… siempre que bos rogo, al almuorço ou a la cena nunca aceitais…

Éran ls tiempos que se bibien, çfíciles dantender puls más bielhos, las rapazas amprouában-se por todo i por nada. Inda las modas andában a lheugas de çtáncias, nun habien chegado yá eilhas las fairában.

I esta dua rapaza buer bino i se saber nun quedaba bien, puis era mirada cumo sbanjadeira, era siempre melhor par’arranjar cumbersado l bafo nun ser a bino. 

Porque de buer-lo anté un die correr-se q’era ua borracha era nun sfergante.

Éran tiempos que más balie asparecer-se que ser-se.

Alhá dezie l’outra pa l rapaç oubir, a ouferecir-se:

ándan muitas por ende que nun l son i parecén-lo, outas somos i nun l parecemos.

Tiu Falcon más la sue tie, hai dezassiete anhos datrás, nua nuite d’arromba, anquemandórun la benida dun rapaç, q’era l sou deseio mas benírun dues mielgas, agora mocetonas.

Que nun bundaba ls cobradeiros de cabeça que le dában por bias de ls rapazes, que nien perros lhampeiros nun las lhargában, que tamien quedaba arrediu quando le rogaba cua pinga i eilhas a pies juntos le dezien que bino nien bé-lo.

Quantas bezes inda s’astrebien a dezir, queda mal na nuossa cundiçon de catequistas i moças buer bino.

Apuis ls rapazes más bien puostos nun mos quieren.

Mas Flesmina i Celeste podien anganhar un manhuço deilhes, que l tamanho de las tetas i las nalgas ajudában, mas nunca a sou pai.

Siempre fui questume, Falcon antes de la cena ir-se a la cuba anchir la garrafa de bino, i molhaba las gorjas cul cacharro que siempre ende quedaba spindurado.

La garrafa era para melhor abaixáren las códias i l cibico de chouriço.

Un cierto die yá cun eilha fisgada, pediu cun falicas mansas a Flesmina.

- Bai tu hoije pul bino que tou pai tubo un die malo, la bima derreou-me.

Mas antes habie ido al cacharro i anciscou-lo an todo l  rebordo cun carbon.

Flesmina, sien se dar de cuonta, puis l clareio na adega nun era muito, lhougo que botou un trago quedou cula marcaçon, la mela feita pul cacharro na tiesta.

I fui assi que chegou a la mesa adonde la família se purparaba para cenar.

Tiu Falcon mirou-la i questionou-la:

- Anton sós tu que dizes que nun bebes bino?

Puis mira trazes la proba bien a las claras na tiesta, feita pul cisco de l cacharro.

Apuis de çcubrir ua, debrebe tiu Falcon dixo pa la outra.

-Tu tamien l bebes a las scundidas.

 

Faustino Antão

Nota: Cuonta tamien publicada na Fuolha Mirandesa ne l Jornal Nordeste

 

11/03/21