08/04/13

Ferida




« Nomeadamente na segurança social…. » anunciou neste fin de sumana i durante la missa del, l purmeiro menistro, un tal chamado Passos Coneilho, para dezir que iba a haber mais cortes, antre outros nesse ramo - la Segurança Social - que ye un de ls mais eissenciales para porteger ls mais fracos, ls mais pobres, ls mais necitados.



I zde hai uns tiempos, acá ban chegando ls nuobos eimigrantes nun paíç cumo la  França por eisemplo i an mais grande número que durante las últimas décadas, ziludidos, rebuoltados i que mos cúntan:

“You i l miu marido, dixo-me inda hai dies Sónia que bibie an Alcobaça mais l sou home i l filho de 11 anhos, acabemos por decidir eimigrar todos trés. L patron de l’ampresa na qual trabalhaba l miu home cumo eiletecista yá nun pagaba yá fazie bários meses i l miu ourdenado cumo secretária tamien nun chegaba para mos gobernar a todos trés....”



Mas pessonalmente fui quando eilha me falou de la deficuldade ne l acesso a la salude que quedei mais ampressionada: “Para arrancar un diente por eisemplo, son lhougo 70 euros ou mais que un ten que pagar sien nunca mais tornar a ber esse denheiro.  I l resultado ye que muita giente deixa de se tratar corretamiente a tal punto que la salude an Pertual torna a ser un prebilégio de quien ten meios ou a quien yá quaije nada faç falta”



Aqui stá anton probablemente l punto mais sensible de todo un sistema ! Se nun ye sadismo de la parte daqueilhes que quieren hoije bé-lo  inda mais a sangrar, dezi-me anton l que ye ?




4 comentários:

leonardo antao disse...

Buonas nuites Ana:

Eisemplos cumo este mostran que l nuosso Paíç bibe nua situaçon de tragédia social.

Cun estas medidas d'austeridade stan-mos a “sangar” cumo se fússemos cochinos na matánçia.

Un abraço,
Leonardo.

Ana disse...

Buonas tardes, Leonardo,

Antendo porque ye que ls Pertueses se stan finalmente a tornar refratários a todas estas nuobas medidas. Hai por acaso lhemites. Pena ye l Paíç nun haber sido capaç de eibitar chegar a la situaçon atual.

"refratários" ye la palabra que ancuntrei hoije ne l jornal Le Monde, nun artigo de meia página, subre ls últimos acuntecimientos que houbo nestes dies an Pertual.

Un abraço

Ana Maria

Ana disse...

N.B. L artigo de Le Monde saliu na eidiçon deste último fin de semana (Domingo/Segunda-feira)

leonardo antao disse...

Buonas nuites Ana,

Ye berdade que nós ls Pertueses stamos a tornarmos “refratairos”, antendido cumo “rebeldes” i esso berifica-se cada beç qu'algun Menistro bai a la rue, an bejitas a qualquiera lhado solo se ouben “berros”, palabrones, ansultos,…

Ls gobernantes trasformórun l nuosso Paíç nun protetorado desta giente de l capital, i solo gobernan cul único oubjetibo de defender ls antrisses de ls credores de l capital.

Sangran ls recursos i las eiquenomies de ls pobres pa l bolso de ls poderosos duonhos de l capital, que quieren trasformar ls trabalhadores nua classe de scrabos.

Un abraço,
Leonardo.