Yá stá

Porsor Amadeu Ferreira

Albertina de São Pedro, na sue apersentaçon

Luís Silva, na sue apersentaçon

L Júri de Certeficaçon: Marina Santos, Técnica RBC; Isabel Vilares, Formadora Matemática i Tecnologies; Adélia Gomes, Abaluadora Sterna; Helena Chéu, Persidente de l Campus Académico; Júlio Meirinhos, Lhéngua Mirandesa; Amadeu Ferreira, Lhéngua Mirandesa; Carlos Silvestre, Coordenador CNO; Alfredo Cameirão, Formador Lhenguaige i Cidadanie

Yá stá! Zde onte a la tarde, hai dous pertueses que ténen un diploma de l ansino básico (9º anho), passado pul Menistério de l Eiducaçon, por un trabalho todo el zambolbido i registrado an Lhéngua Mirandesa.

Albertina de São Pedro i Luís Silva tubírun onte, ne l Campus Académico de Macedo de Cabaleiros de l Anstituto Piaget, l sou Júri de Certeficaçon de Cumpeténcias cun que acabórun l sou Porcesso RBCC. Podeis ber notícias eiqui ou eiqui (oubrigado, ah Thierry!).

You tamien me podie poner eiqui cun ua licantina, de cumo corriu , de cumo nun corriu, se stubo todo bien i assi. Nun bal la pena. Se quejirdes saber se corriu todo bien bonda firmá-bos bien na cara de por sor Amadeu i lhougo bedes que tal stubo la cousa!

Ah, i nun bos squéçades: Albertina i Luís son de San Pedro!

Santo Adrian

Eimaige de Santo Adrian na eigreija de San Pedro.

Diç que bieno de la antiga capielha de Santo Adrian, hoije sbarrulhada, cerca de las Minas cun l mesmo nome.

De la stória deste santo, you nun sei muito subre isso.
Mas miu pai cuntaba-le muita cuonta al miu filho i ua deilhas era de Santo Adrian.
Cumo bedes, ten ls dedos cortados, diç que fui al pai que los mandou cortar porque fumaba muito.
I sabeis que, antigamente, habie que fazer ls cigarros, aqueilhes de la cabeça atada, era perciso anrebulhá-los i, sien dedos, el nun podie fazer isso.
Mas cumo ye Santo... ambantou als Cantuques i apuis ls de filtro, i assi fúrun ambantados ls cigarros yá feitos.

Albertina São Pedro