L balor dua buona screncha

(Retrato copiado doutro sítio, puis inda nun tube la suorte de poder sacar un cula mie máquina)

Eiqui a dies quando bie un decumentairo na telbison subre las albelidades d’alguas abes, dei-me de cuonta i cheguei a pensar s’era ua que m’arremadaba ou se fui you que l’eimitei quando era rapaç. An todo l queilha fazie tamien you l fiç, mas naquel tiempo nien you sabie que eisistie essa abe. Dende cuido que nun fui un copion, loinge staba you de ser prouista por bias desses jeitos tan anterjeitados que la guapa abe fazie. De l mesmo modo, essa abe yá fazie pula cierta todos aqueilhes porparos i pantominices hai miles i miles d’anhos.
L’abe quando ampeça a tener cuorpo i prumaige que chegue, ampeça tamien a mirar ls mais bielhos que nua lhabuta zanfriada, scuolhen un sítio adonde tenga un polheiro a jeito i lhímpan-lo de todas las folharascas, garamiços, fenascos, pedricas anté que se quede un berdadeiro terreiro pa l bailo i un sagrado para las pantominas queloquiales de que el ye l berdadeiro ator. Apuis bota-se nun bailo de ruodra, d’alas abiertas, paboneia-se i amostra la sue lhustrosa prumaige que ganha un tamanho i uas bistas quen nien rei an die de coronaçon i fiesta.
Puis cumo you me lhembrei de ls tiempos de rapaç... Aqueilha “Abe de l Paraíso”, de que stou a falar, (cuido que tamien assi se diç an mirandés), fizo-me arrecular a un tiempo que para mi i cuido pa la maiorie de ls rapazes era d’ouro. Aqueilhes anhos an que la boç bira rouca i fuorte, que un passa muito tiempo sgodando la cara, mira-se ne l speilho a ber se por ambaixo de l nariç yá ls pelos malos dan seinhas de nacer, si, porque esso ye meio camino andado para ser macho. Inche ls bofes d’aire, anda siempre cun peine ne l bolso i siempre bien screnchado que nien boubielho, la marrafa a caier porriba de ls uolhos, l mirar i l tino de sgueilha i matreiro.
Nun dá çcanso a sue mai porque quier las calças i la camisa que mercou ne la redadeira feira i stan na moda sien angúrrias. Acupa siempre un lhugar alantre las outras pessonas nas fiesta, nun para queto i piçca l uolho cun jeito manhoso, arreganga la tacha a to las rapazas nua de sacar un sunriso. Bota agabon a sou fabor an todas las cumbersas i façanhas, queda l maior an todo l que fai, daprende a perder l miedo de bailar quando stá solico, ansaia dúzias de bezes prelhangas que quier cuntar a las bailadeiras i arrastra l’ala a todas.
Tal cumo l’Abe de l Paraíso”, para ber se arrecuolhe l’atençon deilhas.