Dues senaras, dous mares

Gusto, quando me abraças ne ls tous braços frescos i me sgúbio ne ls marfolhos, nas rebulhacas i nas gametas dua senara sien móndia. Assi sós tu, ouciano cun óndias pequeinhas, cumo trigueira ne l més de Abril, ondiada pul aire, quando las spigas ampréinhan grano.

Dous mares, un an cada punta dun querer: Un rial, outro na eimaginaçon, apartados por mais de nuobecientos quilómetros de dous deseios: star eiqui i alhá…

Gusto, quando te abraço nas tues augas frescas, cuorpo lhebe na auga calma, piernas a nun sentíren l peso de cuorpo, sol a tostar la piel de la cara quando de cuostas miro l cielo, l ourizonte a perdé-se angulhido pul mar.

Gusto, quando por ti adrento miro ls peixes i l fondo cun ganhuolos i charrascas.

Dous mares que nun sou capaç d´ajuntar. Uas bezes, ne l rechino de la prainura, fazes-me falta, ouciano berde. Tomara-te alhá, para me dares algua frescura.

Outras bezes, çculpa Praino, chega-te eiqui cun tues casicas de piedra para you poder star a ouserbar las augas doutras senaras para alhá de las tues, tamien eilhas calenticas neste soalheiro. Quiero mirá-las ne l eimbierno, augas ferozes i, ne l berano tirar las maleitas de l cuorpo, sacudindo-me nas sues augas. Siempre tu me fazes tamien falta, agora que las huortas yá berdégan i las cereijas brancas alourórun. Que puodo you fazer se casar esses mares nun sou capaç !? Stou an ti i beio mar. Stou ne l mar i beio senaras sien fin, cumo an nina.

Gusto, quando por ti camino i inda ancontro ua senara de centeno berde, ondiada pul aire de riba, bracico pequerrucho de mar caliente deste miu cachico.