Zde Berlin!

Screbido die 23 de Márcio :

Cheguei hoije an bien a Berlin. Quedarei-me eiqui 5 dies pa l miu trabalho i açpuis yá bolberei de nuobo pra Paris. A la purmanhana cedo yá you andaba porqui, habie ua chobizna que nun paraba i un aire bien friu, mas agora yá s’acalmou. La purmeira cousa que bi hegando eiqui, fui un spece de galheta cun cereijas anriba. Nun sou capaç de me lhembrar cumo raio se chama isso, mas l que ye doce nun amarga !

Ua buona notícia ye que parece que me cunfundo bien cula giente deiqui yá que trés pessonas hoije s’acunchegórun de mi a falá-me Alman, i a pedir-me nun sei l quei, yá que ye ua lhéngua que nun falo! I l porblema ye esse, ye qu’inda hoije nun fui capaç de stablecer ua cumbersa cumo debe de ser ! Mas bon, nien si, nien sopas, cuntinei d’andar i acabei agora d’ancuntrar 3 moças de Pertual, mas nien tiempo de pedir d’adonde benien que tube lhougo que me zapartar deilhas porque nun lhebábamos l mesmo camino. Ua deilhas inda me dixo « Até jaá», you acho qu’isso ye ua buona seinha!

Mas bon, mesmo assi dou pra dar ua buolta por eiqui cumo l podeis ber naquessas fetografies. La cidade inda stá bien marcada pul muro, i agora ye maneira de fazer turismo i de lhebar ua recordaçon. Pus bénden-se pul centro todo uns cacharricos cun uns cachicos de l muro alhá. Isso a mi nun me parece que seia bien de l muro oureginal, i inda stube a pensar a ber se m’atopaba un cousico desses pa l amostrar a Antonho, que el sabe.

L que tubo más grácia hoije fui un ancuontro que tube cun un rapaç que yá maá de trés anhes que nun bie i que studou cumiyo na scuola d’angenherie de Bordeus. Finalmente stamos los dous eiqui pa la mesma cousa, la cunfréncia EuCAP 2009 (European Conference on Antennas and Propagation). El ye más de porpagaçon i you sou de porpagaçon i d’antenas, i assi bai a ser porreiro. Passei un pouquechico de tiempo a ber l porgrama de la cunfréncia (103 páiginas que ten aquilho!) i stan alhá alguns pertueses de l IST (Instituto Superior de Telecomunicações) que yá berei manhana. Inda nun mirei bien de l lhado spanhol quien ben, mas cuncerteza que pessonas de Madrid alhá staran.

Hoije :

Ui! Acabei agora de quemer más bien que you sei alhá! Yá ancuntrei los pertueses de l IST, i quemi cun spanholes de l Anstituto Politécnico de Madrid, son mui simpáticos. Dezirun-me qu'habie tamien giente d'Uvieu, i ne l que parece ténen uns cartazes pr'apersentar hoije a la tarde. You pensaba que solo iba a haber pessonas de l'Ouropa, mas anfin hai eiqui giente de l mundo anteiro. Stá isso mui porreiro!

Zde Berlin, Tiégui, pa l froles.