STÓRIA
DE L CRUZEIRO DE SENDIN
A
la punta de riba de las eiras, mais ó menos onde hoije ye la Caixa Agrícola, un
bui, ne l tiempo de la trilha de meados de l sieclo XIX, por rezones que nun se
sabe, scuornou l bisabó de la D. Odete (you
bou a screbir solo ls nomes de las pessonas mais coincidas para que todos
púodan antender mais de brebe i para nun screbir muito) i matou-lo.
Ls
filhos; José Luís Falcão, Ana Falcão, Leopoldina Falcão i Maria Falcão,
cuntratórun l mais afamado canteiro de l Praino, para fazer ua cruç ne l sitio
adonde morriu l pai.
L
cruzeiro tenie, onde hoije ten la cruç, ua berdadeira pieça de arte, cumpuosta
por l Cristo i la eimage de Nuossa Senhora agarrada als pies de la cruç. Nun se
sabe al cierto cumo se partiu essa parte. L que hai muitos anhos you cunsegui
saber, fui que por trás de la casa que ye de la filha de la D. Amélia, an
Camino Prado, se ancuntrában alguas partes, cumo la cabeça de l Cristo, ua mano
i la eimage de Nuossa Senhora. Las outras partes dezíen que staríen ne l poço
de la curralada dessa casa. Alredor de la queluna, ten sculpidos todos ls
artimanhos usados para la cruceficaçon de Cristo. Bal la pena mirar para todo l
que alhá ten sculpido.
Cumo
l cruzeiro era ua berdadeira obra de arte, quando se celebrában ls cententenairos
de la fundaçon i de la restouraçon de Pertual, an 1940, l prejidente de la Câmara pediu a la familha
de ls duonhos de l cruzeiro para l deixáren poner onde stá hoije. Aníbal
Fernandes, que staba casado cun la filha de José Luis Falcão, todo fizo por esso.
L
cruzeiro fui mudado i ponírun alhá l nome de quien l mandou fazer, nua placa de
mármole.
Cumo
curjidade bou a dezir-bos quien fúrun ls quatro armanos.
José
Luís Falcão era l abó de la D. Odete i suogro de srº. Aníbal.
Leopoldina
Falcão i Maria Falcão morrírun solteiras i fúrun eilhas que cumponírun la
capielha de San Sebastian.
Ana
Falcão casou cun tiu Melindro i tubo ua filha de nome Júlia, mãe de l Pe. Zé.
Morriu cedo i tiu Melindro bino a casar cun tie Meixeda de que naciu la D.
Amélia. Sculpai nun screbir ls nomes berdadeiros, mas cuido que assi antendeis
melhor.
3 comentários:
Buonas nuites, Primo,
1.“Alredor de la queluna, ten sculpidos todos ls artimanhos usados para la cruceficaçon de Cristo”, dezis Primo. You bien sei que l’obserbaçon direta, “in situ”, ye ansusbtituible mas balie tamien la pena ir alhá i retratar todos esses “artimanhos” para ls podermos apreciar talbeç inda melhor yá que ls retratos cunseguen mostrar por bezes ciertos pormenores que un nun bei noutras circunstáncias.
2.Que grau de parentesco eisistie ou inda eisiste antre todas essas pessonas chamadas Falcão que aparécen nesta stória que mos cuntais i nós afinal, hoije an die, quiero you dezir: cula nuossa familha atualmente. Ye ua pregunta que tamien poderei fazer a mius pais mas só starei cun eilhes daqui a uns dies. Resta a saber se eilhes saberan splicar tan bien cumo bós l que nun ye nada eibidente. Aceitai anton esta mie aperpuosta, Primo!
3. I agora çculpai i berificai por bós próprio se neçairo (yá uns tiempos bos lo querie dezir) mas las únicas abrebiaçones corretas para palabras cumo senhor ou tamien doutor son: sr. i dr. Nun se debe acrecentar un “o” final yá que ningua dessas dues palabras acaba por essa bogal mas si pula cunsunante “r”. Ye solo essa la rezon.
Un abraço
Ana Maria (nieta de Ana Joaquina Falcão)
Miu abó António Falcão era primo!
Esso de l uso de dr. ye erro de hai muito tiempo! Daprendi mal zde l'amprencípio i solo apuis de ler ye que eimendo la mais de las bezes.
Tengo essa ambora ne l blog:
www.nuobasdalpraino.blogspot.com
sien dr i culs nomes cumpletos.
La ambora ye de 18-01-2008 onde debe tener mais retratos.
Cumo ando a poner l que se apagou ne l froles ye probáble que aparéçan outras mensaiges antigas.
Ne l cruzeiro tamien ten ua parte cula régua i l squadro!
Abraço
Tou primo Zé (filho de Arminda dos Anjos Falcão)
Buonas tardes, Primo (filho de tia Arminda... Sabeis que nós questumábamos dezir: tia Arminda das Eiras, ua santa mulhier, buossa mai, Primo, podeis tener la certeza)
Fui a ber agora mesmo esso buosso site de que you yá me habie squecido (por esso fazeis bien de tornar a amentar nel) mas nun ancuntrei artigo ningun cula data de 18 de Janeiro de 2008 i ls retratos de ls artimanhos que aparécen ne l cruzeiro de Sendin.
Donde ben anton l problema ?
Bien háiades pula splicaçon.
Ana Maria
P.S. Cumo podeis ber, ls Pinos nunca desísten !
Enviar um comentário