Mosteiro dos Capuchos, Costa de
Caparica, Almada, 11 de Maio. Mira-se l mar sereno que se mos mostra na sue
grandura. Ls Monges tubírun scuolha cierta para custruir l Mosteiro. L spácio
i la bista cumbida a sossego. Sorbe-se aire puro i mira-se l mar. Spácio agradable
que se gusta de bejitar. Andrento, nua de las sues grandes salas porsores i
cumbidados, fálan de: "Educação, Arte e Cidadania: o Diálogo entre as Artes”
cumo mos diç l cumbite. A las 16h 30m –Amadeu Ferreira, na sue culidade de
perjidente de la Associaçon de Lhéngua Mirandesa, bai falar subre l tema – «A(s)
língua(s) pilare(s) de l mundo» i de sou último lhibro de poesie Ars Vivendi Ars
Moriendi.
Muitas fúran las anterbençones i
quaije todas buoltas pa l'eiducaçon, l público albo éran porsores. You i muitos
outros stábamos alhá para oubir ua palhestra subre lhéngua mirandesa i mesmo
cun algun tiempo de spera baliu la pena. Cumo siempre, Amadeu Ferreira ten
aquel saber de agarrar las pesonas que lo scúitan. Ampeçou a falar an
mirandés i todo mundo antendiu l que dizie, apuis liu un poema de l sou lhibro
Ars Vivendi Ars Moriendi. Fizo apuis ua biaije zde l reino de Lhion, l
nacimiento de Pertual bilhingue. Muitos caçuórun de la
lhéngua mirandesa i outros squecírun se que la lhéngua mirandesa
tenie sido lhéngua de poder i muitos son ls registros que antes de l século XIV
stan screbitos na lhéngua lhionesa. Fui perciso que un moço médico, José Leite de
Vasconcelos, an 1882 le amostrasse a Pertual i al mundo que Pertual tenie dues
lhénguas: l mirandés i pertués. Falou apuis de la aprobaçon de l mirandés cumo
lhéngua pula Assemblé de la República, Lei 7/99. Aprobar ua lei nun fui todo, solo un
pouco mais d’apoio serie perciso para le dar mais denidade i desso ten habido
squecimiento. Scutei you a muitos que íban salindo de la sala que le tenie gustado
muito la anterbençon de Amadeu Ferreira.
Para regalo de todos, apuis la palhestra,
tubímos ls Dançadores que acumpanhados cula gaita, caixa i bombo dançórun i fazírun stralhar sous palos. Antes de l ampeço de cada lhaço Amadeu Ferreira iba splicando l porquei de cada un deilhes i assi se passou ua tarde bien passada ne l
Mosteiro de ls Capuchos, an Almada. Ende se amóstran ls retratos de ls
dançadores.
António Cangueiro
