Cena de ancerramiento de l curso de mirandés an Lisboua

Çque l anho scolar ampeçou, alhá íbamos nós todas las segundas a las uito i meia de la nuite até a las dieç, habie bezes que passaba... Las reglas nun éran bien las de l menistéro de l’eiducaçon, nun se márcan faltas, cada un bai quando pude, mas íbamos cumprindo cun la nuossa oubrigaçon: daprender a falar i a screbir la lhéngua mirandesa i tamien daprender un pouquito de la história de l pobo de fala mirandesa. Mas habie tamien la jolda, quaijeque l mais amportante...

Las tierras de nacénça de ls alunos de la classe éran las seguintes: Lisboua, Leirie, Alanteijo, Macedo de Cabalheiros i tamien de l Praino Mirandés. Las acupaçones de cada pessona tamien éran bárias: atibos, reformados, zampregados, porsores, ambestigadores i tamien "solo" l grande trabalho - duonha de casa, cun ninos.

Mas l mais anteressante: tubimos l perbileijo de sermos "padrinos/madrinas" de dous ninos que nacíran durante l anho de ties de la classe: Tomás i Mariana, parabínes a sous pais. Esto ye solo para berdes: daprender mirandés até cuntribui para que la populaçon pertuesa creça!
Todos ls anhos, cumo ye de regla, la scuola acaba i, cun classes aplicadas cumo estas, bien merecemos ua merenda i diplomas. La merenda staba treminada pa la segunda die 27 na mesma sala adonde tubimos las classes. Apuis de todo treminado, un mail:

"Ya sabemos que la próssima classe bai ser la redadeira gostábamos de fazer ua merendica. Nós nun cunseguimos ir por causa de ls hourários de Mariana, mas teniemos muito gusto de puder partecipar.
Assi, pensamos que la merenda podie ser an nuossa casa (acerca l spital de la Lhuç de Carnide) an beç de ser ne l lhugar de siempre. Para nós serie mui buono.
Assi, todo mundo tenerie la ouportunidade de conhecer a Mariana i la nuossa casa que ye ua casa eiquelógica.
Abraço,
Mariana, Nuno i Patrícia."

Tomás tamien fui alhá a amostrar-se para que toda la classe l conhecisse cun sue mai, Emmanuelle, de la Speciosa, anque nun tubira quedado pa la merenda puis tenie outro cumpermisso.

La merenda corriu mui bien, cun muito bolhos i cousas buonas, até alheiras tubímos.
Houbo la antrega de ls ditados, puis tamien faziemos ditados. You nun sou capaç de bos dezir an palabras la grande alegrie que fui al recebir ls ditados i ls certeficados de frequéncia, passado puls porsores i la Associaçon de Lhéngua Mirandesa. Mas solo gustarie que bíssades, quando Fracisco Domingues, porsor cun Amadeu Ferreira, antregou l ditado a Fernanda, que ye de Picuote, als salticos, parecie ua nina de dieç anhos. "Béian alhá, ora béian, solo tengo dous erros, carai...(i cuntinaba a salticos), nunca pensei que fura capaç, solo cun un anho de classe, stou tan cuntenta..." i mais salticos.

You nun mamei la lhéngua, daprendi-la. Pertual antes de lo ser yá tenie esta fala i ye ua tristeza mui grande que las anstituiçones repunsables nun fágan un çfuorço, solo mais un cachico, para ancentibar ls falantes.

L retrato de la cena eiqui queda, tal cumo l nome de ls alunos que alhá stan: Patrícia Deus Martins, Nuno Domingues, Firmino Bernardo, Nuno Neves, Amália Andrade, Fernanda Domingues, António Cangueiro, Bina Cangueiro, Amadeu Ferreira (porsor), Francisco Domingues (porsor), Jandira Ferreira, Irene Domingues, Cristina Cardona.

António Cangueiro