23/01/13

Stimados cunterráneos





Tal qual mos ten sido comunicado, quier atrabeç de l cuntato pessonal, quier atrabeç d’ameils i divulgado ne l site www.nialdelaboubielha.org  , uorgano oufecial de  l’Associaçon la fiesta de Nuossa Senhora de las Candeias ende stá marcada pa l deimingo die 3 de febreiro

Cumo siempre cun porgrama que bai zde l ajuntamiento ne l sagrado de l’Eigreija Paroquial de “Val Figueira” , adonde se celebrará ua missa cun lheituras an lhéngua mirandesa, un almuorço/cumbíbio na Quinta da Adega, que yá mos dou probas de ser un sítio assossegado i reserbado, eili bien acerca, astanho, cula particularidade de ser un anho d’eileiçones, hai botaçon pa ls nuobos uorganos, porque somos ua Associaçon ourganizada, cun statutos oufecializados,  hai que dar cumprimiento al que neilhes stá stabelecido.

L que you querie dezir, i la rezon percipal porque l sinto i quiero comunicar a todos bós, puis cuido que  ye mui berdadeiro i mui amportante ye que todo esto, toda esta atebidade de l’Associaçon, an pormober i mantener las tradiçones, cumo l magosto (die de Todos ls Santos), ls Jogos tradecionales (1º de maio), la partecipaçon conjunta nas einiciatibas cultutales cumo l salimiento de lhibros, las caminadas, almuorços ne l salon ne ls beranos cula Associaçon “Sol Nascente” (cula morada na Zenízio) i la fiesta de Nuossa Senhora de las Candeias, toda esta purparaçon i pormoçon ye lhebada até la fin pula direcion, nun se trata dua manha deilhes, nun se trata de las fazer para que alguien quede bien ne l retrato, nun se trata de trabalho para que ls outros béien, nun se trata dua meia dúzia de prouista queréren andar bien bistos. 

Nó, tratasse de pessonas que trabálhan cun gusto, quieren bien to l mundo, an special ls Zenízienses, sous antepassados, ls recendidos i todos aqueilhes que por bias familiares i d’amizade a eilhes s’ajntórun, son pessonas que trabálhan por amor a las tradiçones, als questumes i sáben que las bibéncias i ls cumbíbios son ls melhores modos d’anriquecer, perserbar i mantener biba la lhabareda dun pobo.

Fázen-lo cun gusto, porque gústan de trabalhar para bien de la quemunidade, para bien de las pessonas, porque sien eilhas nun hai nada, nien tradiçones nien questumes, porque nunca zistírun merécen de la nuossa parte esta atençion. L’associaçon Cultural i Recreatiba “Nial de la Boubielha” nun serie la mesma cousa se nun fazísse todas estas atebidades.

Bamos todos partecipar mais ua beç na fiesta de Nuossa Senhora de las Candeias, tamien conhecida pul “Dous de “Febreiro”.

Saludos Zenízienses para todos

 


2 comentários:

leonardo antao disse...
Este comentário foi removido pelo autor.
leonardo antao disse...

Buonas nuites amigo Faustino,

Ye cun grande satifaçon que bos agradeço la dibulgaçon deste almuorço/cumbíbio.
Este testo zmostra la riqueza que las guapas palabras de la lhéngua mirandesa ténen para aquel pequeinho cachico de Pertual, chamado Zenízio.

L maior balor que ten este almuorço/cumbíbio ye relembrar ls nuossos fameliares i cunterráneos que Dius lhebou pa la sue persença ne ls radadeiros anhos i, mui amportante, cuntinar a mantener biba l'amisade i l'ounion antre las pessonas que nel partecipan, assi cumo la nuossa stimada lhéngua mirandesa.

Aprobeito para cumbidar todos ls zenizienses, todos ls mirandeses i todos ls lheitores deste testo a beniren a este eibento.

Un abraço
Leonardo