Ai… Turismo… Turismo
Yá quantá que nun chobie i nin me daba cuonta que l rieiro inda corrie, era un cloc… cloc… que se oubie por antre la yerba que de tan crecida, nun deixaba ber la auga. Mas eilha staba alhá i corrie, inda fazendo aquel cloc…cloc… que sonaba als mius oubidos i cul chilrar de chascos i folhecos i l zumbir de las abeilhas i moscardos, fazie ua sinfonie que nin l melhor cumpositor poderie registrar.
Ls palombos brabos namorában, las rolas zbolaxában por lhi i ua anfenidade de páixaros, cumo yá muito nun se bíen, fazíen pensar que staba noutro mundo. Mas nó, era nua regada, sien haber sido oubri(g)ada por la mano de l home a serbir-lo. Agora era libre i alhi staba a fazer l que le daba la gana, deixando-se pintar de quelores de las mil i ua flores que médran por antre la yerba i no meio de la qual bibe ua bariadade anfenita de animalicos.
Tamien you fazie l miesmo, zapartado de ua bida de trabalhos a serbir uns i outros, alhi staba you, libre cumo un rouxenhol a gozar sfregantes marabelhosos de bida, nun de ls muitos paraísos que hai pul termo de l Praino.
Mas porque scribo you esto?
Porque hai muitos cumo you, que poderíen fazer eigual, mas ban-se finando por las cidades ou metidos an casa, sperando l cielo de l’outro mundo, quando l podíen gozar neste. Que sperais para bos ajudar i ajudar l Praino?
Turismo, abiones, denheiro, praias, cidades, cidades, giente, giente que faç munton, mas bibe sola…
Almendra
