24/03/09

Un baraço i dous nuolos





Serie un die bien armano a outros, you yá era rapaç de atar ls çapatos hai muito tiempo, nun fusse a la purmanhana miu pai achegar-se a mi i dezir-me:
-Pon l pie anriba deste talho, quiero saber quanto calças i a mi yá me custa a abaixar por bias destes delores nas malditas cruzes.
Yá traie un baraço cun nuolo nua punta. Mediu l pie i fizo outro nuolo. Apuis este géstio, palabras para quei, era die uito, die de feira an Malhadas. Mientres guardaba l baraço nun de ls bolsos de l capote, acrecentou:
- Bou-me a la feira cun tagalhico de cordeiros, se ls bendir i l çapateiro de baixo stubir por alhá merco-te unas botas de bezerro.
Botei las manos a la cabeça. Staba zgraciado pa l resto de l anho. Puis era sabedor que se l çapateiro stubisse na feira nun deixaba miu pai anté el nun traier las botas que por ende tubisse, fussen eilhas a la medida cierta, lhargas ó apertadas. Çapateiros de baixo mais s'aparecien a çanchinas que a pais de filhos, se éran grandes nun fazie mal, l garoto medra to ls ides, se éran pequeinhas cul tiempo alhárgan. You nun me quedei. Inda dei palpite a ber se pegaba: Ah pai you quiero ir a la feira cun bós, i yá nun percisais de lhebar l baraço!
De nada me baliu. Lhebei lhougo ua nega de l tamanho de l camino de la feira, nun deixando dúbedas sequiera.
- Tu quedas cun tue mai puis eilha solica nun dá cuonta de l ganado i de las bacas, assi cuntigo por acerca ye melhor, bai tou armano.
Berdade seia dita nun era desta feira que you gustaba mais, i inda quedaba la de l die dezanuobe an Caçareilhos i çpuis la de l Naso die bient’i dous, la mais guapa para mi. Staba nas manos de Dius, ó miu pai nun bendie ls cordeiricos, ó l çapateiro nun benie. Porque las redadeiras botas de bezerro mercadas a baraço, fui dua curceficaçon atroç. Yá eilhas percisában duas gáçpias inda ls mius pies nun se habien afeito, duras que nien cuornos, nun houbo sebo que las amolhíssen. Chegaba a andar çcalço, lhebando-los a las cuostas.
Mui pai a la tardica chegou de la feira, i oubi-lo dezir para mie mai, ls cordeiricos pagórun-me-los a meia nota, mas l çapateiro nun l bi. L garoto ten que s’amanhar até la próssima feira.




1 comentário:

Adelaide Monteiro disse...

Que suorte tebiste, Faustino!...
Un beisico
Adelaide