L PURMEIRO DIE

Ye l purmeiro die de l anho

Por isso ye l die d´Anho Nuobo

Toda la giente fui pa la rue

Para ber l que diç l pobo.

I l pobo bózia de cuntento

Que l anho bielho s´acabou

I para alegrie de todos

Un Nuobo Anho ampeçou.

Uns dezien bai-te ambora

I que benga outro melhor

Todos dezien an cunjunto

Que l bielho fui un stapor.

Pide-se por to ls meios

Nuobos bentos de mudança

Que apesar deste ser malo

Inda deixou algua sprança.

Sprança para seguir lhuitando

Que l mundo nun s acabou

Só s´acabou mais un anho,

Mas yá outro Nuobo ampeçou.

I las spranças qu, inda quedórun

Que l bielho nun fui capaç de lhebar

Ye un bun motibo para astanho

A essas spranças mos agarrar.

I seguir lhuitando cula bida

Agora que s´acabou l stapor

Na sprança qu´este Anho Nuobo

Seia muito, muito melhor.

Muita alegrie, i muita paç

Para cu l pie dreito antrar

I ls projetos que quedórun

Tenemos que ls acabar.

Feliç Anho Nuobo Para Todos

    José António Esteves

Lar de San Jesé Bumioso