22/06/12

Hai amor a la lhéngua








 

La classe de mirandés de la Associaçon de Lhéngua Mirandesa, an Lisboua, acabou l anho. Fui la Casa de Trás ls Montes an Lisboua la nuossa scuola. Hai alunos que fui la purmeira beç que tubíran classes de mirandés, outros que son repetentes i a todos le gusta muito daprender l mirandés. Somos todos pertueses: alantejanos, leirinenses, lisboetas, stramuntanos i mirandeses. Mas que grande familha.  

L anho findou i hai cena. Alguns houbo que nun yeran de la classe mas que tamien fúrun a la cena, bundaba le dezir dues palabricas na lhéngua mirandesa i yá tenien la garantie de antrada na classe pa l próssimo anho. 

Hai l amor a la lhéngua. La cena fui an casa de Patrícia i Nuno, nacidos an Lisboua mas filhos de stramuntanos, eilha de Parada de Anfançones i el de Picuote. L anho atrasado ls dous fazírun parte de la classe de mirandés. Astanho Patricia nun puodo. La sue nina bai para un anho de eidade i creciu na barriga de sue mai a oubir la lhéngua de sous abós. Agora la nina ten arrimado a un anho i cun tantas madrinas i padrinos  bai pula cierta daprender a falar la lhéngua mirandesa.

Solo tenemos que dezir bien haia als porssores Amadeu Ferreira i a Fracisco Belharino pul tiempo i çponibilidade que ténen para mos ansinaren la lhéngua i la cultura mirandesas. Todos bamos ficando un cachico mais anrequecidos. Hai que dezír que naide paga seia l que fur para daprender i que la Casa de Trás ls Montes çponibliza la sala sien recebir nada por esso. Assi se bei la buona buntade de todo l mundo.

22/Jun/2012
António Cangueiro

3 comentários:

Unknown disse...

Antonho, yá que ls porsores se portórun bien yá que todo mundo quedou cuntento, propongo que ls mardomos de l'ancontro de bloguers le ouferéçan ua garrafa de bino ne l 18.

ACangueiro disse...

Tiu Almendra acho ua buona eideia.

Sabeis que daprender la lhéngua mirandesa ye assi a modos de tornar a ser nino i mantener essa alegrie de bibir. Apuis ls porssores son rapazes que solo mos pónen a falar i mesmo aqueilhes que son mais arrecolhidos apuis soltan-se.

Abraço arrochado,

antonho

Amadeu disse...

Oubrigado, Jes+e Almendra. Será ua honra.

Amadeu