Mas la França cuntina a ser… l purmeiro !

Angola ye la terceira maior ourige de las remessas d'eimigrantes

Angola yá ye la terceira percipal ourige de las remessas d'eimigrantes pertueses, tenendo sido la fuonte de 147 melhones d'ouros an remessas an 2011, segundo dados dibulgados pul Banco de Pertual (BdP). Nun anho an que las remessas totales de ls eimigrantes se mantubírun quaije eiguales a las de l anho anterior, l muntante ambiado puls pertueses residentes an Angola creciu quaije 10 por ciento. Ne ls númaros de l BdP, las remessas de ls pertueses an Angola stában assi an 2011 yá bastante arriba de las recebidas de çtinos tradecionales de l'eimigraçon pertuesa, cumo ls Stados Ounidos (130 melhones), l’Almanha (113 melhones), l Luxemburgo (68 melhones) ou l Canadá (40 melhones). Inda assi, las percipales fuontes de remessas d'eimigrantes cuntínan a ser la França i la Suíça. Estes dous países repersentórun mais de metade de ls balores ambiados para Pertual an 2011: 868 melhones d'ouros ne l causo de la França, 681 melhones d'ouros ne l causo de la Suíça. Ls países de la Ounion Ouropeia cuntínan a repersentar un pouco mais de metade de las remessas de ls eimigrantes pertueses, mas l balor de las trasferéncias antracomunitárias reduziu-se de 2010 (1413 melhones d'ouros) para 2011 (1354 melhones d'ouros).

Jornal Mundo Português, de 2 de Márcio de 2012.
Ber aqui

[Angola é a terceira maior origem das remessas de emigrantes

Angola já é a terceira principal origem das remessas de emigrantes portugueses, tendo sido a fonte de 147 milhões de euros em remessas em 2011, segundo dados divulgados pelo Banco de Portugal (BdP). Num ano em que as remessas totais dos emigrantes se mantiveram quase iguais às do ano anterior, o montante enviado pelos portugueses residentes em Angola cresceu quase 10 por cento. Nos números do BdP, as remessas dos portugueses em Angola estavam assim em 2011 já bastante acima das recebidas de destinos tradicionais da emigração portuguesa, como os Estados Unidos (130 milhões), a Alemanha (113 milhões), o Luxemburgo (68 milhões) ou o Canadá (40 milhões). No entanto, as principais fontes de remessas de emigrantes continuam a ser a França e a Suíça. Estes dois países representaram mais de metade dos valores enviados para Portugal em 2011: 868 milhões de euros no caso da França, 681 milhões de euros no caso da Suíça. Os países da União Europeia continuam a representar um pouco mais de metade das remessas dos emigrantes portugueses, mas o valor das transferências intracomunitárias reduziu-se de 2010 (1413 milhões de euros) para 2011 (1354 milhões de euros).]

Islandia, ua lhiçon para todos nós

Li onte, nun jornal spanhol, ua ambora sobre la Islándia, que me deixou antusiasmado. Podeis ler-la ende, mas se nun tubirdes paciéncia, lede l miu modesto resumo.

An 2008, l gobierno islandes nacionalizou ls principales bancos - Landsbanki, Kaupthing i Glitni - que stában falidos. Cumo resultado desse "ambestimento", l paiç antrou an bancarrota i tube de pedir ajuda sterna (2.100 milhones de dólares del FMI i 2.500 milhones de paises nórdicos).

Ls ciudadanos, ansistifeitos cu l rumo de l paiç, organizórun manifestaçones diárias que porbocórun la demisson de l gobierno (chefiado pu l cunserbador Geir H. Haarden) i la cumbocaçon de eleiçones antecipadas.

L nuobo gobierno nun cunseguiu resolber la situaçon i porpós la deboluçon de la díbida a la Gran Bretanha i a la Holanda, mediante l pagamento de 3.500 milhones de euros, a ser suportado por las familias islandesas, durante 15 anhos, cun juros de 5,5%. Se fussen pertueses, haberien ido pa l café lhamentáren-se. Cumo nun son, fúrun outra beç pa la rue i eisegirun que esta medida fuosse sumetida a referendo.

L resultado nun deixou margen para dúbedas. Nobenta i trés por cento de la populaçon rejeitou la deboluçon de la dúbeda nessas cundiçones. Ls credores bírun-se forçados a repensar l acordo i renogociórun la proposta - juros a 3% i pagamento a 37 anhos. L Parlamento aporbou la proposta por ua marge mui streita. Ansatisfeito, l persidente submeteu este nuobo acuordo a referendo.

Por pressones de l pobo, fúrun ambestigados i presos bários banqueiros i altos executibos, culpados pula faléncia de ls bancos. Por outro lado, la Interpol ordenou la prison de l expresidente de l Parlamento, Sigurdur Einarsson. Esta situación lhebou muitos banqueiros i executibos a fugir de l paiç.

