Folares i fornos quemunitairos II

Ah Almendra, rezon teneis bós quando dezis que inda bal bien la pena dar uas spechocadelas, más nun séia para ber cumo se sténden. Gustou-me bastante ler la buossa chubida licion subre cultura mirandesa eiqui ambaixo, i, cun buossa licença, inda me gustaba acrecentá-le un cachico de anformaçon, cun que fui a dar ne l jornal degetal mirandés HOIJE, de que sou leitor a diário i que tengo cumo fuonte sien anxertos i lhimpa de aculturaçones. L testo yá ten uns anhicos, mas cuido que l outor inda puode hoije respunder por el, bergonha se le habie de fazer zmintir agora l que screbiu n'aqueilha altura, inda habien pori de dezir que nun ye mi firme nas puxadas i que las berdades que ansina hoije puoden nun ser las mesmas de manhana ó passado, assi a mod'anxertadas:

"Muito tenie hoije que cuntar subre las tradiçones de la Páscua, mas la lembrancia de la Páscua de quando you era pequeinho i de l que hoije pude ber, ten muito de parecido, yá que las tradiçones inda se ban mantenendo por Sendin.

La Páscua siempre fui ua fiesta de la comunidade. Apuis de un tiempo de aiuno, era tiempo de comer i l folar era l rei de la comida. 

Por toda la tierra de Miranda, l pan i l cochino eran la base de toda la comida i cumo era tiempo de fiesta i de acabar cun l aiuno, tenie que ser cun algua cousa special. Fui assi que ambentórun l folar. Ua cousa que tenie pan i cochino i que parecie un doce – l folar.

Ye agradable lembrar l tiempo an que las nuossas mais i las nuossas abós fazien l folar. Era un die an que se ajuntában las bezinas, ne l forno de ua deilhas ou ne l forno de la rue, para fazéren l folar. Nesse die nun faltában tamien ls roscos, ls doces tradicionales i la bolha doce.(...)" 

Ambora númaro 190

publicada ne l jornal degetal HOIJE,

ne l die 23 de márcio de 2008, demingo de Páscua

sublenhado miu

Buono, sabendo que, cunsante mos fui ansinado eiqui ambaixo, l folar era cousa solo de ricos i l pobo nunca soubo l que isso era, i sabendo inda que fornos quemunitairos fui un mito político que ls quemunistas quejírun "ambentar", sabendo isto todo, ah Almendra, dai licença que, cun to l respeito i sien querer abusar de la buossa pacéncia, spechuque más un cachico i bos procure ua cousa que me stá eiqui a fazer spece:

mas anton quando érades nino, na buossa rue, érades todos ricos ó érades todos quemunistas?! Ó inda más ancrible: érades todos ricos i quemunistas??!!... ;)

I, cun que anton, nun bundaba l folar, "nun faltában tamien ls roscos, i ls doces tradecionales i la bolha doce," han?!... i isto anquanto, cunsante mos ansinais na licion, nien to ls probes tenien pan para cozer, muito menos un cachico de quenhon para meter andrento...

Si senhor, bonito serbiço! Dai inda licença que copie más un cachico de palabras buossas nun quemantairo ende para trás, para arrematar eiqui: 

Uns muito i outros nada! Ls que mais ténen nun cúmpren las reglas, por esso ténen muito. Apuis pratícan la caridade... 

