Cula anternet, la telebison bai-se-me quedando squecida i hai muitos dies que nien las nuobas beio. Mas un destes dies l sofá mirou-me i dixo-me: senta-te un cachico que hai bastante tiempo que nun roças teu culo ne l miu sentalho. A un cumbite assi nun se diç que nó i alhá me anterrei un cibico i quedei a mirar l porgrama que ende passaba.
La jornalista Conceição Queiroz andaba de bolandas zde l norte a sul de l paiç a perguntar a pessonas eidosas i mostraba cumo eilhas bibían i las çficuldades que passában para puoder ir al doutor i se tubíssen que agarrar ua ambulança nun la podían agarrar porque nun habie denheiro. Apuis anterrogaba ls respunsables políticos i cunfrontaba-los culas situaçones bistas. Ye cunfrangedor cumo ls nuossos políticos nun sáben l que yé bibir cun duzentos ouros i nun tener denheiro para medicamentos. Tamien foi antrebistado l Dr. António Arnaut, pai de l Sistema Nacional de Saúde que dixo que ls políticos atuales son todos citadinos sien saber l que yé bibir nua aldé a un buono par d’horas de la bila ó de la cidade. Ls governantes ténen que bibir cun denidade mas hai que dar l eisemplo i eilhes nun son capazes de lo dar. Nun sáben l que yé bibir cun deficuldades, son eignorantes… Quando ua pessona ls oube falar até pensan que todos ténen anternet i puodan requesitar ua ambulança i pedir al doutor que l scriba ls papeles. Cumo se puode gobernar un paiç quando nun se conhece la bida que l pobo bibe.
You ampeço meio anrezinado i rebuolbe-se-me l stomado que solo me dá ganas de zancar nesses tius todos. Yé a modos de alqueire acoquelhado que bai sendo arrasado, yé cumo quien diç bai-se anchendo l saco até que un die se arrama.
Sem comentários:
Enviar um comentário