Elegiu-se ua Assembleia para redigir la nuoba Cunstituiçon. Candidatórun-se a esta tarefa mais de 5000 islandeses, de ls quales fúrun scolhidos binte i cinco, todos sin filiaçon partidária.

L pobo islandés scolheu decidir l sou pórprio feturo.

I nós, quando decidiremos l nuosso?

Frase de la sumana

Çculpai-me, mas you tengo de ampeçar por dezir que, trés anhos apuis de la hourrible crise financeira causada por ua grande fraude, inda ningun eisecutibo fui preso. I esso está arrado!

Charles Ferguson, un de ls rialisadores de l documentairo Inside Job, an la cerimónia de antrega de ls óscares

Eilegalizar la Pobreza

La Associaçon Cais, que bende la rebista homónima i ajuda ls sien abrigo, quier apersentar ua proposta als partidos cun assento parlamentar, que bisa oubrigar l Stado a fazer todo l que pode i debe para reduzir la pobreza i pa l penalizar, caso nun cumpra estes oujectibos.

A mí, parece-me que l Stado nun solo nun ten feito l neçairo para reduzir la pobreza, cumo la ten oumentado. Esta corja que mos ten çgobernado ten sido ua spécie de Robin de ls Bosques al cuntrairo, ten sugado l sangue aqueilhes que pouco tenen para dar aqueilhes a quien l muito nun chega.

Por esso, aplaudo la eideia de la Cais, mas al miesmo tiempo, nun acradito que ls partidos cun assento parlamentar çteian çponibles para la acolher. Un paiç sien pobres serie un pesadelo para qualquer político.

Por un lhado, ua pessona cun las necidades básicas satisfeitas pode querer andar mais anformado i tener mais sentido crítico sobre quien ls goberna. Por outro lhado, ye neçairo ampobrecer mais ls remediados para cuntinar anriquecer aqueilhes que berdadeiramente mandan nesto tudo. Por fin, se nun houbesse pobres, cumo ye que ls políticos fazeríen las suas campanhas eleitorales? Apareceríen al lhado de quien?

Chomsky i las 10 Stratéigias de Manipulaçon Mediática

Cunsante ua mensaige de correio eiletrónico que anda por ende i que possiblemente muitos de bós yá recebírun, l lhenguista amaricano Noam Chomsky fizo ua lista de dieç formas ousadas puls meios de quemunicaçon para manipular l público.
Mas tamien hai quien diga que nun foi Chomsky quien screbiu esta lhista. Seia cumo fur, bal la pena lé-la. Ende quédan, anton, dieç stratéigias de manipulaçon de las massas.

1. La Stratéigia de la çtraçon. L'eilemiento purmeiro de l cuntrole social ye la stratéigia de la çtraçon que cunsiste an zbiar l'atençon de l público de ls porblemas amportantes i de las mudanças decedidas pulas eilites políticas i eiquenómicas, mediante la técnica de l delúbio ó einundaçones de cuntinas çtracçones i d'anformaçones anseneficantes. La stratéigia de la çtraçon ye tamien andespensable para ampedir l público de s'antressar puls coincimientos eissenciales, na ária de la ciéncia, de l'eiquenomie, de la psicologie, de la neurobiologie i de la cibernética. "Mantener l'atençon de l público çtraída, loinge de ls berdadeiros porblemas sociales, cautibada por temas sin amportáncia rial. Mantener l público acupado, acupado, acupado, sin nanhun tiempo para pensar; tornar a la quinta cumo ls outros animales (citaçon de l testo 'Armas silenciosas para guerras tranquilas')".

2. Criar porblemas, depuis oufrecer seluçones. Este método tamien ye chamado "porblema-reaçon-seluçon". Cria-se un porblema, ua "situaçon" perbista para traier ua cierta reaçon ne l público, a fin de que este seia l mandante de las medidas que se deseia fazer aceitar. Por eisemplo: deixar que se zambuolba ó se antensefique la bioléncia ourbana, ó ourganizar atentados sangrentos, para que l público pida leis de sigurança i políticas an perjuízo de la lhibardade. Ó tamien: criar ua crise eiquenómica para fazer aceitar cumo un mal neçairo l bolber atrás ne ls dreitos sociales i l zmantelamiento de ls serbícios públicos.

3. La stratéigia de ir als poucos. Para fazer cun que se aceite ua medida einaceitable, bonda aplicá-la als poucos, a cuonta-pingas, por anhos cunsecutibos. Ye dessa maneira que cundiçones socioeicquenómicas radicalmente nuobas (neoliberalismo) fúrun ampuostas ne ls anhos de 1980 i 1990: stado mínimo, pribatizaçones, percaridade, flexibelidade, zamprego an massa, ourdenados que yá nun nun dan para ua bida decente, tanta mudança que haberien porbocado ua reboluçon se tubíssen sido aplicadas dua solo beç.

