" La Maja Desnuda " (La guapa amplache)

Madrid, Museu de l Prado,
« La maja vestida / La maja desnuda »

(La guapa bestida / la guapa amplache)
de l pintor Francisco de Goya
(Fuendetodos, Saragoça, 30 de Márcio de 1746 -

Bordéus, França, 15 de Abril de 1828)

Penso que inda naide se squeciu de l que acunteciu hai dies an Braga a perpósito duns lhibros que éran mercados nua feira i ne ls quales aparecie na cápia l quadro de l pintor Gustave Courbet, l’Ourige de l Mundo… i agentes de la PSP que quejírun proibí-los depuis de habéren sido abisados por outras pessonas…
L que li hoije nun blogue pertués lhebou-me a pensar an mais ua cousa subre esse assunto. Dezie alhá, nun de ls sous comentairos, «Cuidado com a polícia de costumes. Mulher nua! » (Cuidado cula polícia de questumes. Mulhier amplache!), un de ls lheitores a perpósito dun quadro, desta beç de l pintor spanhol Francisco de Goya «La maja desnuda» (La guapa amplache), que la outora de l blog, ua porsora de Leiria grande apreciadora de poesie, habie scolhido para eilustrar un poema de Vasco Graça Moura, «Crónica feminina», que ampeça lhougo de maneira mui caliente cumo podeis cumprobar bós tamien, até an mirandés :

«estava nua, só um colar lhe dava

horizontes de incêndio sobre o peito,

a transmutar, num halo insatisfeito,

a rosa de rubis em quente lava.»

«staba amplache, só ua buolta le daba

hourizontes de fuogo subre l peito,

a streformar, nun halo ansastifeito,

la rosa de rubis an roija laba. »

[…]

A mi bino-me l seguinte pensar: Inda bien que se puodan eiditar ne ls países adonde bibimos (França, Pertual…) poemas cumo este de Vasco Graça Moura que (diga-se de passaige) me lhembro de haber bisto un die an Paris por oucasion dua cunferéncia nua grande feira de lhibros que todos ls anhos tamien fázen alhá, ne l més de Márcio percisamente, i a que se le dá l nome de «Salon du Livre» (Salon de l lhibro) que ten siempre un einorme sucesso cumo fui l caso astanho…

Inda bien ! Mas nun deixa de ser mui surprendente para mi que nun cunheço la realidade pertuesa cumo talbeç muitos que aqui léien este site la cunhécen (Ye an França que moro hai mais de quarenta anhos i l’anternete que tornou mais fácele an ciertos casos l acesso a l’ anformaçon, cumo todos sabemos, solo eisiste hai uns dieç anhos)… nun deixa de ser surprendente para mi por acaso saber que an 2009 inda haba an Pertual esse tipo de cinçura que lhieba a ampedir que ciertos lhibros ou quadros seéan spuostos an público cumo tamien ancunteciu afinal un die an Mirandela a Delaide Monteiro que faç parte agora de la nuossa quadrilha, cumo eilha mos chegou a cuntar ...

Torno a falar neste tema porque me parece que nun fui dita assi i todo neste sítio ua cousa que antretanto salta tamien als uolhos : Essa cinsura que inda eisiste an Pertual (I ende talbeç mais inda que an França) an relaçon al cuorpo femenino, i penso que nun m’anganho se dezir que tamien ye berdade an relaçon al cuorpo masculino, l cuorpo an giral quando ye spuosto mostrando todos ls seus contornos até ls mais íntimos, custitui na realidade ua grande forma de heipocrisie !

Cumo splicar anton que séian pul cuntrairo spuostos i outorizados an muitos sítios i an toda la legalidade por eisemplo la benda i l comércio de einúmeras rebistas, jornales, bídeos e outras publicaçones nien siempre de bun gusto que ténen cumo oubjetibo dar a ganhar a alguns i tamien a alguas amostrando a las claras aqueilho que muitos (la maiorie !) scundemos ou simpresmente nun amostramos por pudor, mas que an ciertos casos alguns tamien cinçúran, rejéitan i reprímen inda hoije, an 2009 ?

Hai ua rezon mui simpres que lhieba la sociadade a poner lhibremente ne l comércio (sujeita solo a alguas restriçones) toda essa amprensa de carátele mais ou menos pornográfico: porque nó tamien i antes de todo antresses financeiros nien siempre declarados (al fisco por eisemplo) i an ciertos casos bien scundidos, esses pul cuntrairo!? Nó?

Outros para se dar buona cuncéncia, cumbencidos talbeç que solo assi poderan chegar mais rapidamente al Paraíso, subretodo nestes tiempos an que l repersentante mássimo de la Eigreija prega l'abstinéncia (sexual, claro! Dende l que acunteciu an Braga, pensais que nun ye berdade? Ou tamien, debe de ser esso, cul que acunteciu als quadros de Delaide an Mirandela…), ban al punto de cinçurar alguas dezenas de lhibros, uns quantos quadros que, diga-se de passaige, lhebórun bien mais tiempo a ser screbidos ou pintados i por esso dórun bien mais trabalho a aqueilhes que ls realizórun; mas que, l mais de las bezes, nunca chégan a ser tan rentables eiconomicamente falando cumo toda essa amprensa de fuolhas de papel bendidas als milhares i an toda ampunidade que ténen cumo única pertenson amostrar mulhieres amplaches - gajas! cumo alguns dízen - depuis de uns se habéren lhemitado a tirar i eiditar uns quantos retratos que nun lhieban tanto tiempo ou dan tanto trabalho cumo se fusse preciso screbir un lhibro anteiro ou pintar… ua obra d’arte !


Bibimos mesmo uns tiempos de crise! I crise, quien sabe tamien, subretodo de balores! Mas you, cumo siempre fui l miu caso, que haba ou nó crise, cuntinarei a ir a ber sposiçones seia an Pertual, an França ou tamien noutros países, a besitar museus i a ler cada beç mais buona i guapa lhiteratura... i subretodo… para me lhibrar dua cierta cunfuson a que por bezes até parece defícele scapar…sei que l que me puode ajudar ye ler tamien lhibros de poesie…
Ua poesie cumo you gusto: ua poesie serena i lhibertadora.

P.S. A solo uns binte quilómetros de adonde bibo, ne l Sudoeste de la França, na cidade de Castres, hai un museu cul nome de Francisco de Goya que tengo que tornar a ber. Ye l único an França a mostrar un panorama tan amportante de la pintura spanhola cun quadros tamien de Pacheco, Murrillo i Velásquez. De Goya hai alhá, antre outros quadros, un outo-retrato i de Velásquez, sei tamien que hai un retrato que fizo de l rei Filipe IV de Spanha que tamien fui rei de Pertual.