Porque tu sós mulhier
Nun me l lhiebes a mal
Por you te felcitar
Neste die tan special
Dies anternacionales pa las mulhieres
Era l que ls homes queriemos
Se nun fússen las mulhieres
L que ls homes fáziemos
Porque sós fermosa i guapa
I porque stou bien çpuosto
Bou-te a dezir hoije eiqui
L que mais you an ti gusto
Gusto de la tue cabecica
Cun tous pelos cumpridos
De la tue boca de ls tous beiços
I de ls tous guapos oubidos
De l tou cachaço eilegante
Anriba de las tues asicas
De l tou peito marabilhoso
Que segura las tues mamicas
L tou ambelhigo perfeito
Ne l meio de la tue barriguica
De l tou monte de Bénus
Que sconde la tue ratica
De las tues pernicas perfeitas
Culs pezicos no fin
Nun m'ampuortarie you nada
Que todo fusse para mi(n)
Mas cumo nun puode ser
Nun me lhiebes a mal
Que te dé un beisico
Neste die tan special
Mintirie se dezisse
Que nun me tocas nada
Sós ua guapa mulhier
Mereces ser muito amada
You yá quedaba cuntento
Solo cun cachico tou
Mas cumo nun puode ser
Un beisico eiqui te dou
Para todas las mulhieres de l mundo an special pa las Mirandesas, i las nuossas de la Quadrilha.
Muitos beisicos para todas.
José António Esteves
10 comentários:
Que cousa mais guapa tiu Jentonho!
Nun bos conheço ou talbeç nun me lhembre de bós, mas teneis que ser un bun home,porque solo dá amor i bei la beleza de ls outros, quien ls ten cul.
Cuntinai...
Un abraço
Almendra
You que sou mirandesa que passo porqui i screbo (mal)agradeço ls buossos bersos, mesmo que nun steia de acorco cun la forma cumo ie celebradol die.
Nun debe ser fiesta como agora asparece; L motibo de l die fui
ua cousa séria.Mal quando hai un die internacional de algua cousa.
Nun hai fiesta anquanto hai mulhieres biolentadas de todos ls modos, sien dreitos, a trabalhar l mesmo i ganhar menos, etc.etc..
I isto nun ie feminismo l que stou a falar! I un boziar fondo contra l que se passa!
Ls bersos stán bien sólo bos digo que squecistes l mais eiportante de la mulhier que son ls miolhos, la cabecica!
Besitas, tio Jantonho.
Adelaide
You sei tie Adelaide que esses tiempos fúran mui azedos, mas cumo nun stá na mie mano mudar l que seia, Bou l ponendo un açucarico para quedar mais ducica la cousa.Tamien sei que mesmo ne ls tiempos d´hoije se beian muitas cousas mal feitas, se puodiermos bos a melhora-las,
Tiu Almendra Secalha si me cunheceis
Mas yá nun bos lhembrais
Se sodes l Almendra que you que sodes
Yá bos cunheço de ls tiempos de la tropa de Mafra.
Um abraço, I beisico para tie Adelaide Poe ser l die de la mulhier. anté outra beç.
José António Esteves
Amigo José António
-Guapos son todos ls buossos bersos.
-Cada un que sal, you quedo mais rendido, siempre que bengo al "Froles Mirandesas" yá me fai falta ler ls buosso poemas.
-Parabienes por mais este a las ties de to l mundo.
Tio Jantonho, çqueci-me de bos dezir que ambersais bien.Las ties tenemos l sangre mi caliente...ancomecei lhougo a rezungar...
Tengo lido ls buossos bersos i gusto,
Beisicos,
Adelaide
Nó, you nun sou l Almendra de que falais, esse ye miu armano, mas deixou de benir a Sendin i poucas bezes l beio.
Abraço
Zé Almendra
bon, pus agora andames todes de berses ! Ala ! Fogo, este sta purreiro !
Beisico, si pa las Mirandesas, mas nun hai que squecer las Galhegas (quien ye que nun s'apaxunou por ua so de l'oubir falar ?), y las Bascas tamien aqueilhas de Biarritz ou Bilbo tamien (hui !). Nun me squeço no !
Hui i las Alistanas tamien Ai rapazes ! Las d'Alcañiças essas tamiên inda son dal nuosso lhado.
Oubrigado tiu Almendra stá çfeito l
anganho, miesmo assi staba na familha um abraço.
José António Esteves
Tiégui yá passei pu las Galhegas i
tamien pu las Bascas, pus bibie muitos anhos an Pamplona, Las Galhegas antandie-las bien, las Bascas solo an Castelhano, mas cun mulhieres la giente antende-se siempre seian de la nacionalidade que seian, Claro se fúran Mirandesas Tanto melhor.Un abraço Tiégui.
José António Esteves.
Tiu Faustino stabasse-me a passar
Muioto oubrigado, anton que tal bos bai, porqui bai rodando, Un fuorte abraço.
José António Esteves.
Buonas tardes José Antonho,
Solo agora bi ls buossos bersos i mais ua beç quedei ancantado cun eilhes. Miesmo nun stando de acordo cun la comemoraçon, yá que quando l Mundo ten essa necessidade ye porque inda bai habendo muitos dies onde las ties, ls ninos i outros que son çfrentes nun son respeitados.
Gostei muito de ls bersos i parabienes.
Un abraço,
Francisco Domingues
Enviar um comentário