4. La stratéigia de l deferido . Outra maneira de se fazer aceitar ua decison ampopular ye apersentá-a cumo sendo "delorosa i neçaira", cunseguindo l'aceitaçon pública, ne l momento, para ua aplicaçon fetura. Ye mais fácele aceitar un sacrafício feturo do que un sacrafício eimediato. Purmeiro, porque l sfuorço nun ye ampregado eimediatamente. Apuis, porque l público, la massa, ten siempre la tendéncia a sperar angenuamente que "todo baia a melhorar manhana" i que l sacrafício eisigido poderá ser eibitado. Esto dá mais tiempo al público para se aquestumar a l'eideia de mudança i a aceitá-la cun resignaçon quando chegue l momento.

5. Deregir-se al público cumo ninos de pouca eidade. L mais de la publicidade deregida al grande público outeliza çcurso, argumientos, figuras i modo de dezir mui anfantiles, muita beç mui acerca de la debelidade, cumo se l spetador fusse un nino de tienra eidade ó un defeciente mental. Quanto mais se antente buscar anganhar al spetador, mais se tende a adotar un modo anfantelizante. Porquei? "Se bos deregis a ua pessona cumo se eilha tubisse l'eidade de 12 anhos ó menos, anton, an rezon de la sugestionablidade, eilha tenderá, cun cierta porbablidade, a ua repuosta ó reaçon tamien çprobida dun sentido crítico cumo la dua pessona de 12 anhos ó menos d'eidade (ber 'Armas silenciosas para guerras tranquilas')".

6. Outelizar mais l aspeto eimocional que la reflexon. Fazer uso de l'aspeto emocional ye ua técnica clássica para fazer un cúrtio circuito na análeze racional, i por fin al sentido critico de ls andebíduos. Inda porriba, l'outelizaçon de l registro eimocional permite abrir la puorta de l ancunciente para alhá poner ó anxertar eideias, deseios, miedos, cumpulsones, ó anduzir cumportamientos...

7. Mantener l público na eignoráncia i na mediocridade. Fazer cun que l público seia ancapaç de antender las tecnologies i ls métodos outelizados para sou cuntrole i sue scrabidon. "La culidade de l'eiducaçon dada a las classes sociales anferiores debe ser la mais pobre i medíocre possible, de modo que la çtáncia de l'eignoráncia que bai de las classes anferiores a las classes sociales superiores seia i mantenga ampossibles pa l alcance de las classes anferiores (ber 'Armas silenciosas para guerras tranquilas')".

8. Stimular l público a nun craticar la mediocridade. Lhebar l público a achar que ye moda l ser stúpido, bulgar i anculto...

9. Reforçar la rebuolta pula autoculpabilidade. Fazer la pessona acraditar que ye solamente el l culpado pula sue própia zgrácia, por bias de la sue pouca anteligéncia, de sues capacidades, ó de sous sfuorços. Assi, an beç de ir contra l sistema eiquenómico, la pessona tira-se l balor a eilha mesma i culpa-se, l que trai un stado depressibo an que un de ls eifeitos ye einibir-se na sue açon. I, sin açon, nun hai reboluçon!

10. Coincer melhor las pessonas do que eilhas mesmas se conhécen. Ne ls redadeiros 50 anhos, ls abanços rápidos de la ciéncia ténen traído ua defréncia cada beç mais grande antre ls coincimientos de l público i ls que son ousados pulas eilites dominantes. Grácias a la biologie, a la neurobiologie i a la psicologie aplicada, l "sistema" ten çfruitado dun coincimiento abançado de l ser houmano, tanto de forma física cumo psicologicamente. L sistema ten cunseguido coincer melhor l'andebíduo quemun do l que el mesmo se conhece. Esto quier dezir que, ne l mais de ls causos, l sistema eiserce un cuntrole maior i un grande poder subre ls andibíduos do que estes subre eilhes mesmos.

« Banco alimentar » versus « A la grande i a la francesa »

