05/07/12

Alunos de Mirandés a la cunquista de Cáceres







Ambora salida na FUOLHA MIRANDESA DE l Jornal NORDESTE, de l die 3 de Júlio de 2012

L atrasado die 28 de l més de San Juan, ls studantes i studantas de mirandés de l Agrupamento de Scuolas de Miranda, de a par cun alguns porsores, fazírun, cumo to ls anhos, la biaige de fin de anho scolar, que astanho tubo cumo çtino la cidade de Cáceres, na quemunidade outenómica spanhola de la Stremadura.
Ser aluno de mirandés ye solo bantaiges: para alhá de todas las que sáltan als uolhos, l porsor de mirandés, Duarte Martins, amanha siempre maneira de lhebar ls alunos, de l 7º al 12º anhos, nua biaige de fin d’anho. Cada beç l çtino ye ua cidade çfrente i yá corrírun la seca i la meca: el fui Gijon, el fui Oubiedo, Ábila, Toledo, Lhion, Segóbia, Astorga, uas quantas, siempre cul tino an çcubrir ls lhaços stóricos i culturales, mormiente lhenguísticos, que armánan la Tierra de Miranda cul lhado de alhá.
Desta beç l çtino fui Cáceres, yá na parte de l sul de l antigo reino de Lhion. Ye sabido que Cáceres ye la cidade más grande de la Stremadura spanhola i la parte antiga de la cidade ye Património de l’Houmanidade zde 1986, que diç que ye un de ls cachos ourbanos de l’Eidade Média i de l Renacimiento más cumpletos de l mundo.
Apuis de haber salido a las 6 de la manhana, chegou-se ende pulas dieç i anté l’hora de quemer fui tiempo de ber todo l “casco antigo” de Cáceres, cousa rialmiente bien cunserbada, adonde abúltia muito palácio, muito museu, muita rue streita, muita… piedra. L punto alto fui la besita a la Cuncatedral, culas bistas subre to la cidade zde la torre de las campanas. Ls alunos de mirandés son tan speciales, que anté dou tiempo para dar uas antrebistas para la TVE Stremadura, que andában pulhi a saber que tal se zanrascaba la giente cula calma i cul rechino que fazie. I rialmiente: ua de las bezes que miremos para un desses aparatos que hai na rue para medir la calma que fai, bimos alhá crabados 46 graus çantígrados.
A la tarde, más ua boltica para mercar uns “recuerdos” i ala que se fai tarde para ir arrumando a Miranda, que inda haberie que parar pul camino para ber la bola. Si, la meia final de l Ouropeu, Pertual acontra Spanha.
La mocidade de Miranda biu la bola nun restourante de la borda de a strada, arrodiados de “perros castelhanos” (ne l dezir de Brites de Almeida) por to ls lhados. De l fin dessa cuonta nun bos dezimos nada que todo mundo sabe cumo acabou. l que si fumos çtemunhas fui de la grandeza i hounradeç de la mocidade mirandesa: sbarrou ne l poste, mas caíu de pies i de cara alhebantada. Nun bimos lhágrimas, mas an cada par de uolhos, an cada calatriç, se podie ler un poema dramático.
Nun mos bamos a poner eiqui cun moralismos de que perder i ganhar ye todo çporto, que l que antressa ye partecipar. Nó, nada disso. Fui amolado perder i solo cun un bernáculo mirandés podiemos traduzir bien l santimiento de anjustícia que mos há de doler por muito tiempo. Ua anjustícia trés drobos más grande que la Cuncatedral de Cáceres.

3 comentários:

leonardo antao disse...

Buonas nuites Alfredo,

Parabienes por esta antressante dibulgaçon de la la biaige de fin d'anho scolar de ls studantes i studantas de mirandés a Cáceres.

Ye ua eicelente eideia coincer melhor la stória i la cultura de ls “nuossos ermanos” qu'agora son “campiones”, “cul tino an çcubrir ls lhaços stóricos i culturales, mormiente lhenguísticos, qu'armánan la Tierra de Miranda cul lhado d'alhá”, cumo bós bien screbistes.

Este tipo de biaiges son siempre mui anriquecedoras, para daprendermos cousas nuobas, para melhorarmos la nuossa cultura giral, para mos formarmos cumo pessonas, i, an special, para tornar la bida scolar spetacular.

Un abraço
Leonardo

Unknown disse...

Yá te bou a cuntratar pal HOIJE!

Sei que tengo que pagar bien para la trasfréncia, mas l jogadores buonos hai que ls pagar bien!

Gustei i ye cun bejitas assi que ls alunos gánhan gusto pula lhéngua.
Buono trabalho jornalistico i de ls porsores que ourganizórun todo.

Un abraço para ti i outro para Duarte

Tiu Almendra

ACangueiro disse...

Yá habie lido la nuoba ne l jornal Nordeste i solo bos digo que ye siempre ua grande alegrie ber cumo bai sendo feito trabalho.

Parabienes a Duarte que agarra la mocidade i apuis al scritor, Tortulhas, que scribe siempre de modos a mos fazer sunrir.

Saludos para dambos a dous i claro para la rapaziada que sien eilhes nada se puode fazer.