Caçuada

Uas fouces

Ye mais que sabido que las gientes de las Tierras de Miranda siempre se dórun bien culs bezinos de l lhado d’alhá de la raia. Mas cumo quaije todo an la bida ye cumo na tulha, mesmo tenendo muito cuidado lhieba siempre alguas barreduras. Tamien las buonas bezinanças culs nuossos amigos spanholes nun se lhíbran de alguas lhonas, l mesmo acuntecerá de l lhado dalhá subre nós.
Quien nun se lhembra de la cuonta de l garotico que arremedou l spanhol i le dixo, “bai-te spanhol rabudo antes que te póngamos trés palos ne l culo”?
Cuido que se nun fusse assi nun tenie grácia nanhua, fai falta haber alguas mechas para mantener bibas las culturas. Ambentar lhonas subre ls bezinos ye ua cousa tan bielha i tan ousada ne ls nuossos dies i cun poucas ganas de zaparcer. Estas lhonas que se cuntában éran cumo ls fincones nas tradiçones, un modo bien própio de cada pobo, assi cumo las marras de la raia seca, senó qualquiera die naide sabie adonde acaba un termo i ampeça l outro.
Ne l die a die, aqueilhas cuontas de la stória an que ls mui nobres andubírun porqui a la spadagada, lhadronado tierras als zbalidos que bibien neste praino, yá hai muito fúrun squecidas. Mas pouco amporta las gientes ser assi ou assado, todo mundo sabie que ls spanholes éran bien agabarolas i caçuadores. Dezien a boca chena que ls mirandeses íbamos a la fiesta de la Senhora de la Lhuç porque percisábamos de las cantaricas, alpargatas i gustábamos de galhetas. I fui nua dessas fiestas que l quinteiro de la Quinta de Fuonte la Taça, andando campante de la bida pul terreiro cuas fouces a las cuostas, fui apoquentado por un spanhol.
- Antonces, hombre para que quires tu tanta fouce, ua nun te chega?
Al que el le respundiu.
- Son para mi i mius filhos. Sou lhabrador nua quinta que sembro de trigo i quiero star purparado pa la segada.
L spanhol assi que le oubiu dezir que tenie ua quinta botou-se a scarafunchar na cumbersa, quedar calhado nun era cun el.
- Anton, tenes ua quinta!? Sós assi un home de la mie cundiçon. I nun se dando por aquemodado, adelantrou: Sós un home cun muitos bienes, l cierto mais rico que you!
L quinteiro, home de muita simplecidade, nunca se dando a gabarolices, achaba que la sue quinta era armana a las outras, i arrespundiu-le:
- Mira home, ye pequeinha.
L spanhol palrador siempre sticando la cuorda.
- Mas hombre, diç-me qual ye l tamanho?
- Puis bien, ye ua quinta que l anho que la sembro toda lhieba uns cien alqueires de sembradura.
L Spanhol que staba mortico por fanfarronar-se, quando oubiu esta çcriçon, anchiu ls bofes de aire.
- Ah, la mie ye muito maior, mira tu que you lhougo a la purmanhana bien cedico çpuis l zaiuno, boto-me de jipe a dar la ronda, ye meidie inda nun fiç la metade.
L quinteiro de la Quinta de Fuonte la Taça quando lo biu todo ampruado, dixo-le:
- Yá dantendi. You tamien yá tube un jipe desses, son ua merda nun ándan nada, you algun tiempo apuis bendi-lo.