CULTURA MIRANDESA

FOLARES I FORNOS COMUNITAIROS

Esto de cultura ye cousa cumplicada para ls doutores i anteletuales. Pássan até l tiempo a dar defeniçones de la palabra – “cultura” por nun s’antendéren, para quanto mais sabéren l que ye cultura. Anton quando se trata de cultura de ua cierta region, an beç de bibíren essa cultura pónen-se de fuora a screbir subre eilha ó a dar cunfréncias de l que l parece, ó de l que oubírun dezir. Tamien hai ls que la bibírun por algun tiempo, mas deixórun-se aculturar por las ounibersidades ò por antresses i perdírun las raízes dessa cultura. Chamo-le you “ls anxertados”.
Cula nuossa lhéngua i la nuossa cultura mirandesas bai assucedendo l miesmo.
Fálan de folar i de fornos comunitairos sien sabéren de l que fálan.
Folar fui siempre cousa de ricos i que l pobo nunca soubo l que era i hoije, se l come, ye porque l compra i passou a ser moda. La giente que fazie pan, si, porque nien toda la giente tenie grano pal fazer, alhá metie un cachico de quenhon nun bolho, quando inda nun le tenie acabado, para un die nomeado i pal ninos.
Fornos comunitairos tamien ye outro mito que se quijo traer para la politica cumo cousa de squierda, talbeç por pensáren que comunitairo tenie algo a ber cun comunismo, parecença de palabras.
Ls fornos ó eran de meia dúzia que l habíen feito, amassando cada un, nun die marcado, ó eran dun rico que cobraba ua fogaça para alhá fazéren l pan. Ye que nien toda la giente tenie un buraquito decente para dromir i tener la cria, para quanto mais fazer forno.
L pan era centeno, passou a ser trigo, nó cumo alguns dízen por ser melhor ó de ls ricos, mas por bias de ls carniçuolos. Ls carniçuolos sálen na spiga de l centeno i ye ua droga que an grande cuntidade pon las pessonas tontas. Habie que sustituir la Centeno, que al trilhar tenie siempre carniçuolos amisturados. Porque l’anformaçon nun chegaba facel i habie quien negociasse la farina sien s’amportar cun esso de scolher les carniçuolos, habie que demudar pal trigo. habie que habituar a comer trigo, ls ricos sáben siempre purmeiro de las amboras, fúrun ls purmeiros a demudar. Tamien agora assi assocede cun quien come a la mesa de l poder, sáben purmeiro de ls sussidios. Tamien ye por esso que todos quíeren ser ó fazer partes de las anstituiçones.
La grande riqueza de l pobo era la sue lhéngua, que bino de l lhatin popular, i fazer filhos. Tamien la lhéngua nada tubo a ber cun doutores ó lhibros, mas fui la fala de todos ls dies que la guardou. I fúrun ls probes, que ls ricos yá queríen falar grabe. L lhatin chegou eiqui quanto a mi, percipalmente por trés rezones, mas you nun sou antendido, desso solo ls de l “jet-set de la lhéngua” ye que sabe.
Mas siempre puodo dezir essas tréss rezones:
La purmeira fui l’ampério romano tener dominado administratibamente esta region durante sieclos. Beia-se l que acunteciu culs pobos latinos i cun ls administrados puls paízes ouropeus por esse mundo afuora. La lhéngua deilhes alhá stá, inda que cun l que cada pobo l acrecentou.
La segunda fui l’antegraçon de ls homes nas legiones romanas i que quando regressában, fazíen cumo hoije fázen ls eimigrantes.
La treceira fui la relegion Cristiana, que oubrigaba a rezar an lhatin.

Al sabor de la pluma!

José Almendra

12-04-2012 14h24m (testo nó corregido, pude tener erros de sintasse i de forma)

(cuntina)