Neste Sábado que passou, pula manhana, prestei atençon al que dixo i cuntou nua eimissora de rádio de grande scuita aqui an França la diretora de la «banque alimentaire» an Lisboa, (An mirandés, un debe dezir tamien pula cierta : "banco alimentar"). Essa pessona falou an francés i a cierta altura la jornalista até le preguntou adonde ye que habie daprendido a falar tan bien an francés. « Bibi seis anhos na Bélgica (Acho que fui seis anhos que eilha dixo) i trabalhei pa l Cunseilho de l’Ouropa » respundiu eilha. Cuntou tamien essa pessona qual ye hoije l oubjetibo desse banco alimentar, cumo recuolhe ls donatibos i ls redistribui depuis na capital i an muitas freguesies al redor sob la forma de alimentos i de pacotes alimentares para matar la fame a mais dun. Splicou tamien qu’anfeliçmente l númaro de pessonas necitadas que recuorren a esse tipo de ajuda ten oumentado nestes últimos tiempos de maneira segnificatiba cula crise.
«Nestes redadeiros anhos, muita giente s’andibidou percipalmente para comprar casa própria i hoije muitos (Pertual ten ua taxa de zamprego que ronda ls 10% de la populaçon atiba) nun ténen meios para cuntinar a bibir cumo bibien dantes. Nós ls Pertueses bamos a tener que fazer sacrefícios… »
Inda me lhembro de la jornalista le fazer tamien ua pregunta a essa diretora de que anfeliçmente nun fixei l nome :

― I ls bancos, ls bancos pertueses, passa-se cun eilhes l que se passa culs de l’Eirlanda ?
― Nó ! respundiu anton la diretora de l banco alimentar. Ls bancos pertueses até aperséntan ua situaçon sana.

Pessonalmente, l que you bos bou a cuntar agora ye que este Berano, an Sendin, cheguei a ir a pedir alguas anformaçones a un banco (mas nó un banco alimentar, un banco adonde un puode tener ua cuonta, pedir lhibros de xeques, lhebantar denheiro, etc) subre las cundiçones aperpuostas ou a que starie sujeita ne l caso dun eibentual ampréstimo por eisemplo para poder lançar-me na cunstruçon ou na compra dua casa... Purmeiro i por mais ancrible que pareça, l ampregado até s’anganhou quando quijo fazer a cierta altura ua simpres adiçon. Custa a acraditar mas alhá mos demos de cuonta (Fui you até que dei por esso) i la cousa fui andando anque a passos de formiga. L ampregado nun tenie priessa pula cierta porque nun habie quaije naide nesse die i a essa hora, nesse dito banco.
Mas acabou assi i todo l ampregado por apersentar las taxas de ampréstimo i finalmente alhá cunseguiu dezir (porque l reclamei i porque era esso que a mi mais m’antressaba saber) qual l custo total que irie atingir l ampréstimo, tomando an cuonta las simulaçones que le aperpus fazer (Si ! Porque todo esso nun passou dua simulaçon, fui por curjidade i nada mais que quije saber l que me podie sperar…)
I quando soube l resultado, nun tardei a çpedir-me sien mais nien menos anque cun un « Bien haia por todo ! » algo forçado (cousa que nun me custou nien un toston assi i todo !) para nun dar a saber l que pensaba na realidade mas meditando alguas cunclusones a que yá habie chegado sien grande sfuorço durante l nuosso ancontro :

Bien necitada starie se nun tubisse outro remédio que star a la spera de ser ajudada puls bancos i aparentemiente mais inda puls bancos pertueses ! Sei finalmente que nun tenerei priessa de tener un die casa an Sendin ou an qualquiera outro sítio an Pertual... se por acaso esso acuntecir … i despuis qu’amporta ?! Nun ye ende que you trabalho! Mas se tubisse ou se un die tubir por acaso mais necidade ou mesmo l deseio, balie la pena ou balerá la pena star çpuosta a dar a ganhar denheiro talbeç até als muntones (denheiro que inda mos puode fazer falta un die i que un cunsegue ganhar cumo puode mas a miles de quilómetros de l torron natal i tamien cun sacrefícios) ou dar tamien, quaije culs uolhos mei fechados, a quien nun ten bergonha ningua de pedir l que le dá la gana i nien sequiera l merece porque pa l ganhar nun tubírun, eilhes ls bancos, que matar muito la cabeça ou ir tamien mui loinge para saber del ?!

I mais ! Se ls bancos pertueses aperséntan finalmente ua situaçon hoije tan « sana », cumo uns dízen i até se fártan de dezir, alguns até cun un cierto orgulho, quien ye que yá pagou bun denheiro i bien pago pula cierta i durante muitos anhos tamien (ua bida anteira por bezes !) para que tubíssen ls bancos esses la suorte de star hoije nessa situaçon tan « sana » ? Afinal quien ye que suofre ?!

Pula cierta i cumo ye de sperar : ls mais necessitados cumo siempre ! Ls mesmos a que hoije se les piede sien bergonha ningua de cuntinar a fazer sacrefícios i agora mais inda que antes… para que outros puodan cuntinar a anchir la pança, tamien you stou cumbencida! Esso subretodo : para que uns poucos puodan cuntinar a anchir la pança… i, giente !, cumo podeis eimaginar, a la grande i a la francesa cumo inda se diç ende an Pertual ! A la grande : pula cierta ! mas a la francesa… Depende! Porque an França tamien hai quien aceite cada beç menos de quedar calhado ou anton culs uolhos cumpletamente tapados .