06/01/13

“NO CREO AN BRUJAS PERO QUE LAS HAI, HAI!”
Este ye un dito mui outelizado an Tierras de Miranda, mais para splicar ls azares que mos ban acuntecendo, que porque stéiamos fintados que hai miesmo bruxas!
Pus fui esso dito que se me oucorriu apuis de l que me passou quando iba a poner un retrato ne l froles!
Cun las modernices que ban aparecendo a cada die i cun las nuobas tequenologies que stan siempre a çcubrir cousas nuobas, l modo de poner retratos parece que nun ye eigual e you cumo inda sou un tiu antigo i d’habitos adequeridos, an beç de preguntar  cuidei que era capaç de resolber l porblema i toca a ambentar!
 
Nun resolbi nada i inda armei ua cunfuson maior!
 
Abri las mensages i a la punta de riba stá tamien ua nuoba funçon de l blogue!
 
Sien mirar bien solo li rascunho i ala a apagar. Tamien nun deixaba sien selecionar i pus un sinal ne l quadradico i apaguei!
 
Todas las mies mensages que stában a la mostra zaparcírun!
 
Bó, mas quereis ber que ye un birus, pensei you.
 
Passei un anti-birus, mas nun habie nanhun!
 
Solo al abrir de nuobo las mensages me dei cunta de l que habie feito! Feliçmente que solo aparecíen las mensages de 27 de Agosto para acá, se nó habie sido riscado de l froles pur falta de cabeça!
 
De todo queda ua liçon i esta ye bien taluda:
- Mira bien antes de fazer.
- L que parece muitas bezes nun ye.
- Antes de pensar que ye culpa de ls outros bei se nun sós tu que stás arrado.
- Na bida stamos siempre a daprender i nós pouco sabemos!
- Miesmo ls azares son para nuosso bien!
Cun esta última parte alguns pensarán que nó, mas you nun tenie ua pasta solo para l que pongo ne l froles i agora bou a tener ua trabalheira, para ber l que falta zed 27 de Agosto, para l tornar a poner!
Yá bou a criar ua pasta solo para las mensaiges de l froles!!

3 comentários:

Ana disse...

Ora biba Primo!

I you cula antençon de deixar hoije un comentairo a perpósito dessa pequeinha crónica que eiditestes nestes dies (mas que yá zaparciu!) i na qual amentábades ne l "tiu Pájaro", tan familiar para bós mas inda mais para mi se nun m'anganho. Querie-bos dezir que achei-la mui bien screbida i querie acrecentar mais ua ou dues cousas, mas esta subretodo:
fui mie mai que me cuntou inda nun hai muito tiempo que se esse tiu Pájaro ye quien you penso ua beç scapou-se para Fermoselhe i yá uns dies que la tie del (sabeis de quien stou a falar) andaba cada beç mais preocupada porque l home yá nun daba sinal de bida. Até que resolbiu ir cula mai (essa pessona tamien tan amportante tamien para bós, Primo) a saber de l que podie haber acuntecido al sou home.
L cierto ye que acabórun por dar cun el, bibo feliçmente (senó nun starie you aqui hoije a screber) mas nas arribas...
Ende parece que abó Pina (I agora, dezi-me: qual era l nome eisato deilha que yá nun me lhembro; ye preciso dezir que you assi i todo nun la cheguei a cunhecer), cunta mie mai que abó Pina percipalmente fartou-se de ralhar cun el (miu abó, stá claro, buosso tio, Primo) i de le dezir:
― Anton tu nun t'ambergonhas? Deixas la mulher an casa i nós, yá uns dies, chenas de miedo sien saber l que fazer i se stabas bibo ou muorto.

Isto para dezir que ir a saber de un pouco de açucre ou alhá l que era de l outro lhado de l riu era pula cierta bien mais arriscado que l que un puode maginar hoije an die.

Bá, a ber se un die tamien bos cunto ua que miu pai tamien me cuntou. Anquanto i nó, a ber anton se mos fazeis aparcer todos esses buossos testos que zaparcírun aqui de l Froles cumo por magie. Esso debe de ser debido ounicamente a un problema de manipulaçon...

Mas antes que me squeça:

Un feliç Anho Nuobo 2013 siempre (cumo tamien yá cheguei a dezir a outras pessonas que aqui scríben), siempre cun muita anspiraçon i tamien motibaçon para cuntinar a mos cuntar cousas antressantes eibidentemente an mirandés.

Buossa prima Ana Maria

Jose Almendra disse...

Essa de andáren a saber del fui porque l tirórun la roupa mal atrabessou l riu i nun podie benir amplache! Mas miesmo assi i todo nun l'agarrórun!
Mie bó era Maria Tomázia Conde! Mai de tue bó Ana!
Elha cuntou me muita porque cumo andabamos a studar an Miranda ne l coleijo tenimos que fazer trabalhos! !958/59/60.
Se la bida era defícele, era, era!
Fui azelhice mie que apaguei todo!
Feliç Anho para bós tamien!
Stube cun porblema grabe de salude, mas parece que todo bai a correr bien! I inda porriba la Marilia quebrou un braço!
Mas al malo tiempo buona cara!
Di le a Antonho que yá le bou a mandar un mail!

Tou primo Zé

Ana disse...

Deseio-bos anton als dous, a bós Primo i a Marília tamien, las melhoras i que la salude cuntinue siempre a bos acumpanhar.

Agradeço-bos muito por me andicar l nome eisato de abó Marie. Nun l cunhecie i hei de preguntar tamien a miu pai se el inda se lhembra. Mas çcunfio que nó. An tiempos, las pessonas cunhecien-se mais pula nomeada. Dende l antresse de saber tamien cousas subre la nuossa genealogie.

Hoije yá ye tarde para you me poner aqui a screber muito mas zde que deixei aqui la mie última mensaige, tube oucasion de falar cun mie mai al telfone. Eilha dou-me tamien ua splicaçon an relaçon al facto de miu abó haber deixado ua beç de aparcer durante dues ou trés semanas an Sendin sien naide saber mesma mie bó. Lhougo que tubir tiempo, tamien conto. Acho que tamien darie para ua pequeinha crónica.

Buonas nuites i felcidades.

Ana Maria