Folar - Tradiçon bien dantes

L folar, cumo bolho que lhieba muita chicha, ye un de ls mais caratelísticos de la tierras de Miranda, mas hai que dezir que nun ye assi an to ls lhados. An muitos sítios, folar ye l nome dado a un bolho de massa cun uobos cozidos anriba mui ousado na temporada de la Páscua.
La palabra (termo) folar benirá de l lhatin “florais” ou de l germánico “flado” (bolho de miel) ou de l francés “poularde”. Seia cumo fur, benido dun lhado ou de l outro, cun uobos cozidos ou cun muita bariedade de chicha de cochino, l que s’asparece a ser berdade que ye un bolho de segneficado relegioso, nas tradiçones de fiestas i quemeres de l pobo. Cua fuorte mescla tradecional, assenta l sou poder an questumes de dar i recebir, an harmonie de cumbíbio i lhigaçones nun solo familiares cumo tamien anstitucionales. Aquel que birou padrino de batizo dá l folar al afilhado pula Páscua cumo ls paroquianos al cura.
L folar ye assi l pan rei de la temporada de la Páscoa, lhembrando l pan que Jasus repartiu culs deciplos na redadeira cena que tubo cun eilhes, por outro lhado quando coronado cun uobo, ancarna l símbolo de l renascimiento de Cristo, de la sue Rucerreiçon
Folar salido de farina de trigo, auga, uobos i sal, ten bárias formas, zde l pan doce até l folar gordo de carne de cochino, de pita ou galho, bitela, persunto i salpicon. Ye este folar gordo que melhor conheço, porque siempre l bi fazer, i siempre quemi zde pequerrico.

L Folar

L folar ye feito de maneiras çfrentes i ye ua tradiçon de la Páscoa bien anraizada ne l nuosso Paíç. L más bulgar ye feito cun farina de trigo, uobos, lheite, azeite, açucre i furmiento. Apuis lhieba un cachico de canielha i yerba-doce, que le chamamos finolho, i ua crona cun uobos anteiros cozidos cun casca.
AnTrás ls Montes l folar ye çfrente i ye feito cun farina de trigo, uobos, lheite, azeite, furmiento i chicha. Esta chicha ye quaijeque siempre de chouriça, chouriço, spalda i a las bezes inda lhieba uns cahicos de toucino, de l delgadico, para que quede mas ountadico. Datrás ne l mais de las casas an Zenízio i cuido que nas outras aldés nun serie çfrente, nun se fazie l folar, mas las mais amassában ua fornada antes de la Páscoa i fazien ua ou dues fogaças cun chicha i a las bezes tamien fazien roscos. La chicha que se metie nas fogaças era quaijeque siempre de toucino de l delgadico i de la spalda.
Que bien que sabien aqueilhes cachicos de pan ountadicos ,que quedában a la buolta de la chicha. Ne ls die d’hoije l folar lhieba solo chicha de la buona, mas la buntade de l quemer i la fame yá nun son cumo naqueilhes tiempos i por isso nun mos sabe cumo dantes. A mi l que me sabe melhor cuntina a ser l pan que queda ountado a la buolta de la chicha.
L folar era dado puls padrinos als afelhados ne l die de Páscoa, mas para que estes tubíssen dreito a el, tenien que ne l Deimingo de Ramos oufrecer un ramo als padrinos. Esse ramo podie ser de oulibeira, de resmanino de alecrim ou de buxo i tenie que ser benezido pul padre na missa. Apuis de missa íban a casa de ls padrinos a oufrecer esse ramo i ls padrinos cumbidában-los a ir a casa ne l die de Páscoa.
Chegado esse die, ls afilhados íban a casa de ls padrinos i nas casas adonde se tenie feito l folar habie ua mesa purparada cun folar, roscos, cabacas, sodos i a las bezes alguas maçanas. Adonde nun se tenie feito l folar siempre habie ua chouriça cozida ou un chouriço i a las bezes uns roscos i uns sodos. Apuis de quemer cumbersaba-se un pouco i ls afilhados scapában a percura de jolda pa la brincadeira ou anton íban atrás de las bacas pa l cerrado.
Hoije an die yá todo ye doutro modo. Ls afelhados yá nun dan l ramo als padrinos i l folar que ls padrinos dan, tamien ye çfrente. Ls que inda ban a casa de ls padrinos ne l die de Páscoa ye questume ancuntrar ua mesa bien purparada cun folar, almendras, uobos de chocolate, cabacas, roscos i sodos. Ls padrinos cuntínan a dar prendas als afelhados nesse die i cunsante l’eidade deilhes las prendas puoden ser brinquedos, lhibros, roupa i a las bezes alguns ouros.

Francisco Domingues